സനൽ കുമാർ വധക്കേസ്; മൃതദേഹത്തിന് മദ്യത്തിന്റെ മണം ; മൃതദേഹത്തിൽ മദ്യത്തിന്റെ മണം ഉണ്ടായിരുന്നതായി പോസ്റ്റുമോർട്ടം റിപ്പോർട്ട്; മദ്യം ഉള്ളില് ചെന്നിട്ടുണ്ടോ എന്ന് വ്യക്തമാകണമെങ്കില് ആന്തരികാവയവ റിപ്പോര്ട്ട് ലഭിക്കണമെന്ന് ക്രൈംബ്രാഞ്ച്
നെയ്യാറ്റിന്കരയില് കൊല്ലപ്പെട്ട സനല്കുമാറിന്റെ പോസ്റ്റ്മോർട്ടം റിപ്പോർട്ട് പുറത്ത്. സനൽകുമാറിന്റെ മൃതദേഹത്തിൽ മദ്യത്തിന്റെ മണം ഉണ്ടായിരുന്നതായാണ് പോസ്റ്റുമോർട്ടം റിപ്പോർട്ട്. എന്നാൽ ആമാശയത്തിൽ മദ്യമുണ്ടായിരുന്നില്ലെന്നും കണ്ടെത്തൽ. അതേസമയം സനലിനെ പോലീസ് ആശുപത്രിയിലേക്ക് കൊണ്ടുപോകും വഴി മദ്യം കുടിപ്പിച്ചിരുന്നുവെന്ന് നാട്ടുകാർ ആരോപിച്ചിരുന്നു. മദ്യം ഉള്ളില് ചെന്നിട്ടുണ്ടോ എന്ന് വ്യക്തമാകണമെങ്കില് ആന്തരികാവയവ റിപ്പോര്ട്ട് ലഭിക്കണമെന്ന് ക്രൈംബ്രാഞ്ച് വ്യക്തമാക്കി.
നവംബര് ആറിനാണ് നെയ്യാറ്റിന്കരയിലെ സനല് കുമാറിനെ ഡിവൈഎസ്പി ഹരികുമാര് കാറിന് മുന്നിലേക്ക് തള്ളിയിട്ട് കൊലപ്പെടുത്തിയത്. തുടര്ന്ന് ഒളിവില് പോയ കേസിലെ മുഖ്യപ്രതി ഹരികുമാറിനെ പിന്നീട് സ്വവസതിയില് മരിച്ച നിലയില് കണ്ടെത്തുകയായിരുന്നു. മുന്കൂർ ജാമ്യ ഹര്ജി കോടതി പരിഗണിക്കാനിരിക്കെയാണ് ഹരികുമാറിനെ മരിച്ച നിലയില് കണ്ടെത്തിയത്. ഹരികുമാറിന്റെ ആത്മഹത്യയ്ക്ക് പിന്നാലെ സുഹൃത്ത് ബിനുവും ഡ്രൈവര് രമേശും പൊലീസില് കീഴടങ്ങിയിരുന്നു. ഹരികുമാര് ആത്മഹത്യ ചെയ്തെങ്കിലും കേസില് നിയമപരമായ അന്വേഷണം തുടരുമെന്ന് ഡിജിപി ലോക്നാഥ് ബെഹ്റ വ്യക്തമാക്കിയിരുന്നു.
കൊലപാതക കേസ് മാത്രമായിരുന്നു ലോക്കല് പൊലീസ് ഹരികുമാറിനെതിരെ ആദ്യം ചുമത്തിയിരുന്നത്. എന്നാല് ക്രൈംബ്രാഞ്ച് അന്വേഷണത്തില് പൊലീസിനെ കബളിപ്പിക്കല്, തെളിവ് നശിപ്പിക്കല്, സംഘംചേരല്, മര്ദ്ദനം തുടങ്ങിയ വകുപ്പുകളും ഹരികുമാറിനെതിരെ ചുമത്തിയിരുന്നു.
https://www.facebook.com/Malayalivartha
