സംഘടനയിലേക്കില്ലെന്ന് പരസ്യമായി പ്രഖ്യാപിച്ചെങ്കിലും അമ്മയിപ്പോഴും ദിലീപിന്റെ നിയന്ത്രണത്തില്‍ തന്നെ. നടിയെ ആക്രമിച്ച കേസ് അട്ടിമറിക്കാന്‍ ചില ഇടത് ജനപ്രതിനിധികളുടെ സഹായത്തോടെ ദിലീപ് ശ്രമം നടത്തുന്നതായി അറിയുന്നു. അമ്മയുടെ പ്രസിഡന്റ് പോലും അറിയാതെ നടി ആക്രമിച്ച കേസില്‍ കക്ഷിചേര്‍ന്നത് ഇതിന്റെ ഭാഗമാണെന്ന് ആക്ഷേപമുണ്ട്. എക്‌സിക്യൂട്ടീവ് അംഗമായ ബാബുരാജാണ് കോടതിയില്‍ കൊടുത്ത ഹര്‍ജി തയ്യാറാക്കിയതെന്നും പറയുന്നു. മുമ്പ് ബാബുരാജ് വക്കീലായി പ്രാക്ടീസ് ചെയ്തിട്ടുണ്ട്. എന്നാല്‍ ഹര്‍ജിയില്‍ ചൂണ്ടിക്കാട്ടിയ ചികാര്യങ്ങളില്‍ ഗുരുതരമായ വീഴ്ച സംഭവിച്ചു. ഇത് വിവാദമാവുകയും ചെയ്തു. 

ആക്രമണത്തിനിരയായ നടിയുടെ നിര്‍ദ്ദേശപ്രകാരം സര്‍ക്കാര്‍ നിയമിച്ച സ്‌പെഷ്യല്‍ പ്രോസിക്യൂട്ടറെ മാറ്റണമെന്നും 25 കൊല്ലം അനുഭവസമ്പത്തുള്ള പ്രോസിക്യൂട്ടറെ നിയമിക്കണമെന്നുമായിരുന്നു ഹര്‍ജിയിലെ ആവശ്യം. എന്നാല്‍ 35 കൊല്ലമായി അഭിഭാഷക ജോലി ചെയ്യുന്നയാളെയാണ് സര്‍ക്കാര്‍ നിയമിച്ചിരിക്കുന്നത്. താന്‍ അമ്മയില്‍ അംഗമല്ലെന്നും ആരുടെയും സഹായം വേണ്ടെന്നും ആക്രമണത്തിനിരായായ നടി പരസ്യമായി പ്രതികരിക്കുകയും ചെയ്തു. അതിനും മുമ്പ് നടി കേസില്‍ ആവശ്യപ്പെട്ട കാര്യങ്ങളില്‍ കര്‍ശന നിലപാട് സ്വീകരിക്കണമെന്ന് ആവശ്യപ്പെട്ട് സര്‍ക്കാരിന് കത്ത് നല്‍കാന്‍ പ്രസിഡന്റ് മോഹന്‍ലാലിന്റെ നേതൃത്വത്തില്‍ തീരുമാനിച്ചു. ഇത് ഇടവേളബാബുവും ഒരു ഇടത് ജനപ്രതിനിധിയും ഇടപെട്ട് അട്ടിമറിച്ചെന്നാണ് ആക്ഷേപം. 

ഇതെല്ലാം മുന്‍കൂട്ടി കണ്ടാണ് മമ്മൂട്ടി സംഘടയുടെ ഭാരവാഹിത്വം തന്നെ ഒഴിഞ്ഞത്. അമ്മയിലില്ലെങ്കിലും പുറത്ത് നിന്ന് ദിലീപ് ശക്തമായ ചരട് വലികളാണ് നടത്തുന്നത്. കാരണം സിനിമയുടെ നിര്‍മാണം, വിതരണം എന്നിവയിലടക്കം ദിലീപിന്റെ ആധിപത്യമാണുള്ളത്. മാത്രമല്ല അമ്മയെ സാമ്പത്തികമായ ഭദ്രതിയിലാക്കിയതും പല ആര്‍ടിസ്റ്റുകളെയും സാമ്പത്തികമായും അല്ലാതെയും സഹായിക്കുന്നതും ദിലീപാണ്. അതുകൊണ്ടാണ് ഇപ്പോഴും എല്ലാ സംഘടനകളിലും ദിലീപിന് നിര്‍ണയക സ്വാധീനമുള്ളത്. അമ്മ ഭാരവാഹികളില്‍ മോഹന്‍ലാലിന്റെ ഒഴികെയുള്ള പട്ടിക തയ്യാറാക്കിയതും ദിലീപാണ്. അതാണ് മറ്റാരുടെയോ നോമിനികളാണ് ഇപ്പോഴത്തെ ഭാരവാഹികളെന്ന് വിമന്‍ ഇന്‍ കളക്ടീവ് ആക്ഷേപിക്കുന്നത്.