ശബരിമലയിലെ നിയന്ത്രണങ്ങള്‍ എടുത്ത് കളയാനാകില്ലെന്നും അവിടെ അക്രമഭീഷണി നിലനില്‍ക്കുന്നുണ്ടെന്നും മുഖ്യമന്ത്രി നിയമസഭയില്‍ അറിയിച്ചു. ശബരിമലയില്‍ അറസ്റ്റിലായത് ആര്‍.എസ്.എസ്, ബി.ജെ.പി പ്രവര്‍ത്തകരാണ്. 58 കേസുകളിലായി 320 പേര്‍ അറസ്റ്റിലായി. അക്രമികള്‍ നാമം ജപിച്ചത് കൊണ്ട് അക്രമികളല്ലാതാവില്ലെന്നും അടിയന്തരപ്രമേയ നോട്ടീസിന് മറുപടിയായി മുഖ്യമന്ത്രി വ്യക്തമാക്കി.

സ്ത്രീപ്രവേശനം സംബന്ധിച്ച യുഡിഎഫ് നിലപാടിന് രാഷ്ട്രീയലക്ഷ്യമുണ്ട്. യഥാര്‍ത്ഥ ഭക്തര്‍ക്കുള്ള സുരക്ഷ ഒരുക്കുകയാണ് സര്‍ക്കാര്‍ ചെയ്യുന്നത്. സുപ്രീംകോടതി വിധി നടപ്പാക്കേണ്ട ഉത്തരവാദിത്വം സര്‍ക്കാരിനുണ്ട്. വിധി എന്തുതന്നെയായാലും നടപ്പിലാക്കുമെന്നും മുഖ്യമന്ത്രി ആവര്‍ത്തിച്ചു. നിയമപ്രകാരമുള്ള നടപടി സ്വീകരിക്കേണ്ട ബാധ്യതയുണ്ട്. അത് ചെയ്യുകയാണ്. ക്രമസമാധാനനില തകര്‍ക്കുമ്പോള്‍ അത് നിലനിര്‍ത്തേണ്ട ബാധ്യത സര്‍ക്കാരിനുണ്ട്.

നിരോധനാജ്ഞ പ്രഖ്യാപിക്കണമെന്നും സാമൂഹ്യമാധ്യമങ്ങളിലൂടെയുള്ള പ്രതരണങ്ങള്‍ നിയന്ത്രിക്കണമെന്നും കേന്ദ്രസര്‍ക്കാര്‍ മുന്നറിയിപ്പ് നല്‍കിയിട്ടുണ്ട്. ഇപ്പോള്‍ അയോധ്യയിലും നിരോധനാജ്ഞ പ്രഖ്യാപിച്ചിട്ടുണ്ട്. നിരോധനാജ്ഞ തുടരാമെന്ന് ഹൈക്കോടതിയും പറഞ്ഞു. സര്‍ക്കാര്‍ ചോദിച്ച് വാങ്ങിയ വിധിയല്ല. നിയന്ത്രണങ്ങള്‍ ഭക്തര്‍ക്ക് വേണ്ടിയാണ്. അയോധ്യയില്‍ എടുത്ത നിലപാട് തന്നെയാണ് ആര്‍എസ്എസും ബിജെപിയും ശബരിമലയില്‍ സ്വീകരിച്ചത്. സന്നിധാനത്ത് ചോരവീഴാതെ സമാധാന അന്തരീക്ഷം സൃഷ്ടിക്കാനാണ് സര്‍ക്കാര്‍ ശ്രമിക്കുന്നത്. വിശ്വാസികളെ എതിര്‍ക്കുകയല്ല സംരക്ഷിക്കുകയാണ് സര്‍ക്കാര്‍ ലക്ഷ്യം. വിശ്വാസികളുടെ മറവില്‍ ചിലര്‍ അക്രമങ്ങള്‍ നടത്തിയെന്നും മുഖ്യമന്ത്രി പറഞ്ഞു.

