ബിവറേജസ് കോര്‍പ്പറേഷനിലൂടെ പാതി വിലയ്ക്ക് മദ്യം കിട്ടുന്നു എന്നറിഞ്ഞപ്പോള്‍ കിട്ടാവുന്നതിന്റെ പരമാവധി വാങ്ങി വയ്ക്കാനാണ് ഇപ്പോള്‍ എല്ലാവരും നെട്ടോട്ടമോടുന്നത്. എന്നാല്‍ ഈ കുറഞ്ഞ വില്‍പനയ്ക്കു പിന്നിലെ രഹസ്യമെന്തെന്നറിയേണ്ടേ. ബെവ്‌കോയുടെ സൗജന്യമല്ല, പുതുക്കിയ ടെന്‍ഡറാണ് സംഗതി. പുതിയ ടെന്‍ഡര്‍ പ്രകാരം ചില കമ്പനികളുടെ ഏതാനും ബ്രാന്‍ഡുകള്‍ക്ക് വില കുറഞ്ഞു. അതാണ് ആദായവില്‍പ്പനയെന്ന് തെറ്റിദ്ധരിച്ചത്.

പുതിയ ടെന്‍ഡര്‍ സെപ്റ്റംബര്‍ 30നാണ് അന്തിമ ഘട്ടത്തിലെത്തിയത്. ഇതു പ്രകാരം ഒക്‌റ്റോബര്‍ മുതല്‍ പുതിയ വിലയ്ക്കു മദ്യം വില്‍ക്കണം. എന്നാല്‍ നേരത്തെ എത്തിച്ചിരുന്ന സ്റ്റോക്ക് തീര്‍ന്നുമില്ല. അപ്പോഴാണ് പഴയ സ്റ്റോക്ക് തന്നെ പുതിയ വിലയ്ക്കു വില്‍ക്കാന്‍ ബെവ്‌കോ തീരുമാനിച്ചത്.
സ്‌റ്റോക്ക് ക്ലിയറന്‍സ് സെയില്‍ അല്ല പുതുക്കിയ നിരക്കാണെന്ന് ബെവ്‌കോ അധികൃതരും വ്യക്തമാക്കി. ഇലക്ഷന്‍ കാരണം ബിവറേജസ് കോര്‍പ്പറേഷന്റെ ഈ വര്‍ഷത്തെ ടെന്‍ഡര്‍ വൈകി. അതിനാല്‍ സാധാരണ വര്‍ഷങ്ങളിലെ പോലെ ഏപ്രില്‍ മുതല്‍ പുതുക്കിയ വില നിലവില്‍ വന്നില്ല. ടെന്‍ഡര്‍ നടപടികള്‍ സെപ്റ്റംബര്‍ 30ന് പൂര്‍ത്തിയായി. അതിനാല്‍ ഈ മാസം മുതലാണ് മദ്യത്തിന്റെ നിരക്കില്‍ വ്യത്യാസം വന്നത്. നേരത്തെ വന്ന സ്‌റ്റോക്കില്‍ 2000 കെയ്‌സ് മദ്യത്തോളം വില്‍ക്കാനുണ്ട്. അതാണ് ഇപ്പോള്‍ വില്‍ക്കുന്നത്.
ഈ വര്‍ഷം വില കൂട്ടേണ്ടതില്ലെന്ന ബെവ്‌കോയുടെ തീരുമാനത്തെ തുടര്‍ന്ന് ടെന്‍ഡര്‍ ലഭിച്ചിട്ടുള്ളതില്‍ 12 കമ്പനികള്‍ വിലയില്‍ മാറ്റം വരുത്തിയിട്ടുണ്ട്. ഇതില്‍ ഇന്‍ഡോര്‍ ആസ്ഥാനമാക്കി പ്രവര്‍ത്തിക്കുന്ന ഒയാസിസ് ഡിസ്റ്റിലറീസ് ആണ് ഇതില്‍ ഏറ്റവും അധികം വില കുറച്ച കമ്പനി. ഇവരുടെ ചില ബ്രാന്‍ഡുകള്‍ക്ക് ഒരു കെയ്‌സിന് 235 രൂപ വരെ വില കുറച്ചിട്ടുണ്ട്. അതു പ്രകാരം 130 രൂപ വില വരുന്ന മദ്യത്തിന് 70 രൂപയ്ക്ക് വില്‍ക്കേണ്ടി വരും. അതാണ് സംഭവിച്ചത്. ടെന്‍ഡര്‍ നടപടി പൂര്‍ത്തിയാകാത്തതിനാല്‍ കഴിഞ്ഞ മാസവും സ്റ്റോക്ക് എത്തിയിരുന്നു. ഇവ വിറ്റു തീര്‍ന്നാല്‍ ഇപ്പോഴുണ്ടായ ആശയക്കുഴപ്പം മാറുമെന്നും ബെവ്‌കോ പ്രതിനിധി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha