ലോക്സഭാ തെരഞ്ഞെടുപ്പ്; മന്ത്രിസഭയില് മുഖ്യമന്ത്രി പിണറായിക്കും കണ്ണൂര്ലോബിക്കും കരടായ ധനമന്ത്രി ഡോ.തോമസ് ഐസക്കിനെ ആലപ്പുഴ ലോക്സഭാ സീറ്റില് മത്സരിപ്പിക്കാന് നീക്കം
മന്ത്രിസഭയില് മുഖ്യമന്ത്രി പിണറായിക്കും കണ്ണൂര്ലോബിക്കും കരടായ ധനമന്ത്രി ഡോ.തോമസ് ഐസക്കിനെ കെട്ട് കെട്ടിക്കാന് ആലപ്പുഴ ലോക്സഭാ സീറ്റില് മത്സരിപ്പിക്കാന് നീക്കം. വി.എസ് സര്ക്കാരില് വിദ്യാഭ്യാസമന്ത്രിയായിരുന്ന എം.എ ബേബിയെ കഴിഞ്ഞ ലോക്സഭാ തെരഞ്ഞെടുപ്പില് കൊല്ലത്ത് മത്സരിപ്പിച്ച് തോല്പ്പിച്ച് ഡല്ഹിയില് കുടിയിരുത്തിയ പോലെ ഐസക്കിനെയും ഒഴിപ്പിക്കാനാണ് നീക്കം. അതേസമയം എം.എ ബേബിയെ ആലപ്പുഴയില് മത്സരിപ്പിച്ചേക്കുമെന്നും അറിയുന്നു. മുമ്പ് ആലപ്പുഴ ജില്ലാ സെക്രട്ടറിയായി ബേബി പ്രവര്ത്തിച്ചിട്ടുണ്ട്. ജില്ലയില് ജി.സുധാകരനും ഐസക്കും തമ്മിലുള്ള ഒളിപ്പോര് അവസാനിപ്പിക്കാന് ആരെയെങ്കിലും കെട്ട്കെട്ടിക്കണമെന്ന അഭിപ്രായം പല നേതാക്കള്ക്കുമുണ്ട്.
2014 ലെ എല്.ഡി.എഫ് സ്ഥാനാര്ത്ഥിയും മുന് ജില്ലാ സെക്രട്ടറിയുമായ സി ബി ചന്ദ്രബാബുവിനേയും ആരൂര് എംഎല് എയായ എ.എം ആരിഫിനേയും പരിഗണിച്ചേക്കും. ആലപ്പുഴയിലെ നിരവധി പൊതു പരിപാടികളിലെ നിറ സാന്നിദ്ധ്യമാണ് ഇപ്പോള് ആരിഫ്. അതേസമയം ആലപ്പുഴയില് സിറ്റിഗ് എം പി കെസി വേണുഗോപാല് തന്നെ യുഡിഎഫ് സ്ഥാനാര്ത്ഥിയയാകും. മുമ്പ് മത്സരിക്കില്ലെന്ന് കെ.സി പ്രഖ്യാപിച്ചിരുന്നു. എന്നാല് കര്ണാടകയിലും രാജസ്ഥാനിലും മധ്യപ്രദേശിലും ഉള്പ്പെടെ കോണ്ഗ്രസിന്റെ തെരഞ്ഞെടുപ്പ് വിജയത്തിന് ചുക്കാന്പിടിച്ച കെ.സി ഇപ്പോള് രാഹുല്ഗാന്ധിയുടെ വിശ്വസ്ഥനാണ്. അതിനാല് വിജയിച്ചാല് ക്യാബിനെറ്റ് മന്ത്രിയാകും. അതുകൊണ്ടാണ് മനംമാറിയത്.
2005ല് ഉമ്മന്ചാണ്ടി മന്ത്രിസഭയിലെ അംഗമായിരുന്ന കെ.സിയെ കെട്ടുകെട്ടിക്കാനാണ് അന്ന് എ ഗ്രൂപ്പ് അദ്ദേഹത്തെ ആലപ്പുഴ നിന്ന് മത്സരിപ്പിച്ചത്. പിന്നീട് തുടര്ച്ചയായി വിജയിച്ചു. കോണ്ഗ്രസ് ദേശീയ നേതൃത്വത്തിലെ കരുത്തനായി മാറിയ കെ സി വേണുഗോപാലിനെ നേരിടാനാണ് മുതിര്ന്ന നേതാക്കളെ ആലപ്പുഴയില് സി പി എം രംഗത്തിറക്കുന്നത്. ദേശീയ രാഷ്ട്രയത്തിലും കോണ്ഗ്രസ് നേതൃനിരയിലും കണ്ണടച്ച് തുറക്കുന്ന വേഗത്തില് വളര്ന്ന കെ സി വേണുഗോപാല് ആലപ്പുഴയില് സ്ഥാനാര്ത്ഥിയെന്ന് ഡി സി സി നേതൃത്വം ഉറപ്പിക്കുന്നു. 19,407 വോട്ടുകള്ക്കാണ് കഴിഞ്ഞ തവണ കെ സി വേണുഗോപാല് ആലപ്പുഴയില് ജയിച്ചത്. സോളാര് വിവാദങ്ങളൊന്നും അദ്ദേഹത്തെ തളര്ത്തിയതുമില്ല.
കരുനാഗപ്പള്ളി മുതല് അരൂര് വരെയുള്ള തീരദേശ മേഖലയിലുണ്ടായ വോട്ടു ചോര്ച്ചയാണ് പരാജയകാരണമെന്നാണ് ഇടത് മുന്നണിയുടെ വിലയിരുത്തല്. അതിനാല് തന്നെ രാഷ്ട്രീയത്തിനപ്പുറം വോട്ടുകള് സമാഹരിക്കാന് കഴിയുന്ന സ്ഥാനാര്ത്ഥി വേണമെന്നുള്ളത് കൊണ്ടാണ് ഐസക്കിനെയോ ബേബിയേയോ രംഗത്തിറക്കുന്നത്. ലത്തീന് വിഭാഗത്തിന് ഏറെ സ്വാധീനമുള്ള മണ്ഡലമാണ് ആലപ്പുഴ. ഐസക്കിന്റെ മന്ത്രിസഭയിലെ അപ്രമാദിത്വത്തിന് തടയിടാനാണ് മുഖ്യമന്ത്രി പിണറായി വിജയന് ഗീതാഗോപിനാഥിനെ മുമ്പ് സാമ്പത്തികഉപദേഷ്ടാവാക്കിയത്.
https://www.facebook.com/Malayalivartha
