ടി.പി.ചന്ദ്രശേഖരന്‍ വധക്കേസിലെ പ്രതിയും സിപിഐഎം ഏരിയ കമ്മിറ്റി അംഗവുമായ പി.കെ.കുഞ്ഞനന്തന് സര്‍ക്കാര്‍ പരോള്‍ നീട്ടി. ആദ്യം പത്തു ദിവസത്തെ പരോളിന് പോയ കുഞ്ഞനന്തന്‍ പിന്നീട് 15 ദിവസം കൂടി നീട്ടി അപേക്ഷ ചോദിച്ചു. ഇപ്പോള്‍ 15 ദിവസം കൂടി വീണ്ടും നീട്ടി ചോദിച്ച അപേക്ഷയില്‍ അനുമതി കിട്ടിയിരിക്കുകയാണ്.

ചുരുക്കി പറഞ്ഞാല്‍ കുഞ്ഞനന്ദന്‍ വീട്ടില്‍ അടുപ്പിച്ച് 40 ദിവസം പരോളില്‍. 2014 ജുവരിയില്‍ ജീവപര്യന്തം ശിക്ഷിച്ച കുഞ്ഞനന്തന് പരോള്‍ ആകെ കിട്ടിയിരിക്കുന്നത് 384 ദിവസമാണ്. ചട്ടലംഘനം നടത്തി പ്രത്യേക പരിഗണന നല്‍കുന്നതിനെ ജയിലിലും പുറത്തുമായി നിരവധി പേര്‍ വിമര്‍ശിക്കുന്നുണ്ടെങ്കിലും സര്‍ക്കാരിന് ഇതൊരു വിഷയമല്ല. നിരവധി തടവുകാരുടെ പരോള്‍ അപേക്ഷ നിലനില്‍ക്കുമ്പോഴാണ് കുഞ്ഞനന്ദന് വീണ്ടും വീണ്ടും പരോള്‍ നല്‍കുന്നത്.

സെപ്തംബര്‍ 21നാണ് ജയില്‍ വകുപ്പ് പത്തു ദിവസത്തെ അടിയന്തര പരോള്‍ കുഞ്ഞനന്തന് അനുവദിച്ചത്. വീട്ടിലെത്തി പരോള്‍ നീട്ടണമെന്ന ആവശ്യത്തിന് 15 ദിവസം കൂടി നീട്ടി നല്‍കി. കഴിഞ്ഞ ആറിന് വീണ്ടും അപേക്ഷ നല്‍കിയതോടെയാണ് 15 ദിവസം കൂടി പരോൾ അനുവദിച്ചിരിക്കുന്നത്.