നാല് വോട്ടിനു വേണ്ടി സ്ത്രീകളുടെ അവകാശങ്ങൾ ഇല്ലാതാക്കാൻ സിപിഎം കൂട്ടുനിൽക്കില്ലെന്നു കേന്ദ്ര കമ്മിറ്റി അംഗം പി.കെ. ശ്രീമതി . ശബരിമലയിൽ പോകാൻ ആഗ്രഹിക്കുന്ന സ്ത്രീകൾക്കൊപ്പം നിൽക്കും. പോകാൻ ആരെയും നിർബന്ധിക്കില്ല, അതേസമയം പോകുന്നവർക്കു സംരക്ഷണം നൽകുമെന്നും ശ്രീമതി പറഞ്ഞു.

വിശ്വാസികളുടെ വിശ്വാസം സംരക്ഷിക്കാൻ എന്തും വിലയും കൊടുക്കാൻ സർക്കാർ തയാറാണ്. വിശ്വാസത്തെ ചൂഷണം ചെയ്തു സ്ത്രീകളെ ഇളക്കാനാണ് കോൺഗ്രസും ആർഎസ്എസും ശ്രമിക്കുന്നത്. ഞങ്ങൾക്ക് അവകാശം വേണ്ടാ എന്നു പറഞ്ഞു മുദ്രാവാക്യം വിളിക്കുന്നത് കേരളത്തിൽ ആദ്യമായാണ്. തെരഞ്ഞെടുപ്പിൽ ഹിന്ദു വോട്ട് ലക്ഷ്യമിട്ടു നടത്തുന്ന സമരമാണ് ഇപ്പോൾ കേരളത്തിൽ. പിന്നാക്കം നടക്കണമെന്നു പറഞ്ഞു നടക്കുന്ന സമരം. ഇന്ത്യൻ ഭരണഘടനയ്ക്ക് എതിരാണെന്നു പറയാനുള്ള ആർജവം പ്രതിപക്ഷ നേതാവിനുണ്ടോ? ഞങ്ങളൊക്കെ സുപ്രീം കോടതിക്ക് എതിരാണെന്നു പറയാൻ ധൈര്യമുണ്ടോ? അല്ലാതെ സ്ത്രീകളെയിട്ടു കുരുങ്ങു കളിപ്പിക്കരുത്. പട്ടികജാതിക്കാർ ശാന്തിക്കാരായി ഇരിക്കുന്ന കേരളത്തിൽ ഇപ്പോൾ സ്ത്രീകൾക്കു മാത്രമാണ് അശുദ്ധിയെന്നും ശ്രീമതി കൂട്ടിച്ചേർത്തു.