ശബരിമല വിഷയത്തിൽ സുപ്രീം കോടതി വിധിക്കെതിരെ പ്രതിഷേധവും കോലാഹലങ്ങളും നടക്കുന്നതിനിടെ ഇനി താൻ 50 വയസിന് ശേഷം മാത്രമെ സന്നിധാനത്ത് ദർശനത്തിന് വരികയുള്ളൂ.അത് വരെ കാത്തിരിക്കുമെന്ന പ്ളക്കാർഡും പിടിച്ച് ദർശനത്തിനെത്തിയ ഒമ്പത് വയസുകാരിയുടെ ശപഥം വേറിട്ട കാഴ്ചയായി മാറി. തമിഴ്നാട്ടിലെ മധുരയിൽ നിന്നുള്ള ജനനി എന്ന പെൺകുട്ടിയാണ് വെള്ളിയാഴ്ച തന്റെ പിതാവിനും മറ്റ് ബന്ധുക്കൾക്കൊപ്പവും ശബരിമലയിൽ ദർശനം നടത്തിയത്.

സുപ്രീം കോടതി വിധി എന്താണെന്ന് അറിയില്ല.എന്നാൽ മകൾക്ക് പത്ത് വയസായി കഴിഞ്ഞാൽ പിന്നെ അവൾ ശബരിമലയിൽ ദർശനം നടത്തുന്നത് 50 വയസിന് ശേഷമായിരിക്കും. അയ്യപ്പനെ ഞങ്ങൾ സ്‌നഹിക്കുകയും ഇഷ്ടപ്പെടുകയും ചെയ്യുന്നു -- ജനനിയുടെ പിതാവ് ആർ.സതീഷ് കുമാർ പറഞ്ഞു.

ഇന്നലെ ആന്ധ്രയിൽ നിന്നുള്ള മോജോ ടി.വി ലേഖിക കവിത, മോഡലും വനിതാ ആക്ടിവിസ്റ്റുമായ രഹ്ന ഫാത്തിമ എന്നിവർ പൊലീസ് അകമ്പടിയോടെ എത്തിയത് വിവാദമായിരുന്നു. ഇതിൽ കവിതയ്ക്ക് പൊലീസ് കവചവും ഹെൽമറ്റും നൽകിയിരുന്നു. ഇതിന് മുന്പ് ആലപ്പുഴ ചേർത്തല സ്വദേശി ലിബി,​ ന്യൂയോർക്ക് ടൈംസിന്റെ ഡൽഹി ബ്യൂറോ ചീഫ് സുഹാസിനി രാജും ദർശനത്തിന് എത്തിയെങ്കിലും പ്രതിഷേധത്തെ തുടർന്ന് മടങ്ങുകയായിരുന്നു.