സ്വാമി സന്ദീപാനന്ദ ഗിരിക്കു നേരെ നടന്ന ആക്രമണത്തില്‍ ശക്തമായി അപലപിക്കുന്നുവെന്ന് ആരോഗ്യ സാമൂഹ്യനീതി വനിത ശിശു വികസന വകുപ്പ് മന്ത്രി കെ.കെ. ശൈലജ ടീച്ചര്‍. ആസൂത്രിതമായ ഒരു കൊലപാതക ശ്രമമാണ് നടന്നതെന്ന് ഇവിടം സന്ദര്‍ശിച്ചാല്‍ മനസിലാകും. സ്വാമിക്കു നേരെ മുമ്പും ഇതുപോലെയുള്ള ആക്രമണങ്ങള്‍ നടന്നിരുന്നുവെന്നും മന്ത്രി പറഞ്ഞു. സ്വാമി സന്ദീപാനന്ദ ഗിരിയുടെ ആശ്രമം സന്ദര്‍ശിച്ച ശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു മന്ത്രി.

കടുത്ത വര്‍ഗീയ വാദികള്‍ നമ്മുടെ സമൂഹത്തിന്റെ മതേതരത്വവും സുഖകരവും സമാധാന പൂര്‍ണവുമായിട്ടുള്ള ജീവിതവും തകര്‍ക്കുന്നതിനു വേണ്ടി ശ്രമിക്കുന്നതിനിടയില്‍ സ്വാമിയെപ്പോലുള്ളവര്‍ സമൂഹത്തിന് ആശ്വാസമേകുന്നതാണെന്നും മന്ത്രി പറഞ്ഞു. അവര്‍ക്കെതിരെ നടക്കുന്ന അക്രമങ്ങള്‍ കണ്ടില്ലെന്ന് നടിക്കാന്‍ പാടില്ല. കേരളം എങ്ങോട്ടാണ് പോകുന്നതെന്ന് എല്ലാവരും വളരെ ഗൗരവമായി ചിന്തിക്കേണ്ട ഒരു സമയമാണെന്നും മന്ത്രി വ്യക്തമാക്കി.

സ്ത്രീകളുടെ അവകാശങ്ങള്‍ നിഷേധിക്കുന്നതിനെതിരെ സ്വാമി നടത്തിയ ചില ഇടപെടലുകളാണ് ചിലര്‍ക്ക് പ്രകോപനമുണ്ടാക്കിയത് എന്നുവേണം കരുതാന്‍. സ്ത്രീകളുടെയും കുട്ടികളുടെയും അവകാശ സംരക്ഷണം കൈകാര്യം ചെയ്യുന്ന ഒരു വ്യക്തിയെന്ന നിലയില്‍ ഇതംഗീകരിക്കാന്‍ കഴിയില്ല. അക്രമികള്‍ക്കെതിരെ കടുത്ത നടപടിയെടുക്കണമെന്നും മന്ത്രി വ്യക്തമാക്കി.

ശബരിമലയില്‍ സുപ്രീം കോടതി വിധി നടപ്പിലാക്കാന്‍ മാത്രമേ സര്‍ക്കാര്‍ ശ്രമിച്ചിട്ടുള്ളൂ. സ്ത്രീകളെ ബലപ്രയോഗത്തിലൂടെ കയറ്റിവിടാന്‍ സര്‍ക്കാര്‍ ശ്രമിച്ചിട്ടില്ല. പക്ഷേ അവകാശനിഷേധം അനുവദിക്കാന്‍ സര്‍ക്കാര്‍ തയ്യാറല്ല. കേരളത്തെ സംബന്ധിച്ചിടത്തോളം സമൂഹത്തിന് നിരക്കാത്ത ഒട്ടേറെ അനാചാരങ്ങള്‍ ഉപേക്ഷിച്ച നാടാണ്.

സ്വാമി വിവേകാനന്ദനും ശ്രീനാരായണ ഗുരുദേവനും സഹോദരന്‍ അയ്യപ്പനും അയ്യങ്കാളിയും അടക്കമുള്ള സാമൂഹ്യപരിഷ്‌കര്‍ത്താക്കളുടെ ധീരമായ പ്രവര്‍ത്തനങ്ങളുടെ അനന്തരഫലമാണ് ഇന്ന് കേരള സമൂഹത്തില്‍ വന്നിട്ടുള്ള പുരോഗമനം. ഇതാണ് ജാതിക്കും മതത്തിനും അതീതമായി നമുക്ക് പൊരുതാന്‍ ഊര്‍ജം നല്‍കിയത്. അത്തരത്തിലുള്ള പ്രവര്‍ത്തനങ്ങളാണ് സ്വാമി സന്ദീപാനന്ദ ഗിരിയും നടത്തിക്കൊണ്ടിരിക്കുന്നത്.

സമാധാനപരമായി ജീവിതം നയിക്കുന്ന കേരള സമൂഹത്തെ വര്‍ഗീയതയിലേക്ക് ആരും നയിക്കരുത്. മാത്രമല്ല ഭക്തി അക്രമത്തിന്റെ വഴിയില്‍ പോകരുതെന്നും മന്ത്രി വ്യക്തമാക്കി.