ദര്‍ശനത്തിനെത്തുന്നവര്‍ക്ക് സൗകര്യമൊരുക്കേണ്ടത് സര്‍ക്കാരിന്റെ ബാധ്യതയാണെന്നും മുഖ്യമന്ത്രി പറഞ്ഞു. നിയന്ത്രണങ്ങള്‍ പിന്‍വലിക്കണമെന്ന പ്രതിപക്ഷ ആവശ്യം അദ്ദേഹം തള്ളി. കോണ്‍ഗ്രസിനെ തകര്‍ക്കാന്‍ സി.പി.എം ബി.ജെ.പിയുമായി ചേര്‍ന്ന് ഒത്തുകളിക്കുകയാണെന്ന് പ്രതിപക്ഷം ആരോപിച്ചെങ്കിലും നിങ്ങള്‍ തമ്മിലാണ് ഒത്തുകളിയെന്ന് മുഖ്യമന്ത്രി മറുപടി നല്‍കി. ശബരിമലയിലെ അനാവശ്യനിയന്ത്രണങ്ങളെ കുറിച്ച് ചര്‍ച്ച ചെയ്യണമന്നാവശ്യപ്പെട്ട് പ്രതിപക്ഷം നല്‍കണമെന്ന പ്രതിപക്ഷത്തിന്റെ അടിയന്തരപ്രമേയ നോട്ടിസിന് നേരത്തെ സ്പീക്കര്‍ അനുമതി നല്‍കി. എന്നാല്‍ പ്രമേയം അവതരിപ്പിക്കാന്‍ അനുമതി നല്‍കിയേക്കില്ല.

യുവതീപ്രവേശനത്തെ അനുകൂലിച്ച പ്രതിപക്ഷ പാര്‍ട്ടികള്‍ പന്തളം കൊട്ടാരവും തന്ത്രി കുടുംബവും ആളുകളെ തെരുവിലിറക്കിയതോടെയാണ് ഇവര്‍ നിലപാട് മാറ്റിയതെന്നും മുഖ്യമന്ത്രി പറഞ്ഞു. യുവതികള്‍ ദര്‍ശനത്തിനെത്തിയാല്‍ സൗകര്യമൊരുക്കേണ്ടത് സര്‍ക്കാരിന്റെ ഉത്തരവാദിത്തമാണ്. പൊലീസ് ശക്തമായ നടപടി എടുത്തത് കൊണ്ടാണ് ചിത്തിര ആട്ടസമയത്ത് ഉണ്ടായത് പോലുള്ള അക്രമങ്ങള്‍ മണ്ഡലകാലത്ത് ഉണ്ടാകാതിരുന്നത്. ആചാരംസംരക്ഷിക്കാന്‍ എത്തിയവര്‍ പരസ്യമായ ആചാരലംഘനവും ശബരിമലയില്‍ നടത്തിയെന്നും മുഖ്യമന്ത്രി പറഞ്ഞു. 

ശബരിമലയില്‍ ഇതുവരെ 58 കേസുകള്‍ രജിസ്റ്റര്‍ ചെയ്‌തെന്നും ഇതുമായി ബന്ധപ്പെട്ട് 320 പേരെ അറസ്റ്റ് ചെയ്‌തെന്നും മുഖ്യമന്ത്രി നിയമസഭയില്‍ അറിയിച്ചു . ക്ഷേത്രം അടച്ചിടുമെന്ന് ഭീഷണിപ്പെടുത്തി വിശ്വാസികളുടെ ആരാധനാ സ്വാതന്ത്ര്യം തടസപ്പെടുത്തിയ തന്ത്രിക്കെതിരെയുള്ള നടപടി ദേവസ്വം ബോര്‍ഡിന്റെ പരിഗണനയിലാണെന്നും മുഖ്യമന്ത്രി പറഞ്ഞു.