കോടതിവിധികള്‍ നടപ്പാക്കുന്നതിലെ സര്‍ക്കാരിന്റെ ഇരട്ടത്താപ്പിനെതിരെ ഹൈക്കോടതിയുടെ രൂക്ഷവിമര്‍ശനം. ശബരിമലയില്‍ ആയിരക്കണക്കിന് പൊലീസിനെ വിന്യസിച്ച് യുവീപ്രവേശനം നടപ്പാക്കാനൊരുങ്ങുന്ന സര്‍ക്കാര്‍ എന്ത് കൊണ്ട് പിറവം പള്ളിയെ സംബന്ധിച്ച സുപ്രീംകോടതി വിധി നടപ്പാക്കുന്നില്ലെന്ന് ഹൈക്കോടതി ചോദിച്ചു. സര്‍ക്കാരിന്റെ ന്യായങ്ങള്‍ സാധാരണക്കാര്‍ക്ക് മനസിലാകുന്നില്ല.

പിറവം പള്ളിയില്‍ 200 പേര്‍ക്ക് പ്രാര്‍ത്ഥന നടത്താന്‍ സംരക്ഷണം നല്‍കണമെന്ന് ആവശ്യപ്പെട്ട് ഓര്‍ത്തഡോക്‌സ് സഭ നല്‍കിയ ഹര്‍ജിയിലാണ് വിമര്‍ശനം. സര്‍ക്കാരിന്റെ അജണ്ട നടപ്പാക്കാന്‍ കോടതിയെ കൂട്ടുപിടിക്കേണ്ടെന്നും കോടതി എ.ജിയോട് പറഞ്ഞു. ശബരിമലയില്‍ ആയിരക്കണക്കിന് പൊലീസുകാരെ വിന്യസിക്കുന്നവര്‍ക്ക് 200 പേര്‍ക്ക് സംരക്ഷണം നല്‍കിക്കൂടേ എന്നും കോടതി ചോദിച്ചു. 

യാക്കോബായ വിഭാഗത്തിന്റെ നിയന്ത്രണത്തില്‍ ഉള്ള പിറവം പള്ളിയില്‍ 1934 ലെ മലങ്കര സഭയുടെ ഭരണഘടന പ്രകാരം ഭരണനിര്‍വഹണം വേണം എന്ന് ഏപ്രില്‍ 19 ന് ആണ് സുപ്രിം കോടതി വിധിച്ചത്. എന്നാല്‍ ഈ വിധി നടപ്പിലാക്കാന്‍ സംസ്ഥാന സര്‍ക്കാര്‍ സഹായിച്ചില്ലെന്ന് ചൂണ്ടിക്കാട്ടി ് ഓര്‍ത്തോഡോക്‌സ് വിഭാഗം സുപ്രിം കോടതിയില്‍ കോടതിയലക്ഷ്യ ഹര്‍ജി ഫയല്‍ ചെയ്തിരുന്നു. സര്‍ക്കാരിനെതിരെ കോടതിയലക്ഷ്യ ഹര്‍ജി എടുക്കാനാവില്ലെന്ന് കഴിഞ്ഞയാഴ്ച സുപ്രീംകോടതി വ്യക്തമാക്കിയിരുന്നു. ആരാധനാലയങ്ങളില്‍ സമ്പത്ത് കുമിഞ്ഞ്കൂടുന്നതോടെയാണ് അധികാരത്തര്‍ക്കം ഉണ്ടാകുന്നതെന്നും കോടതി പറഞ്ഞിരുന്നു.

ഓര്‍ത്തോഡോക്‌സ് യാക്കോബായ പള്ളി തര്‍ക്കം പരിഹരിക്കാന്‍ ചര്‍ച്ച നടക്കുന്നതിനാല്‍ കോടതി വിധി നടപ്പിലാക്കാന്‍ സമയപരിധി നിര്‍ദേശിക്കരുതെന് സര്‍ക്കാര്‍ നവംബര്‍ രണ്ടിന് സുപ്രിം കോടതിയില്‍ ആവശ്യപ്പെട്ടിരുന്നു. എന്നാല്‍ ശബരിമല യുവതീപ്രവശനം സംബന്ധിച്ച് റിവ്യൂഹര്‍ജിയോ, സാവകാശ ഹര്‍ജിയോ നല്‍കാന്‍ സര്‍ക്കാര്‍ തയ്യാറായില്ല. ഇതിനെതിരെ വ്യാപകമായ പ്രതിഷേധമാണ് ഉയര്‍ന്നത്. പ്രളയത്തില്‍ തകര്‍ന്ന പമ്പയുടെ ശോച്യാവസ്ഥ ചൂണ്ടിക്കാട്ടി സാവകാശ ഹര്‍ജി നല്‍കണമെന്ന് പന്തളം കൊട്ടാരം നിര്‍വാഹകസമിതി ഉള്‍പ്പെടെ ആവശ്യപ്പെട്ടിരുന്നു. അതിനൊന്നും തുടക്കത്തില്‍ മുഖ്യമന്ത്രി തയ്യാറായില്ല. റിവ്യൂഹര്‍ജി നല്‍കുമെന്ന് പറഞ്ഞ ദേവസ്വംബോര്‍ഡ് പ്രസിഡന്റിനെതിരെ വിമര്‍ശനവും നടത്തി.