സി.പി.എമ്മിനും പിണറായിക്കും സുപ്രീംകോടതിക്കും എതിരെ ആഞ്ഞടിച്ച് അമിത് ഷാ, എന്ത് വന്നാലും അയ്യപ്പഭക്തര്ക്കൊപ്പം നില്ക്കുമെന്നും എന്.എസ്.എസിന്റെ സമരത്തില് അണിചേരണമെന്നും ആഹ്വാനം, പാര്ട്ടി പ്രവര്ത്തകര്ക്ക് ആവേശമായി കണ്ണൂരിലെ പ്രസംഗം, ശബരിമല വിഷയത്തിലൂടെ പാര്ട്ടിക്ക് ശക്തമായ അടിത്തറ കെട്ടിപ്പടുക്കുകയാണ് ലക്ഷ്യം
ശബരിമല വിഷയത്തില് ബി.ജെ.പിയുടെ ശക്തി തെളിയിച്ച്, കേരളം പിടിച്ചെടുക്കാന് ദേശീയനേതൃത്വം തീരുമാനിച്ചു. പാര്ട്ടി അധ്യക്ഷന് അമിത്ഷാ കണ്ണൂരില് ആഞ്ഞടിച്ച് നടത്തിയ പ്രസംഗം ഇത് വ്യക്തമാക്കുന്നു. സുപ്രീംകോടതിയേയും സംസ്ഥാന സര്ക്കാരിനേയും മുഖ്യമന്ത്രി പിണറായി വിജയനേയും പ്രസംഗത്തിലുടനീളം അമിത് ഷാ കടന്നാക്രമിച്ചു. അതേസമയം അയ്യഭക്തര്ക്ക് പിന്തുണയും നല്കി. പാര്ട്ടി ദേശീയ നേതൃത്വം മുഴുവനും ഭക്തര്ക്കൊപ്പം ഉണ്ടാകുമെന്നും ഉറപ്പ് നല്കി. ഭൂരിപക്ഷ ഹിന്ദു സമുദായങ്ങളെ ഒപ്പം നിര്ത്തി പാര്ട്ടിയെ ശക്തിപ്പെടുത്തുകയും അതോടൊപ്പം വരുന്ന ലേക്സഭാ തെരഞ്ഞെടുപ്പില് മികച്ച വിജയം ഉറപ്പാക്കുകയുമാണ് പാര്ട്ടിയുടെ ലക്ഷ്യമെന്ന് ഉറപ്പാക്കുന്നതായിരുന്നു അമിത്ഷായുടെ കണ്ണൂരിലെ പ്രസംഗം.
ശബരിമലയിലെ അക്രമങ്ങളുടെ മറവില് ഭക്തരെ അടിച്ചമര്ത്താനാണ് സര്ക്കര് ശ്രമിക്കുന്നതെന്ന പ്രസ്താവന ബി.ജെ.പി- ആര്.എസ്.എസ് പ്രവര്ത്തകര്ക്ക് മാത്രമല്ല സകല ഭക്തര്ക്കും ഊര്ജ്ജമാണ് പകരുന്നത്. പ്രത്യേകിച്ച് ശബരിമല സമരത്തില് ബി.ജെ.പിയുടെ പരിപാടിയില് പങ്കെടുത്ത രാമന് നായരെ കോണ്ഗ്രസ് സസ്പെന്ഡ് ചെയ്യുകയും അദ്ദേഹം ബി.ജെ.പിയില് ചേരാന് തയ്യാറാണെന്ന വ്യക്തമായ സൂചനകള് പുറത്ത് വരുകയും ചെയ്ത പശ്ചാത്തലത്തില്. ഭക്തര് ബി.ജെ.പിക്കും എന്.എസ്.എസിനും ഒപ്പം സമരത്തില് അണിനിരക്കണമെന്ന അമിത്ഷായുടെ ആഹ്വാനം കൃത്യമായ ലക്ഷ്യത്തോടെയാണ്. എസ്.എന്.ഡി.പിയും കെ.പി.എം.എസിലെ ഒരു വിഭാഗവും ബി.ജെ.പിക്കൊപ്പം സഹകരിച്ചപ്പോവും എന്.എസ്.എസ് അതിന് തയ്യാറായില്ല.
ഇപ്പോള് ശബരിമല വിധിക്കെതിരെയും അത് നടപ്പാക്കുന്ന സര്ക്കാരിനെതിരെയും എന്.എസ്.എസ് നടത്തുന്ന സമരത്തിന് ബി.ജെ.പി പിന്തുണ നല്കുന്നത് വഴി എന്.എസ്.എസ് നേതൃത്വവുമായി അടുക്കുകയാണ് ലക്ഷ്യം. എന്നാലത് എത്രത്തോളം വിജയം നേടുമെന്ന് കാത്തിരുന്ന് കാണാം. സര്ക്കാരിനും മുഖ്യമന്ത്രിക്കും പൊലീസിനും എതിരെ ആഞ്ഞടിച്ചതിലൂടെ ഭക്തരെ പാര്ട്ടിക്കൊപ്പം അണിനിരത്തി അടിത്തറ ശക്തിപ്പെടുത്തുകയാണ് ലക്ഷ്യമിടുന്നത്. അമിത് ഷായും മോദിയും പഠിച്ച പണി പതിനെട്ടും പയറ്റിയിട്ടും കേരളത്തില് ശക്തമായ ചലനം ഉണ്ടാക്കാന് സാധിച്ചിരുന്നില്ല. ഇതേ തുടര്ന്ന് കേരളത്തിലെ നേതാക്കന്മാരെ രണ്ട് പേരും പലതവണ ശാസിച്ചിരുന്നു.
എന്നാല് ശബരിമല വിഷയത്തിലൂടെ ഹിന്ദുജനവിഭാഗത്തിന്റെ മനസില് ഇടംതേടുകയാണ് ബി.ജെ.പി ലക്ഷ്യം. സി.പി.എമ്മിനൊപ്പം കോണ്ഗ്രസിനെതിരെയും അമിത് ഷാ ആഞ്ഞടിച്ചത് ശ്രദ്ധേയമാണ്. മുമ്പ് ആറ്റുകാല് ക്ഷേത്രത്തിലെ കുത്തിയോട്ടം സംബന്ധിച്ച വിവാദത്തില് ബി.ജെ.പി ഇടപെട്ട് വിവാദം ഉണ്ടാക്കാന് ശ്രമിച്ചെങ്കിലും അപകടം മണത്തറിഞ്ഞ സി.പി.എം ദേവസ്വം മന്ത്രി കടകംപള്ളി സുരേന്ദ്രനെ കളത്തിലിറക്കി പ്രതിരോധം തീര്ത്തിരുന്നു.
https://www.facebook.com/Malayalivartha
