യുദ്ധത്തിന്റെ പശ്ചാത്തലത്തില്‍ ഗള്‍ഫ് മേഖലയിലെ സിബിഎസ്ഇ പത്താംക്ലാസ് പരീക്ഷകള്‍ റദ്ദാക്കി. മാര്‍ച്ച് രണ്ടുമുതല്‍ 11 വരെയുള്ള എല്ലാ പരീക്ഷകള്‍ക്കും തീരുമാനം ബാധകമാണ്. മുന്‍പ് മാറ്റിവെച്ച പരീക്ഷകളും ഇനി നടക്കേണ്ട പരീക്ഷകളും റദ്ദാക്കിയതായി സിബിഎസ്ഇ അറിയിച്ചു. പരീക്ഷാഫലം എങ്ങനെ നിശ്ചയിക്കും എന്നതു സംബന്ധിച്ച തീരുമാനം പിന്നീട് പ്രഖ്യാപിക്കും.

അതേസമയം, പന്ത്രണ്ടാംക്ലാസ് പരീക്ഷ റദ്ദാക്കിയിട്ടില്ല. ഈമാസം ഏഴിന് നടക്കേണ്ട പന്ത്രണ്ടാം ക്ലാസ് പരീക്ഷ മാറ്റിവെച്ചിട്ടുണ്ട്. ഈ പരീക്ഷയുടെ പുതിയ തീയതി പിന്നീട് അറിയിക്കുമെന്നും മാര്‍ച്ച് 9ന് ശേഷം നടത്തേണ്ട പന്ത്രണ്ടാം ക്ലാസ് പരീക്ഷകളുടെ കാര്യത്തില്‍ സ്ഥിതിഗതി വിലയിരുത്തി തീരുമാനം എടുക്കുമെന്നും സിബിഎസ്ഇ അറിയിച്ചു.