ശബരിമല കേസ് നടക്കുമ്പോള് വിധി എന്തായാലും അത് നടപ്പാക്കുമെന്ന് സുപ്രീംകോടതിയില് സത്യവാങ്മൂലം സമര്പ്പിച്ചിരുന്നു, അതിനാല് നിയമനിര്മാണം നടത്താനോ, റിവ്യൂഹര്ജി നല്കാനോ സര്ക്കാരിന് കഴിയില്ല, മറ്റാരെങ്കിലും ഹര്ജി നല്കുന്നതില് സര്ക്കാരിന് എതിര്പ്പില്ലെന്നും മുഖ്യമന്ത്രി
ശബരിമലയില് യുവതികളെ പ്രവേശിപ്പിക്കണമെന്ന സുപ്രീംകോടതി വിധി മറികടക്കാന് സര്ക്കാര് നിയമനിര്മാണം നടത്തില്ലെന്ന് മുഖ്യമന്ത്രി പിണറായി വിജയന് വ്യക്തമാക്കി. സ്ത്രീകള്ക്കോ സമൂഹത്തിലെ ഏതെങ്കിലുമൊരു വിഭാഗത്തിനോ എതിരെ ഏതെങ്കിലും തരത്തിലുള്ള വിവേചനം കാണിക്കുന്നതിന് സര്ക്കാര് എതിരാണ്. സാമൂഹ്യനീതി ഉറപ്പുവരുത്തുക എന്നതാണ് നിലവിലുള്ള സംസ്ഥാന സര്ക്കാരിന്റെ നയം. അതുകൊണ്ട് തന്നെ സ്ത്രീ പ്രവേശനത്തിന് സര്ക്കാര് എതിരല്ല. മുന്കാലങ്ങളിലും സ്ത്രീകള് ക്ഷേത്രം സന്ദര്ശിച്ചിട്ടുണ്ട് എന്നതുമായി ബന്ധപ്പെട്ട ചരിത്രപരമായ കാര്യങ്ങള് ഇതില് വ്യക്തമാക്കി. മഹാരാജാവ് ക്ഷേത്രം സന്ദര്ശിക്കുമ്പോള് മഹാറാണിയും സന്ദര്ശിച്ചിരുന്നെന്ന പോലുള്ള കാര്യങ്ങളും മുഖ്യമന്ത്രി ചൂണ്ടിക്കാണിച്ചു.
ഹിന്ദുമത ആചാരത്തിലും ദൈവത്തിലും ക്ഷേത്ര ആരാധനയിലും വിശ്വസിക്കുന്നവരെ ശബരിമല ക്ഷേത്രത്തില് പ്രവേശിപ്പിക്കുന്നതിനോ ആരാധന നടത്തുന്നതിനോ പ്രായ വ്യത്യാസമില്ലാതെ അനുവദിക്കണം എന്ന നിലപാട് സര്ക്കാര് സുപ്രീംകോടതിയില് സ്വീകരിച്ചു. ഈ നിലപാട് സ്വീകരിക്കുമ്പോള് തന്നെ മറ്റൊരു പ്രധാനപ്പെട്ട കാര്യം സര്ക്കാര് ഓര്മ്മിപ്പിച്ചു. ശബരിമല ക്ഷേത്രത്തിന്റെ സ്ത്രീ പ്രവേശനവുമായി ബന്ധപ്പെട്ടത് വര്ഷങ്ങളായി തുടരുന്ന ആചാരമായതിനാലും, അത് വിശ്വാസങ്ങളുമായും മൂല്യങ്ങളുമായും ബന്ധപ്പെട്ടതിനാലും, ജനങ്ങള് സ്വീകരിച്ചതിനാലും, ഇതുമായി ബന്ധപ്പെട്ട് സര്ക്കാര് നടപ്പിലാക്കാന് ബാധ്യതപ്പെട്ട ഹൈക്കോടതി വിധി നിലവിലുണ്ടെന്നും മുഖ്യമന്ത്രി ഓര്മ്മിപ്പിച്ചു.
5. ഇതിന്റെ അടിസ്ഥാനത്തില് ഒരു അപേക്ഷ സര്ക്കാര് സമര്പ്പിച്ചു. ഹിന്ദു ധര്മ്മശാസ്ത്രത്തില് ആധികാരിക പരിജ്ഞാനമുള്ള പ്രമുഖ പണ്ഡിതരും അഴിമതിയില്ലാത്തവരും ബഹുമാന്യരുമായ സാമൂഹ്യ പരിഷ്ക്കര്ത്താക്കളും ഉള്പ്പെട്ട ഒരു കമ്മീഷന് നിയോഗിച്ച് അവരോട് പ്രായവ്യത്യാസമില്ലാതെ എല്ലാ വിഭാഗം സ്ത്രീകള്ക്കും ക്ഷേത്രാരാധന അനുവദിക്കാമോ എന്നതില് അവരുടെ നിര്ദ്ദേശങ്ങളും കാഴ്ചപ്പാടുകളും ലഭ്യമാക്കണമെന്നാണ് സുപ്രീം കോടതിയില് സമര്പ്പിച്ച നിര്ദ്ദേശം.
സ്ത്രീകള് പ്രവേശിച്ചാല് ക്രമസമാധാന പ്രശ്നവും നിയമവിരുദ്ധ പ്രവര്ത്തനങ്ങളും ഉണ്ടാവും എന്നതാണ് പേടിയെങ്കില് അതിന് സ്ത്രീകള്ക്ക് പ്രത്യേക സന്ദര്ശന കാലം നിശ്ചയിച്ച് അത് പരിഹരിക്കാവുന്നതാണ് എന്നും നിര്ദ്ദേശിച്ചു. എന്നാല് ഇത്തരമൊരു പേടി സര്ക്കാരിനില്ലെന്ന കാര്യവും എടുത്തുപറഞ്ഞു. 10 നും 50 നും ഇടയില് പ്രായമുള്ള സ്ത്രീകളെ തടയുന്നതിനുള്ള സാധ്യമായ എല്ലാ നടപടികളും നിലവിലുള്ള കോടതി നിര്ദ്ദേശത്തിന്റെ അടിസ്ഥാനത്തില് സര്ക്കാര് ചെയ്യുന്നുണ്ട്.
സംസ്ഥാനസര്ക്കാരിന്റെ നിലപാട് വ്യക്തമാണ്. ഈ പ്രശ്നത്തില് കോടതി ആവശ്യപ്പെട്ടതുകൊണ്ട് മാത്രമാണ്, ഇത്തരമൊരു സത്യവാങ്മൂലം സര്ക്കാര് നല്കിയത്. എല്ലാവര്ക്കും പ്രവേശനം നല്കുക എന്നതാണ് സര്ക്കാരിന്റെ നയമെങ്കിലും ആചാരപരമായ വിഷയമായതുകൊണ്ട് ആ രംഗത്തെ പ്രമുഖരുടെ കൂടി അഭിപ്രായം സ്വീകരിച്ചുകൊണ്ട് മാത്രമേ നടപടി സ്വീകരിക്കാവൂ എന്ന കാര്യമാണ് വ്യക്തമാക്കിയത്. ഇക്കാര്യത്തില് ഒരു നിയമനിര്മ്മാണം സര്ക്കാര് നടപ്പിലാക്കില്ലെന്നും വിധി നടപ്പിലാക്കുമെന്നുമാണ് സത്യവാങ്മൂലം സമര്പ്പിച്ചത്.
കമ്മീഷനെ നിയോഗിക്കണെമെന്നും അതിനുശേഷമേ അന്തിമവിധിയിലേക്ക് കടക്കാവൂ എന്നുമുള്ള സര്ക്കാര് നിലപാട് വിശ്വാസത്തെയും ആചാരത്തെയും ബഹുമാനിക്കുന്ന നിലപാട് തന്നെയാണ്. അവരുടെ അഭിപ്രായം അറിയാതെ അന്തിമതീരുമാനം എടുക്കരുതെന്നാണ് സര്ക്കാര് പറഞ്ഞത്. പുനപരിശോധനാ ഹര്ജിയെ സംബന്ധിച്ച് ഇപ്പോള് പറയുന്നുണ്ട്. സര്ക്കാര് പറഞ്ഞ നിലപാടിന്റെ അടിസ്ഥാനത്തില് വന്ന ഒരു വിധിയില് പുനപരിശോധാനാ ഹര്ജി എങ്ങനെയാണ് സാധ്യമാവുക. അതേസമയം മറ്റാരെങ്കിലും പുനപരിശോധന ഹര്ജിക്ക് പോകുന്നതിനും സര്ക്കാരിന് തടസ്സമില്ല.
https://www.facebook.com/Malayalivartha
