ദേശീയപാതകളും ട്രെയിനുകളും കേന്ദ്രീകരിച്ച് കവര്‍ച്ച നടത്തുന്ന അന്തര്‍ സംസ്ഥാന കൊള്ളസംഘത്തിലെ നാലുപേരെ വാളയാര്‍ പൊലീസും ജില്ലാ െ്രെകം സ്‌ക്വാഡും ചേര്‍ന്ന് പിടികൂടി. പാലക്കാട് കിണാശേരി തണ്ണിശേരി സുജീഷ് എന്ന സ്പിരിറ്റ് സുജി (29), ആലത്തൂര്‍ ഇരട്ടക്കുളം നൊച്ചിപ്പറമ്പില്‍ സുരേന്ദ്രന്‍ എന്ന മാമ (40), കോങ്ങാട് കുണ്ടലശേരി പാലേങ്ങാട്ട് പറമ്പില്‍ സുലൈമാന്‍ എന്ന കാക്കി സുലി (49), കല്ലടിക്കോട് കരിമ്പ കമ്പിയില്‍ വീട്ടില്‍ ബിജു എന്ന കമ്പി ബിജു (37) എന്നിവരാണ് അറസ്റ്റിലായത്.

ബാംഗ്ലൂര്‍ കൊച്ചി ദേശീയപാത, അന്യസംസ്ഥാനങ്ങളില്‍ നിന്നുള്ള ദീര്‍ഘദൂര ട്രെയിനുകള്‍ എന്നിവ കേന്ദ്രീകരിച്ച് സ്വര്‍ണ വ്യാപാരികള്‍, കുഴല്‍പ്പണക്കടത്തുകാര്‍ എന്നിവരെ പൊലീസാണെന്ന വ്യാജേന വാഹനങ്ങളില്‍ കയറ്റിക്കൊണ്ടുപോയി കൊള്ളയടിക്കുന്ന സംഘത്തിലെ കണ്ണികളാണിവര്‍.

ആഗസ്റ്റ് 29ന് രാത്രി 12ന് വാളയാറില്‍ ചെന്നെയിലേക്ക് പോകുന്ന സ്വകാര്യ ബസിനെ തടഞ്ഞുനിറുത്തി തൃശൂര്‍ സ്വദേശി ജോണ്‍സണെ പിടിച്ചിറക്കി കാറില്‍ കയറ്റിക്കൊണ്ടു പോയി ഒന്നേകാല്‍ കിലോ സ്വര്‍ണം കൊള്ളയടിച്ച് വിജനമായ സ്ഥലത്ത് ഇറക്കി വിട്ട കേസിലാണ് അറസ്റ്റ്. സംഘത്തിലെ മൂന്നുപേരെ കൂടി പിടികൂടാനുണ്ട്. ഇവരെ തിരിച്ചറിഞ്ഞതായി പൊലീസ് അറിയിച്ചു.

പ്രതികള്‍ സഞ്ചരിച്ച കാറില്‍ നിന്ന് വ്യാജ നമ്പര്‍ പ്ലേറ്റുകള്‍ കണ്ടെത്തി. സുജീഷിനെതിരെ കളമശേരി, പാലക്കാട് കസബ സ്‌റ്റേഷന്‍ എന്നിവിടങ്ങളില്‍ കൊലപാതകം ഉള്‍പ്പടെ വിവിധ കേസുകള്‍ നിലവിലുണ്ട്. സുലൈമാന് നേരത്തെ കോങ്ങാട്, മണ്ണാര്‍ക്കാട് സ്‌റ്റേഷനുകളിലും ബിജുവിന് കല്ലടിക്കോട് സ്‌റ്റേഷനിലും ശീട്ടുകളി കേസുണ്ട്. സുരേന്ദ്രന് നേരത്തെ മുവാറ്റുപുഴ എക്‌സൈസില്‍ അനധികൃത മദ്യവില്പനക്കേസുമുണ്ട്.