യുവതീ പ്രവേശം സംബന്ധിച്ച ചാനല്‍ ചര്‍ച്ചകള്‍ വഴിവിട്ട കളികളിലേക്ക്. തിരുവനന്തപുരത്തെ കുണ്ടമണ്‍ കടവിലുള്ള സ്വാമി സന്ദീപാനന്ദ ഗിരിയുടെ വീടിന് നേരെ ആക്രമണം നടന്നു. സംഘപരിവാറും ബി.ജെ.പി സംസ്ഥാന പ്രസിഡന്റ് പി.എസ്.ശ്രീധരന്‍പിള്ളയും രാഹുല്‍ ഈശ്വറും താഴ്മണ്‍ തന്ത്രി കുടുംബവുമാണ് ആക്രമണത്തിന് പിന്നിലെന്നും ഇതുകൊണ്ടൊന്നും ഭയപ്പെട്ട് പിന്മാറില്ലെന്നും നാളെ എന്നെയും ഇതുപോലെ കത്തിച്ചേക്കാമെന്നും സ്വാമി പറഞ്ഞു. അതേ സമയം ശക്തമായ നടപടി സ്വീകരിക്കുമെന്നാണ് സ്ഥലം സന്ദര്‍ശിച്ച മുഖ്യമന്ത്രി പറഞ്ഞത്.

ശബരിമല വിഷയത്തിലെ ചാനല്‍ ചര്‍ച്ചകളില്‍ പ്രേക്ഷകര്‍ ഏറെ ആസ്വദിച്ചതാണ് സന്ദീപാനന്ദഗിരിയും രാഹുല്‍ ഈശ്വറും ഭാര്യ ദീപയും തമ്മിലുള്ള ചര്‍ച്ചകള്‍. സന്ദീപാനന്ദഗിരി ശബരിമലയിലെ യുവതീ പ്രവേശനത്തെ അനുകൂലിച്ച് പറഞ്ഞപ്പോള്‍ സന്ദീപാനന്ദ ഗിരിയുടെ പൊള്ളത്തരങ്ങള്‍ രാഹുല്‍ ഈശ്വറും ദീപയും പൊളിച്ചടുക്കിയിരുന്നു. മുമ്പ് സ്വാമി അമേരിക്കയില്‍ പ്രസംഗിച്ച ഒരു വീഡിയോ ലൈവില്‍ അവര്‍ കാണിച്ചു. അന്ന് ശബരിമലയില്‍ സ്ത്രീ പ്രവേശനം പാടില്ലെന്നാണ് പറഞ്ഞിരുന്നത്. സ്വാമി കാഷായ വേഷം ഊരിവയ്ക്കണമെന്നും ഹിന്ദുക്കള്‍ക്ക് അപമാനമാണെന്നും രാഹുല്‍ വാദിച്ചു. ഇതോടെ ലൈവില്‍ സ്വാമി വിയര്‍ത്തു. ഇതോടെ വ്യക്തിപരമായ ആരോപണത്തിലേക്ക് സ്വാമി പോയി.

ഇതില്‍ ഏറ്റവും വിവാദമായിരുന്നു മാതൃഭൂമി ന്യൂസില്‍ നടന്ന 'ഞങ്ങള്‍ക്കും പറയാനുണ്ട്' എന്ന പരിപാടി. ഇതില്‍ ദീപ രാഹുല്‍ ഈശ്വരും സ്വാമിയും പങ്കെടുത്തിരുന്നു. ആചാരങ്ങളെ കുറിച്ച് തന്നെ ആയിരുന്നു ദീപ ഊന്നിപ്പറഞ്ഞിരുന്നത്. എന്നാല്‍ അതേ ആചാരങ്ങളുടെ പേരില്‍ സന്ദീപാനന്ദ ഗിരി ദീപയെ ചോദ്യം ചെയ്യുകയായിരുന്നു.

