കേരളം കണ്ട് മഹാ പ്രളയത്തില്‍ നിന്നും കര കയറും മുമ്പെയാണ് ശബരിമല യുവതീ പ്രവേശനമെത്തിയത്. ഇതോടെ ഒത്തൊരുമിച്ച മലയാളികള്‍ പോരടിച്ച് പല വശത്തായി. യുവതീ പ്രവേശനമാകാമെന്ന സര്‍ക്കാരിന്റെ നിലപാടുകള്‍ പ്രതിപക്ഷത്തിന് ആയുധമാക്കി. ഇതിനിടെ നിയമസഭ തുടങ്ങിയപ്പോഴേക്കും പ്രളയം മാറി. ശബരിമലയായി മുഖ്യ വിഷയം. ശബരിമലയില്‍ യുഡിഎഫ് വിജയിക്കില്ലെന്ന് കണ്ടപ്പോള്‍ അടുത്ത വിഷയം മന്ത്രി കെ.ടി. ജലീലായി. ജലീല്‍ രാജി വയ്ക്കില്ലെന്നായപ്പോള്‍ പിന്നെ പികെ ശശിയായിരുന്നു. എ്ന്നാല്‍ ശശിയുടെ വിഷയം ഏല്‍ക്കില്ലെന്ന് കണ്ട് അവസാനം പ്രളയത്തെ പിടിച്ചിരിക്കുകയാണ് യുഡിഎഫ്.

സംസ്ഥാനത്തെ പ്രളയബാധിതര്‍ക്ക് സര്‍ക്കാര്‍ സഹായം വൈകുന്നുവെന്നാണ് പ്രതിപക്ഷം വാദിച്ചത്. ഇക്കാര്യം ചര്‍ച്ച ചെയ്യണമെന്ന് ആവശ്യപ്പെട്ട് പ്രതിപക്ഷം നിയമസഭയില്‍ അടിയന്തര പ്രമേയത്തിന് നോട്ടീസ് നല്‍കി. വി.ഡി. സതീശന്‍ എംഎല്‍എയാണ് അടിയന്തരപ്രമേയത്തിന് നോട്ടീസ് നല്‍കിയിരിക്കുന്നത്. അവസാനം സ്പീക്കര്‍ അനുമതി നല്‍കി. ഉച്ചയ്ക്ക് ഒരു മണിക്കാണ് ചര്‍ച്ച നടക്കുന്നത്.

ശബരിമല വിഷയവും മന്ത്രി കെ.ടി. ജലീല്‍ ഉള്‍പ്പെട്ട ബന്ധുനിയമനവുമാണ് കഴിഞ്ഞ ദിവസങ്ങളില്‍ പ്രതിപക്ഷം നിയമസഭയില്‍ അടിയന്തരപ്രമേയമായി അവതരിപ്പിച്ചത്. ഇന്ന് നിയമസഭാ നടപടികള്‍ പുരോഗമിച്ചുവരികയാണ്. ചോദ്യോത്തരവേളയോട് ഇന്ന് സഹകരിക്കുമെന്ന് പ്രതിപക്ഷം അറിയിച്ചിരുന്നു. കഴിഞ്ഞ ദിവസങ്ങളില്‍ പ്രതിപക്ഷ പ്രതിഷേധത്തെ തുടര്‍ന്നു സഭ നേരത്തെ പിരിഞ്ഞിരുന്നു.

അതേസമയം നിയമസഭാകവാടത്തില്‍ സത്യാഗ്രഹമിരിക്കുന്ന യുഡിഎഫ് എംഎല്‍എമാരുടെ സമരം അവസാനിപ്പിക്കാന്‍ സ്പീക്കര്‍ ഇടപെടണമെന്ന് പ്രതിപക്ഷം ആവശ്യപ്പെട്ടിട്ടുണ്ട്. സര്‍ക്കാരുമായി സംസാരിച്ച് സമവായം ഉണ്ടാക്കണമെന്നും രമേശ് ചെന്നിത്തല ആവശ്യപ്പെട്ടു. അതേസമയം പ്രശ്‌ന പരിഹാരത്തിനായി ഇടപെട്ടിട്ടുണ്ടെന്ന് സ്പീക്കര്‍ പി.ശ്രീരാമകൃഷ്ണന്‍ പ്രതികരിച്ചു.

ശബരിമല വിഷയത്തില്‍ തുടര്‍ച്ചയായ നാലാം ദിവസവും നിയമസഭ സ്തംഭിച്ചതിന് തൊട്ടുപിന്നാലെയാണ് സഭാ കവാടത്തില്‍ പ്രതിപക്ഷ എംഎല്‍എമാരായ വി.എസ്.ശിവകുമാര്‍(കോണ്‍ഗ്രസ്), പാറയ്ക്കല്‍ അബ്ദുള്ള(മുസ്ലീംലീഗ്), ഡോ.എന്‍.ജയരാജ്(കേരള കോണ്‍ഗ്രസ് എം), എന്നിവര്‍ സത്യാഗ്രഹം ആരംഭിച്ചത്. സഭയ്ക്കകത്ത് പ്രതിപക്ഷ നേതാവ് രമേശ് ചെന്നിത്തലയാണ് സത്യാഗ്രഹസമരം പ്രഖ്യാപിച്ചത്. ശബരിമലയിലെ നിരോധനാജ്ഞ പിന്‍വലിക്കുക, തീര്‍ത്ഥാടകര്‍ക്ക് അടിസ്ഥാനസൗകര്യങ്ങളൊരുക്കുക എന്നീ ആവശ്യങ്ങളുയര്‍ത്തിയാണ് സമരം.

പിണറായി സര്‍ക്കാര്‍ അധികാരത്തിലെത്തിയ ശേഷം പ്രതിപക്ഷം സര്‍ക്കാരിനെതിരെ നിയമസഭയില്‍ നടത്തുന്ന മൂന്നാമത്തെ സമരമാണ് ശബരിമലവിഷയത്തിലേത്. ഈ മാസം 13 വരെയാണ് ഇത്തവണത്തെ സഭാസമ്മേളനം. സമ്മേളനം അവസാനിക്കുന്നത് വരെ സത്യഗ്രഹം തുടരാനാണ് പ്രതിപക്ഷത്തിന്റെ നീക്കം. സഭയ്ക്കകത്ത് മറ്റ് വിഷയങ്ങള്‍ക്കൊപ്പം ശബരിമല വിഷയവും തുടര്‍ന്നും ഉയര്‍ത്താനാണ് നീക്കം. ശബരിമല വിഷയം സജീവമാക്കി നിര്‍ത്താന്‍ അംഗങ്ങളുടെ സത്യഗ്രഹം ഉപകരിക്കുമെന്ന കണക്കുകൂട്ടലിലാണ് യു.ഡി.എഫ് നേതൃത്വം.

നിയമസഭാകവാടത്തില്‍ സത്യാഗ്രഹമിരിക്കുന്ന പ്രതിപക്ഷ എംഎല്‍എമാരെ മുഖ്യമന്ത്രി പിണറായി വിജയനും വ്യവസായ മന്ത്രി ഇ.പി. ജയരാജനും സന്ദര്‍ശിച്ചിരുന്നു.