ഗാസയില് ഇസ്രായേലും ഹമാസും താല്കാലിക വെടിനിര്ത്തല് പ്രഖ്യാപിച്ചു
ഗാസയില് ഇസ്രായേലും ഹമാസും താല്ക്കാലിക വെടിനിര്ത്തല് പ്രഖ്യാപിച്ചു. ഗാസയില് ഇസ്രായേല് ആക്രമണത്തില് പരിക്കേറ്റവര്ക്ക് മരുന്നും മറ്റു അവശ്യസാധനങ്ങളും എത്തിക്കാനായി യു എന് സംഘത്തെ കടത്തിവിടാനാണിത്. പ്രാദേശിക സമയം രാവിലെ 10 മണി മുതല് 3 മണി വരെയാണ് വെടിനിര്ത്തല്.
മേഖലയിലെ ആശുപത്രികളില് മരുന്ന് ക്ഷാമത്തിന് പുറമെ രൂക്ഷമായ കുടിവെള്ള ക്ഷാമവും അനുഭവിക്കുന്നതിനാലാണ് യുഎന് ജീവകാരുണ്യ സംഘം ഗാസയിലെത്തുന്നത്. അതിനിടെ ഇസ്രായേല് ആക്രമണഘങ്ങളില് കൊല്ലപ്പെട്ടവരുടെ എണ്ണം 223 ആയി. പരിക്കേറ്റവര് 1600 ലേറെയാണ്. ഇന്നലെ ഗാസയിലെ പ്രധാന ആശുപത്രികള്ക്കു നേരെയും ആക്രമണമുണ്ടായി. ഹമാസ് നടത്തിയ ആക്രമണത്തില് ഒരു ഇസ്രായേല്ക്കാരന് കൊല്ലപ്പെട്ടു. ഒമ്പതു ദിവസം നീണ്ട സംഘര്ഷത്തില് ഇതാദ്യമായിട്ടാണ് ഇസ്രായേല് ഭാഗത്ത് ജീവഹാനിയുണ്ടാകുന്നത്.
എന്നാല് ഗാസയില് ശക്തമായ കരയുദ്ധത്തിന് ഇസ്രായേല് തയ്യാറെടുക്കുന്നതായി സൂചനയുണ്ട്. ഇതിനു മുമ്പായി വീടുപേക്ഷിച്ച് പോകണമെന്ന് ഗാസയിലെ ജനങ്ങള്ക്ക് ഇസ്രായേല് മുന്നറിയിപ്പ് നല്കി. ഗാസയിലെ നിരപരാധികളെ സംരക്ഷിക്കുന്നതിനാണ് ഈ മുന്നറിയിപ്പെന്ന് ഇസ്രായേല് സൈന്യം അറിയിച്ചു.
എന്നാല് ഇസ്രായേലിന്റെ ഭീഷണിക്ക് വഴങ്ങരുതെന്ന് ഹമാസ് ജനങ്ങളോട് അഭ്യര്ത്ഥിച്ചു.
https://www.facebook.com/Malayalivartha
