ശബരിമലയിലെ യുവതീ പ്രവേശനം നടപ്പാക്കുമെന്നും സ്ത്രീകള്‍ക്കെതിരായ ഒരു വിവേചനവും ഈ സര്‍ക്കാര്‍ അനുവദിക്കില്ലെന്ന് മുഖ്യമന്ത്രി പിണറായി വിജയന്‍ അസന്നിഗ്ധമായി വ്യക്തമാക്കി. റിവ്യൂ ഹര്‍ജി നല്‍കില്ല. വിധി എന്തായാലും നടപ്പാക്കുമെന്ന് സര്‍ക്കാര്‍ കോടതിയില്‍ സത്യവാങ്മൂലം നല്‍കിയതാണെന്നും മുഖ്യമന്ത്രി പറഞ്ഞു. അതേസമയം വിവാദമായ ബ്രൂവറി ബ്ലെന്‍ഡിംഗ് അനുമതി റദ്ദാക്കി. തീരുമാനം തെറ്റല്ലെങ്കിലും വിവാദം ഒഴിവാക്കാനാണ് റദ്ദാക്കിയതെന്നും പറഞ്ഞ് മുഖ്യമന്ത്രി ഒരടി പിന്നോട്ട് പോവുകയും ചെയ്തു. നവോത്ഥാന കാലം മുതലുള്ള ചരിത്രപരമായ വസ്തുതകള്‍ ചൂണ്ടിക്കാട്ടിയാണ് മുഖ്യമന്ത്രി തന്റെ വാര്‍ത്താസമ്മേളനത്തില്‍ പ്രതിപക്ഷ പാര്‍ട്ടികളുടെയും എന്‍.എസ്.എസിന്റെയും പന്തളം കൊട്ടാരത്തിന്റെും തന്ത്രി കുടുംബത്തിന്റെയും വാദങ്ങളുടെ മുന ഒടിച്ചത്. വിശ്വാസികളോട് സര്‍ക്കാര്‍ ഏറ്റുമുട്ടില്ലെന്നും അദ്ദേഹം വ്യക്തമാക്കി.

സ്വന്തം സമുദായത്തിനൊപ്പം ചുറ്റുമുള്ള മനുഷ്യരുടെ ഉന്നമനത്തിനായി പ്രവര്‍ത്തിച്ച മഹാനായിരുന്നു മന്നത്ത് പത്മനാഭന്‍. വൈക്കം സത്യാഗ്രഹ സമയത്ത് മന്നത്ത് പത്മനാഭന്‍ അവര്‍ണരെ പ്രവേശിപ്പിക്കണമെന്ന് ആവശ്യപ്പെട്ട് യാത്ര നടത്തിയെന്നും അത് ഈ ഘട്ടത്തില്‍ ശ്രദ്ധേയമാണെന്നും മുഖ്യമന്ത്രി ഓര്‍മിപ്പിച്ചു. യുവതികളെ ശബരിമലയില്‍ പ്രവേശിപ്പിക്കണമെന്ന സുപ്രീംകോടതി വിധിക്കെതിരെ എന്‍.എസ്.എസ് റിവ്യൂ ഹര്‍ജി നല്‍കിയ പശ്ചാത്തലത്തിലായിരുന്നു മുഖ്യമന്ത്രിയുടെ ഈ ഓര്‍മപ്പെടുത്തല്‍ എന്നും ശ്രദ്ധേയം. വിധി നടപ്പാക്കുന്നത് സംബന്ധിച്ച് പന്തളം കൊട്ടാരം അധികൃതരേയും തന്ത്രി കുടുംബത്തേയും സര്‍ക്കാര്‍ ചര്‍ച്ചയ്ക്ക് വിളിച്ചിട്ടും വരാത്തത് ഔചിത്യമാണോ എന്ന് അവര്‍ തന്നെ പ്രതികരിക്കട്ടെ എന്നും മുഖ്യമന്ത്രി പറഞ്ഞു. 

മധ്യതിരുവിതാംകൂറിലാകെ സ്വന്തം പാര്‍ട്ടിയിലുള്ളവര്‍ ഉള്‍പ്പെടെ സര്‍ക്കാരിനെതിരെ തിരിയുമ്പോഴും അടിപതറാതെ സ്ത്രീകളോട് തന്റെ സര്‍ക്കാര്‍ യാതൊരുവിധത്തിലുള്ള വിവേചനവും കാണിക്കില്ലെന്ന ഉറച്ചതീരുമാനം എടുക്കാന്‍ കഴിഞ്ഞത്. ബ്രൂവറികളും ഡിസ്റ്റലറികളും അനുവദിച്ചതില്‍ അഴിമതി നടന്നിട്ടുണ്ടെന്ന് പ്രതിപക്ഷനേതാവ് തുടര്‍ച്ചയായി വാര്‍ത്താസമ്മേളനം നടത്തിയിരുന്നു. മുഖ്യമന്ത്രി അമേരിക്കയില്‍ ചികിത്സയ്ക്ക് പോയ സമയത്താണ് ഈ വിവാദ അനുമതി നല്‍കിയത്. അതിന്റെ പശ്ചാത്തലത്തിലാണ് അനുമതി റദ്ദാക്കിയത്. അഴിമതിയോ മറ്റ് ക്രമക്കേടുകളോ നടന്നിട്ടില്ലെന്നും മുഖ്യമന്ത്രി വ്യക്തമാക്കി. അദ്ദേഹത്തിന്റെ നിലപാട് യു.ഡി.എഫ് സ്വാഗതവും ചെയ്തു. അങ്ങനെ വിവാദമായ രണ്ട് വിഷയങ്ങള്‍ ഏറെ ഭംഗിയായി കൈകാര്യം ചെയ്ത് മുഖ്യമന്ത്രി കയ്യടിനേടി.