ഗതാഗത കുരുക്കിലമര്‍ന്ന പാലിയേക്കര ടോള്‍ പ്ലാസയിലാണ് ശരിക്കും കളക്ടറുടെ പവര്‍ എന്താണെന്ന് ജീവനക്കാരും പൊലീസും അറിഞ്ഞത്. കഴിഞ്ഞ വ്യാഴാഴ്ച തിരുവനന്തപുരത്ത് കളക്ടര്‍മാരുടെ യോഗം കഴിഞ്ഞു മടങ്ങുകയായിരുന്ന തൃശൂര്‍ കളക്ടര്‍ അനുപമ ഐ.എ.എസിന്റെ വാഹനം പാലിയേക്കര ടോള്‍പ്ലാസയിലെ ഗതാഗതകുരുക്കില്‍ അകപ്പെടുകയായിരുന്നു.

ടോള്‍പ്ലാസയ്ക്ക് ഇരുവശത്തും ഒന്നര കിലോമീറ്റര്‍ വാഹനങ്ങളുടെ നീണ്ട നിരയുണ്ടായിരുന്നു ദേശീയപാതയില്‍ ഈ സമയത്തുണ്ടായിരുന്നത്. 15 മിനിറ്റ് കാത്തുനിന്ന ശേഷമാണ് കളക്ടറുടെ വാഹനത്തിന് പോലും ടോള്‍ബൂത്തിനു സമീപത്തെത്താനായത്. ഇതോടെയായിരുന്നു കളക്ടറുടെ ഇടപെടല്‍.

ടോള്‍പ്ലാസയിലെ ഉദ്യോഗസ്ഥരെ വിളിച്ചു വരുത്തി വിശദീകരണം തേടിയ അവര്‍ ഡ്യൂട്ടിയിലുണ്ടായിരുന്ന പൊലീസുകാരോട് ടോള്‍ബൂത്ത് തുറന്നുകൊടുക്കാന്‍ ഉത്തരവിടുകയായിരുന്നു. ടോള്‍പ്ലാസ സെന്ററിനുള്ളില്‍ കാര്‍ നിര്‍ത്തിയായിരുന്നു അനുപമയുടെ ഇടപെടല്‍.

അഞ്ച് വാഹനങ്ങളില്‍ കൂടുതലുണ്ടെങ്കില്‍ കാത്തുനിര്‍ത്താതെ കടത്തി വിടണമെന്നാണ് ചട്ടമെന്നിരിക്കെ വലിയ ഗതാഗത കുരുക്ക് നേരിട്ടിട്ടും ഇടപെടാതിരുന്നതിനാണ് പോലീസ് ഉദ്യോഗസ്ഥരെ കളക്ടര്‍ ശാസിച്ചത്. അര്‍ദ്ധ രാത്രിയില്‍ അരമണിക്കൂറിലധികം ടോള്‍പ്ലാസയില്‍ ചെലവിട്ട കലക്ടര്‍ ഗതാഗതക്കുരുക്ക് പൂര്‍ണമായും പരിഹരിച്ച ശേഷമാണ് തൃശൂരിലേക്ക് പോയത്. ഇത്തരം നടപടി ആവര്‍ത്തിച്ചാല്‍ നടപടിയുണ്ടാകുമെന്നും ടോള്‍പ്ലാസ അധികൃതര്‍ക്ക് കലക്ടര്‍ മുന്നറിയിപ്പ് നല്‍കി.

ജനകീയ കളക്ടറെന്ന പൊതുസമ്മതിയുള്ള, സാധാരണക്കാരെ എന്നും ചേര്‍ത്ത് പിടിക്കുന്ന തൃശൂര്‍ കളക്ടര്‍ അനുപമ ഐ.എ.എസ് പതിനഞ്ച് മിനിട്ടോളമെടുത്ത് ടോള്‍ ബൂത്തിലെത്തിയപ്പോഴാണ് ടോള്‍ഗേറ്റുകള്‍ക്ക് ഇരുവശവും ഒന്നര കിലോമീറ്ററോളം ദൂരത്തില്‍ വാഹനങ്ങള്‍ നിര നിരയായി കുടുങ്ങി കിടപ്പുണ്ടെന്ന് കളക്ടര്‍ക്ക് മനസിലായത്.

ഇത്രയും വലിയ വാഹനത്തിരക്കുണ്ടായിട്ടും യാത്രക്കാരെ കാത്തുനിര്‍ത്തി വലയ്ക്കുന്നതിന്റെ കാരണമാരാഞ്ഞ കളക്ടര്‍ ഗതാഗതകുരുക്കിലും ഇടപെടാതെ കാഴ്ചക്കാരായി നിന്ന പൊലീസിനും, യാത്രക്കാരുടെ ബുദ്ധിമുട്ട് മനസിലാക്കാതെ ടോള്‍ പിരിവില്‍ കണ്ണുവച്ച ജീവനക്കാരെയും രൂക്ഷമായി ശകാരിച്ചു. തുടര്‍ന്ന് ടോള്‍ബൂത്തുലെ ഗേറ്റുകള്‍ തുറന്ന് കൊടുക്കാന്‍ പൊലീസിനോട് നിര്‍ദ്ദേശിക്കുകയും ചെയ്തു. അരമണിക്കൂറോളം സംഭവ സ്ഥലത്ത് നിന്ന് ഗതാഗത കുരുക്ക് അഴിഞ്ഞതിന് ശേഷമാണ് അനുപമ ഐ.എ.എസ് പാലിയേക്കര ടോള്‍ ബൂത്തില്‍ നിന്നും യാത്രയായത്.