കെ.എം ഷാജിയുടെ നിയമസഭാ അംഗത്വം ഇല്ലാതായെന്ന് ഉത്തരവിറക്കിയ നിയമസഭാ സെക്രട്ടറിയും അതിന് കുടപിടിച്ച സ്പീക്കറും വെട്ടിലായി. ഷാജി എം.എല്‍.എയെ അയോഗ്യനാക്കിയ ഹൈക്കോടതി ഉത്തരവ് സുപ്രീംകോടതി സ്‌റ്റേ ചെയ്തതോടെയാണ് സെക്രട്ടറിയുടെയും സ്പീക്കറുടെയും രാഷ്ട്രീയക്കളിക്ക് തിരിച്ചടിയായത്. ഷാജിക്ക് നിയമസഭാ സമ്മേളനത്തില്‍ പങ്കെടുക്കാമെന്ന് ഉപാധികളോടെ സുപ്രീംകോടതി സ്‌റ്റേ അനുവദിച്ചു. അംഗമല്ലെന്ന് ഉത്തരവിറക്കിയ സെക്രട്ടറി ഇനി എന്തിന്റെ അടിസ്ഥാനത്തിലാവും കെ.എം ഷാജിയെ നിയമസഭയില്‍ പ്രവേശിപ്പിക്കുക എന്ന വലിയ ചോദ്യം നിലനില്‍ക്കുന്നുണ്ട്. ഇത് രാഷ്ട്രീയമായി സി.പി.എമ്മിനും നിയമപരമായി സര്‍്ക്കാരിനും സ്പീക്കര്‍ക്കും നിയമസഭാ സെക്രട്ടറിക്കും തിരിച്ചടിയാകും. 

താന്‍ നിയമസഭാംഗമല്ലെന്ന് ഉത്തരവിറക്കാന്‍ നിയമസഭാ സെക്രട്ടറിക്ക് അധികാരമില്ലെന്ന് കെ.എം ഷാജി പറയുന്നു. നാളെ താന്‍ സഭയില്‍ വരുമ്പോള്‍ വീണ്ടും സത്യപ്രതിജ്ഞ ചെയ്യേണ്ടിവരുമോ എന്നും ചോദിക്കുന്നു. അതിനാല്‍ ഇക്കാര്യത്തില്‍ നിയമസഭാ സെക്രട്ടറിയും സ്പീക്കറും അനാവശ്യ തിടുക്കം കാട്ടിയെന്ന് വ്യക്തമാണ്. ഇത് മനസിലായതോടെ സെക്രട്ടറി ഷാജി യോഗ്യനാണെന്ന് വീണ്ടും ഉത്തരവിറക്കാന്‍ തീരുമാനിച്ചു. സുപ്രീംകോടതി ഷാജിയുടെ അയോഗ്യത സ്‌റ്റേ ചെയ്ത ഉത്തരവ് ലഭിച്ചതിന് ശേഷമായിരിക്കും ഇത്. ഹൈക്കോടതിയുടെ സ്‌റ്റേയ്ക്ക് എതിരെ ഷാജി ആദ്യം സുപ്രീംകോടതിയെ സമീപിച്ചെങ്കിലും സ്റ്റേ അനുവദിച്ചില്ല, പകരം നിയമസഭയില്‍ പങ്കെടുക്കാമെന്ന് വാക്കാല്‍ പരാമര്‍ശം നടത്തി. 

വാക്കാലുള്ള പരാമര്‍ശം അംഗീകരിക്കില്ലെന്നും ഉത്തരവില്ലാതെ സഭയില്‍ പ്രവേശിക്കാനാവില്ലെന്നും സ്പീക്കര്‍ പറഞ്ഞിരുന്നു. അതിനിടെ ഹൈക്കോടതി അനുവദിച്ച ഇടക്കാല സ്‌റ്റേ അവസാനിച്ചു. തുടര്‍ന്നാണ് ഷാജി നിയമസഭാ അംഗമല്ലെന്ന് കാണിച്ച് സെക്രട്ടറി വി.കെ ബാബു പ്രകാശ് ഉത്തരവിറക്കിയത്. അതിനാല്‍ നാളെ നിയമസഭ ചേരുമ്പോള്‍ ഇത് വലിയ പ്രതിഷേധങ്ങള്‍ക്ക് ഇടയാക്കും. സ്റ്റേ ഉത്തരവിന്റെ അറ്റസ്റ്റ് ചെയ്ത കോപ്പി സുപ്രീംകോടതിയില്‍ നിന്ന് ലഭിക്കാന്‍ താമസമെടുക്കും. അതിനാല്‍ ഷാജി യോഗ്യനാണെന്ന ഉത്തരവിറക്കാന്‍ വൈകുമെന്നാണ് അറിയുന്നത്. അങ്ങനെയെങ്കില്‍ അതും പ്രതിഷേധത്തിന് ഇടയാക്കും.