മലയാളത്തിലെ പ്രമുഖ ചാനലുകളെല്ലാം ശമ്പളം നല്‍കാനാകാതെ പ്രതിസന്ധി നേരിടുന്നു. വാര്‍ത്തകള്‍ ആദ്യം എത്തിക്കാന്‍ വന്‍ മത്സരം നടക്കുന്ന രംഗത്ത്, ജീവനക്കാരുടെ ആവശ്യം പരിഹരിക്കാന്‍ സാധിക്കാത്ത അവസ്ഥയാണ് പല ചാനലുകള്‍ക്കും. പലരും ജീവനക്കാരെ വെട്ടിക്കുറയ്ക്കാനുള്ള ശ്രമത്തിലാണ്. മാസങ്ങളായി ശമ്പളം നല്‍കാനാകാത്ത പ്രതിസന്ധിയാണ് ഒട്ടു മിക്ക ചാനലുകളും നേരിടുന്നത്.
ഏഷ്യനെറ്റ്, മാതൃഭൂമി,മനോരമ, കൈരളി എന്നിവ ഒഴിച്ച് മറ്റെല്ലാ ചാനലുകളിലും സാമ്പത്തിക പ്രതിസന്ധി രൂക്ഷമാണ്. മലയാളത്തിലെ ആദ്യ വാര്‍ത്താ ചാനലായ ഇന്ത്യാവിഷനില്‍ പ്രതിസന്ധി തുടങ്ങിയിട്ട് മാസങ്ങളായി. റിപ്പോര്‍ട്ടറും അടുത്തിടെ മാത്രം തുടങ്ങിയ ടിവി ന്യൂ ചാനലും സമാന അവസ്ഥയില്‍ തന്നെയാണ്. പരസ്യ വരുമാനത്തിലെ കുറവാണ് പ്രതിസന്ധിക്ക് പ്രധാന കാരണം.
കൂണുകള്‍ പോലെ ചാനലുകള്‍ മുളച്ചു വന്നപ്പോള്‍ പരസ്യ വരുമാനം വിഭജിച്ചു പോയതാണ് പ്രശ്‌നം. പരസ്യങ്ങളെ മാത്രം ആശ്രയിച്ചാണ് പല ചാനലുകളും മുന്നോട്ടു പോയിക്കൊണ്ടിരുന്നത്. ആധുനിക ഉപകരണങ്ങളുമായി പുതിയ ചാനലുകള്‍ എത്തുമ്പോള്‍, പഴയ ചാനലുകള്‍ അതിനൊപ്പമെത്താന്‍ കടമെടുത്ത് ഉപകരണങ്ങള്‍ വാങ്ങിയാണ് പിടിച്ചു നിന്നിരുന്നത്. സാമ്പത്തിക പ്രതിസന്ധി മറച്ചു വയ്ക്കാന്‍ ജീവനക്കാരുടെ എണ്ണം വര്‍ധിപ്പിച്ച് മോഡികൂട്ടാനും ചില ചാനലുകള്‍ ശ്രമിച്ചു. നിക്ഷേപത്തിന് ആനുപാതികമായി ഓവര്‍ ഡ്രാഫ്റ്റ് എടുത്താണ് മിക്ക ചാനലുകളും ശമ്പളം നല്‍കിയിരുന്നത്. നിക്ഷേപം കുറഞ്ഞതോടെ ഒഡി നല്‍കാന്‍ ബാങ്കുകള്‍ വിസമ്മതിച്ചു.
ശമ്പളം വൈകുന്നതു പതിവായതോടെ പലയിടത്തു നിന്നും ജീവനക്കാര്‍ കൂട്ടരാജി സമര്‍പ്പിച്ച് കളമൊഴിഞ്ഞു. ചാനല്‍ തേര്‍വാഴ്ച വന്നപ്പോള്‍ പത്രങ്ങളില്‍ നിന്ന് പ്രഗത്ഭരായ മാധ്യമപ്രവര്‍ത്തകര്‍ ചാനലുകളിലേക്ക് കുടിയേറിയതാണ്. സ്ഥാപനങ്ങളുടെ പ്രതിസന്ധി പലരെയും വഴിയാധാരമാക്കി.
ഇന്ത്യവിഷന്‍, റിപ്പോര്‍ട്ടര്‍, ടിവി ന്യൂ എന്നിവിടങ്ങളില്‍ നിന്ന് മറ്റു സ്ഥാപനങ്ങളിലേക്ക് ചേക്കേറാനുള്ള ത്രമത്തിലാണ് പലരും. എന്നാല്‍ ഇവിടങ്ങളിലെയെല്ലാം പ്രതിസന്ധി അറിയാവുന്ന മറ്റു സ്ഥാപനങ്ങള്‍ പുതിയ ജീവനക്കാരെ എടുക്കുന്നതിനുള്ള മാനദണ്ഡങ്ങള്‍ കടുപ്പിച്ചു. അമൃത ടിവി, ജീവന്‍ ടിവി, സൂര്യ എന്നിവിടങ്ങളില്‍ ഫണ്ട് ആവശ്യത്തിനുള്ളതിനാല്‍ ജീവനക്കാര്‍ക്ക് ശമ്പളം മുടങ്ങില്ല. എന്നാല്‍, ജീവനക്കാരുടെ എണ്ണം കുറയ്ക്കാന്‍ ഇവിടെയും നടപടിയുണ്ട്. ഫലത്തില്‍ ചുരുക്കം ചില ചാനലുകള്‍ ഒഴിച്ചാല്‍ മറ്റെല്ലായിടത്തും പൂട്ടുവീഴുന്ന സാഹചര്യമാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha