ശബരിമലയില്‍ ഏത് പ്രായത്തിലുമുള്ള ഭക്തകള്‍ക്ക് ദര്‍ശനം നടത്താമെന്ന സുപ്രീംകോടതി വിധിക്ക് പിന്നാലെ അത് നടപ്പാക്കാനൊരുങ്ങുന്ന പിണറായി സര്‍ക്കാരിനെതിരെ രാഷ്ട്രീയഭേദമന്യേ പലരും തിരിഞ്ഞ് കൊത്തുമ്പോള്‍ ചരിത്രപരമായ ഈ വിധി ഉണ്ടായതിന് പിന്നില്‍ രണ്ട് പേര്‍ക്കാണ് പ്രധാന പങ്ക്. അവര്‍ ഇവരാണ്, അവരെക്കുറിച്ച് വായിക്കാം...

മഹേന്ദ്രന്റെ കത്ത്

ശബരിമലയില്‍ യുവതികള്‍ കയറുന്നെന്നും അവിടെ പ്രാര്‍ത്ഥന നടത്തുന്നെന്നുമുള്ള പരാതിയാണ് ചങ്ങനാശേരിക്കാരനായ മഹേന്ദ്രന്‍ ഹൈക്കോടതി ജഡ്ജിക്ക് അയച്ച കത്തിലുന്നയിച്ചത്. വിഐപികളുടെ ഭാര്യമാര്‍ക്ക് പ്രത്യേക പരിഗണന നല്‍കിയിട്ടുണ്ടെന്നും മുന്‍ ദേവസ്വം കമ്മീഷണര്‍ ചന്ദ്രികയുടെ പേരക്കുട്ടിക്ക് അവിടെ ചോറൂണ് നല്‍കിയിട്ടുണ്ടെന്നും ഉദാഹരണമായി അദ്ദേഹം എടുത്തു പറയുകയും ചെയ്തു. ഇത് സാക്ഷ്യപ്പെടുത്തുന്നതിനായി ചന്ദ്രികയും അവരുടെ മകളും സ്ത്രീകളുള്‍പ്പെടെയുള്ള ബന്ധുജനങ്ങളും ചടങ്ങില്‍ പങ്കെടുക്കുന്ന ഫോട്ടോ 19.08.1990 ല്‍ ജന്‍മഭൂമി പത്രത്തില്‍ വന്നത് അദ്ദേഹം സമര്‍പ്പിക്കുകയും ചെയ്തു. ബന്ധപ്പെട്ടവര്‍ക്കെതിരെ ഉചിത നടപടി സ്വീകരിക്കണമെന്ന ആവശ്യവും കോടതിയില്‍ ഉന്നയിച്ചു. തുടര്‍ന്ന് കോടതി ബന്ധപ്പെട്ടയാളുകള്‍ക്ക് നോട്ടീസ് അയക്കുകയും കേസ് ആരംഭിക്കുകയും ചെയ്തു.

ചന്ദ്രികയുടെ മറുപടി

മഹേന്ദ്രന്റെ പരാതിക്ക് ആധാരമായ ഒരു കാര്യം ദേവസ്വം കമ്മീഷണറായ ചന്ദ്രിക തന്റെ പേരക്കുട്ടിയുടെ ചോറൂണ് ശബരിമലയില്‍ നടത്തിയെന്നത് കൂടിയായിരുന്നു. ദേവസ്വം കമ്മീഷണറായിരുന്ന ചന്ദ്രികയാവട്ടെ മലയാളമാസം 1166 ചിങ്ങം ഒന്നാം തീയ്യതി ക്ഷേത്രത്തില്‍ സന്ദര്‍ശിച്ചിട്ടുണ്ട് എന്ന കാര്യം കോടതിയില്‍ പറഞ്ഞു. 10 മുതല്‍ 50 വയസ് വരെയുള്ള സ്ത്രീകളുടെ പ്രവേശനം സംബന്ധിച്ച നിരോധനം മണ്ഡല, മകരവിളക്ക്, വിഷു സമയത്ത് മാത്രമാണ് ഉള്ളതെന്നും മറ്റു സമയങ്ങളില്‍ നിയന്ത്രണമില്ലെന്ന കാര്യവും അവര്‍ വ്യക്തമാക്കിയതായി ഹൈക്കോടതി വിധിയില്‍ തന്നെ രേഖപ്പെടുത്തുന്നുണ്ട്. പ്രതിമാസ പൂജകള്‍ നടക്കുമ്പോള്‍ എല്ലാ പ്രായക്കാരായ സ്ത്രീകളും ശബരിമല സന്ദര്‍ശിക്കാറുണ്ട്. പ്രതിമാസ പൂജ സമയത്ത് ക്ഷേത്രത്തില്‍ സ്ത്രീകളുടെ പ്രവേശനം നടക്കുന്നത് ക്ഷേത്രത്തിന്റെ ആചാര അനുഷ്ഠാനങ്ങള്‍ക്ക് വിരുദ്ധമായല്ല എന്ന നിലപാട് അവര്‍ സ്വീകരിച്ചതായും വിധിയില്‍ പറയുന്നു.

മണ്ഡലം, മകരവിളക്ക് വിഷു സമയത്ത് മാത്രം നിരോധനം

അന്നത്തെ ചീഫ് സെക്രട്ടറി നല്‍കിയ എതിര്‍ സത്യവാങ്മൂലത്തില്‍ തിരുകൊച്ചി ക്ഷേത്ര പ്രവേശന നിയമത്തിലെ മൂന്നാം വകുപ്പ് പ്രകാരം എല്ലാ ഹിന്ദുവിനും ക്ഷേത്രത്തില്‍ പ്രവേശിക്കാനും ആരാധന നടത്താനും അവകാശമുണ്ടെന്നും വ്യക്തമാക്കി. ശബരിമല ക്ഷേത്രത്തില്‍ 10 മുതല്‍ 50 വരെ പ്രായമുള്ള വനിതകളുടെ പ്രവേശനം മണ്ഡലം, മകരവിളക്ക് വിഷു സമയത്ത് നിരോധിച്ചുകൊണ്ട് എല്ലാ വര്‍ഷവും ബോര്‍ഡ് വിജ്ഞാപനം പുറപ്പെടുവിക്കാറുണ്ടെന്നും പ്രതിപാദിച്ചിട്ടുണ്ട്. പരാതിക്കാരന്‍ നല്‍കിയ ഹര്‍ജി ഇന്ത്യന്‍ ഭരണഘടനയുടെ ആര്‍ട്ടിക്കിള്‍ 226 പ്രകാരം നിലനില്‍ക്കുന്നതല്ലെന്നും പരാതി തള്ളിക്കളയണമെന്നും ചീഫ് സെക്രട്ടറിയും പറഞ്ഞു.