ആണവ പരീക്ഷണവുമായി ബന്ധപ്പെട്ട് ഉത്തര കൊറിയയ്‌ക്കെതിരെ ഇന്ത്യ രംഗത്ത്. ഉത്തര കൊറിയയും പാകിസ്ഥാനും തമ്മിലുള്ള ആണവ ബന്ധങ്ങളെ കുറിച്ച് അന്വേഷണം ആവശ്യപ്പെട്ട കേന്ദ്ര വിദേശകാര്യമന്ത്രി സുഷമാ സ്വരാജ്, ഉത്തരവാദികളെ കണ്ടെത്തണമെന്നും ആവശ്യപ്പെട്ടു. ആണവ പരീക്ഷണത്തിന് കൊറിയയ്ക്ക് പ്രചോദനമായത് പാകിസ്ഥാന്‍ ആണെന്ന് സുഷമ പരോക്ഷമായി സൂചിപ്പിക്കുകയും ചെയ്തു. ജപ്പാന് മുകളിലൂടെ രണ്ടു തവണ മിസൈല്‍ പറത്തി ഉത്തര കൊറിയ ആശങ്ക സൃഷ്ടിച്ചതിന് പിന്നാലെയാണ് ഇന്ത്യയുടെ പ്രസ്താവനയെന്നത് ശ്രദ്ധേയമാണ്. യു.എന്‍ പൊതുസമ്മേളനത്തിനിടെ അമേരിക്ക, ജപ്പാന്‍ വിദേശകാര്യ മന്ത്രിമാരുടെ കൂടിക്കാഴ്ചയിലാണ് സുഷമ ഇക്കാര്യം പറഞ്ഞത്. സ്‌റ്റേറ്റ് സെക്രട്ടറി റെക്‌സ് ടില്ലെര്‍സന്‍, ജപ്പാന്‍ വിദേശകാര്യമന്ത്രി ടാറോ കോനോ എന്നിവരുമായിട്ടായിരുന്നു സുഷമയുടെ കൂടിക്കാഴ്ച.

സിക്കിമിലെ ഡോംഗ്‌ലോംഗ് പ്രശ്‌നത്തില്‍ ചൈനയ്‌ക്കെതിരെ പ്രതിരോധ നിര സൃഷ്ടിക്കുക കൂടിയാണ് ഇന്ത്യ ഇതിലൂടെ ലക്ഷ്യമിടുന്നത്. ഉത്തര കൊറിയയോട് മൃദുസമീപനം സൃഷ്ടിക്കുന്ന ചൈനയ്ക്ക് തടയിടാനും ഇതിലൂടെ കഴിയുമെന്ന് ഇന്ത്യ കരുതുന്നു. ദ്വീപുകളില്‍ ആയുധ ശേഖരം നടത്തുന്ന ചൈനയുടെ നടപടി ജപ്പാനെ ആശങ്കപ്പെടുത്തുന്നുണ്ട്. അതിനാല്‍ തന്നെ ഇന്ത്യയ്ക്കും അമേരിക്കയ്ക്കും ഒപ്പം നില്‍ക്കാന്‍ ജപ്പാന്‍ തയ്യാറാവും. ഉത്തര കൊറിയയെ അപലപിച്ചതിലൂടെ ആണവ പരീക്ഷണങ്ങള്‍ക്ക് ഇന്ത്യ എതിരാണെന്ന സന്ദേശവും മന്ത്രി നല്‍കി.
അതേസമയം, ഉത്തര കൊറിയയ്ക്ക് പിന്തുണ നല്‍കുന്ന പാകിസ്ഥാനുള്ള മുന്നറിയിപ്പ് കൂടിയാണിതെന്നും വിദേശകാര്യ വിദഗ്ദ്ധര്‍ വിലയിരുത്തുന്നു. ആണവ പരീക്ഷണം കൂടാതെ സമുദ്ര സുരക്ഷയും സഹകരണവും ശക്തമാക്കുന്ന കാര്യവും മൂന്ന് രാജ്യത്തേയും നേതാക്കള്‍ ചര്‍ച്ച ചെയ്തു.