നിയന്ത്രണം വിട്ട സ്വാമി ചോദിച്ചത് രാഹുല്‍ ഈശ്വര്‍ ദീപയെ വേളി കഴിക്കുകയായിരുന്നോ, സംബന്ധം ചെയ്യുകയായിരുന്നോ അതോ വിവാഹം കഴിക്കുക ആയിരുന്നോ എന്നാണ്. രാഹുല്‍ ഈശ്വര്‍ ഒരു നമ്പൂതിരിയാണല്ലോ. നമ്പൂതിരിയായ ഒരാള്‍ നായര്‍ സ്ത്രീയെ വിവാഹം കഴിക്കുക എന്നല്ല സംബന്ധം കഴിക്കുക എന്നാണ് പറയുക. അതാണ് ആചാരം. ആചാരത്തെ മുറുകെ പിടിക്കുകയാണെങ്കില്‍ എന്തുകൊണ്ടാണ് നിങ്ങള്‍ സംബന്ധം എന്ന ആചാരത്തെ മുറുകെ പിടിക്കാത്തത് എന്നായി സന്ദീപാനന്ദ ഗിരി.


ഇത് ദീപയ്ക്ക് ശരിക്കും കൊണ്ടു. ദീപ സ്വാമിയെ ശരിക്കും കളിയാക്കി. സന്ദീപാനന്ദ ഗിരിയെ അങ്ങനെ വിളിക്കാന്‍ ബുദ്ധിമുട്ടുണ്ട് എന്നാണ് ദീപ പറയുന്നത്. പകരം ഷിബു എന്ന് വിളിച്ചു. അപ്പോള്‍ തന്റെ പൂര്‍വ്വാശ്രമത്തിലെ പേര് വെളിപ്പെടുത്തുന്നുണ്ട് സന്ദീപാനന്ദ ഗിരി. തുളസീദാസ് എന്നാണ് തനിക്ക് അച്ഛനും അമ്മയും ഇട്ട പേര്.

താന്‍ അഭിമാനമുള്ള ഒരു നായര്‍ സ്ത്രീയാണ്. ആറ്റുകാല്‍ ദേവീ ക്ഷേത്രത്തില്‍ വച്ചാണ് രാഹുല്‍ ഈശ്വര്‍ തന്നെ അഭിമാനമായി വിവാഹം കഴിച്ചു. അതില്‍ എന്താണ് തെറ്റ് എന്നായി ദീപ. അത് വിവാഹമല്ല ആചാരത്തെ കുറിച്ച് പറയുകയാണെങ്കില്‍, നമ്പൂതിരി ഒരു നായര്‍ സ്ത്രീയെ വിവാഹം കഴിച്ചാല്‍ അത് വിവാഹം അല്ല. അത് സംബന്ധം ആണ്. പക്ഷേ, രാഹുല്‍ ഈശ്വര്‍ തന്നെ വിവാഹം കഴിച്ചു എന്ന് പറയുമ്പോള്‍ കാലം മാറിയതിനേയും നിയമ വ്യവസ്ഥയേയും നിങ്ങള്‍ അംഗീകരിക്കുകയാണ് ചെയ്തിരിക്കുന്നത് എന്നും സന്ദീപാനന്ദ ഗിരി പറയുന്നുണ്ട്.

തങ്ങളുടേത് വിവാഹം ആണോ എന്ന കാര്യം ആര് അംഗീകരിച്ചാലും ഇല്ലെങ്കിലും കുഴപ്പമില്ലെന്നാണ് ദീപയുടെ പക്ഷം. തങ്ങള്‍ക്ക് ഒരു മകന്‍ ഉണ്ടെന്നും തങ്ങള്‍ സുഖമായി ജീവിക്കുന്നുണ്ട് എന്നും പറയുന്നു.

ശനിയാഴ്ച പുലര്‍ച്ചെയോടെയാണ് കുണ്ടമണ്‍ കടവിലെ ആശ്രമം അജ്ഞാതസംഘം ആക്രമിച്ചത്. അക്രമികള്‍ ആശ്രമത്തിന് മുമ്പിലുണ്ടായിരുന്ന രണ്ട് കാറുകളും ഒരു ബൈക്കും തീയിട്ട് നശിപ്പിക്കുകയും ആശ്രമത്തിന് മുമ്പില്‍ റീത്ത് വെക്കുകയും ചെയ്തു. ഫയര്‍ഫോഴ്‌സ് എത്തിയാണ് തീയണച്ചത്. തീ പടര്‍ന്ന് ആശ്രമത്തിലെ കോണ്‍ക്രീറ്റടക്കം ഇളകി നാശനഷ്ടമുണ്ടായിട്ടുണ്ട്.