പ്രളയസെസിന് ജനം തെരഞ്ഞെടുപ്പില് മറുപടി നല്കുമെന്ന് സൂചന ലഭിച്ചതോടെ ഒരു ശതമാനം സെസ് ഈടാക്കുന്നത് നീട്ടിവയ്ക്കാന് സര്ക്കാര് ആലോചിക്കുന്നു
പ്രളയസെസിന് ജനം തെരഞ്ഞെടുപ്പില് മറുപടി നല്കുമെന്ന് സൂചന ലഭിച്ചതോടെ ഒരു ശതമാനം സെസ് ഈടാക്കുന്നത് നീട്ടിവയ്ക്കാന് സര്ക്കാര് ആലോചിക്കുന്നു. കേന്ദ്രബജറ്റ് വോട്ടോണ് അക്കൗണ്ടാണെങ്കിലും സാധാരണക്കാര്ക്ക് പലതും നല്കുന്നതായുള്ള പ്രതീതി സൃഷ്ടിക്കാനായി. ഇതോടെയാണ് ഏപ്രില് ഒന്ന്് മുതല് ഈടാക്കാനിരുന്ന പ്രളയ സെസ് ജുലൈ മുതല് പ്രാബല്യത്തില് ആക്കാമെന്ന് തീരുമാനിച്ചെന്നാണ് ലഭ്യമായ വിവരം. തെരഞ്ഞെടുപ്പിന്റെ പടിവാതില്ക്കല് എത്തിനില്ക്കുന്ന ഏപ്രില് മുതല് സെസ് ഈടാക്കിയാല് വിലക്കയറ്റം ഉണ്ടാവുകയും കോണ്ഗ്രസും ബി.ജെ.പിയും അത് ആയുധമാക്കുകയും ചെയ്താല് കനത്തതിരിച്ചടിയാവും നേരിടേണ്ടിവരുക. ശബരിമല നിലപാടിലുള്ള ജനങ്ങളുടെ പ്രതിഷേധമായി അത് ചിത്രീകരിക്കുകയും ചെയ്യും. എന്.എസ്.എസ് ഉള്പ്പെടെ അത് സര്ക്കാരിനും പാര്ട്ടിക്കും എതിരെ ആയുധമാക്കുമെന്നും വിലയിരുത്തിയതിന്റെ അടിസ്ഥാനത്തിലാണ് പുതിയ തീരുമാനം.
നിത്യോപയോഗ സാധനങ്ങള്ക്കും നിര്മാണമേഖലയില് ഏറ്റവും അത്യാവശ്യമായ സിമന്റിനും വില കൂടിയാല് സാധാരണക്കാരന്റെ നടുവൊടിയും. അത് മനസിലാക്കി സോഫ്റ്റ്വെയര് പരിഷ്കരിക്കുന്നെന്ന കാരണം ചൂണ്ടിക്കാട്ടി സെസ് പരിപിക്കുന്നത് നീട്ടിവയ്ക്കുകയാണെന്നാണ് സര്ക്കാര് നല്കുന്ന വിശദീകരണം. പരിഷ്ക്കരിച്ച നികുതി, സേവന ഫീസ് എന്നി സാമ്പത്തിക വര്ഷം ആരംഭിക്കുന്ന ഏപ്രില് ഒന്ന് മുതലാണ് നടപ്പിലാവുക. അധിക സെസ് ഈടാക്കുന്നതിന് മുന്നോടിയായി സംസ്ഥാന ജിഎസ്ടി നിയമം ഭേദഗതി ചെയ്യണം. ആ ബില് 12ന് നിയമസഭ പരിഗണിക്കും. അതിനാല് മറ്റൊരു തന്ത്രപരമായ നീക്കമാണ് സര്ക്കാര് നടത്തിയത്. വിജ്ഞാപനം ചെയ്യുന്ന തീയതി മുതല് സെസ് ഏര്പ്പെടുത്തുമെന്ന് ഭേദഗതി നിയമത്തില് ചൂണ്ടിക്കാട്ടും. അതിനാല് വിജ്ഞാപനം എപ്പോള് വേണമെന്ന് സര്ക്കാരിനു തീരുമാനിക്കാം.
സെസ് വിജ്ഞാപനം എപ്പോള് വേണമെന്ന് ആലോചിച്ചു തീരുമാനിക്കുമെന്ന് നിയമസഭയിലെ ഉപധനാഭ്യര്ഥന ചര്ച്ചയ്ക്കുളള മറുപടിയില് ധനമന്ത്രി പറഞ്ഞത് ഇതിനാണെന്ന് വ്യക്തമായി. അതേസമയം ജി.എസ്.ടിയിലെ 12, 18, 28 ശതമാനം സ്ലാബുകളിലെ ഉല്പന്നങ്ങള്ക്ക് സെസ് ഏര്പ്പെടുത്തുമെന്ന ബജറ്റ് പ്രഖ്യാപനം ഭേദഗതി വരുത്തും. അതിലൂടെ ചില ഉല്പ്പന്നങ്ങള് ഒഴിവാക്കാനാകും. അതെല്ലാം നിത്യോപയോഗ സാധനങ്ങളാണെന്ന് ഉറപ്പാണ്. വിലക്കയറ്റത്തിലേക്കാണ് ബജറ്റ് സംസ്ഥാനത്തെ എത്തിച്ചതെന്ന പ്രതിപക്ഷവിമര്ശനത്തിന് മറുപടിനല്കാന് ഇതിലൂടെ കഴിയുമെന്നാണ് സര്ക്കാര് വിലയിരുത്തുന്നത്. സിമന്റും ടൈല്സും അടക്കമുള്ള കെട്ടിടനിര്മാണ സാമഗ്രികള്ക്ക് വില കൂടുമെങ്കിലും പ്രളയം ബാധിച്ചവരെ അത് ബാധിക്കാതിരിക്കാനുള്ള നടപടിയും സര്ക്കാര് സ്വീകരിക്കും. സിമന്റ് കമ്പനികളുമായി ഉള്പ്പെടെ ചര്ച്ച നടത്തി കുറഞ്ഞ വിലയ്ക്ക് ഇവ ലഭ്യമാക്കാനാണ് തീരുമാനം.
സ്വര്ണം, വെള്ളി, പ്ലാറ്റിനം തുടങ്ങിയവയ്ക്കും വില കൂടും. സ്വര്ണവില ഇപ്പോഴേ കുതിക്കുകയാണ്. ഇത് സാധാരണക്കാരെ നേരിട്ട് ബാധിക്കുന്ന വിഷയമാണ്. കാരണം സാധാരണ കുടുംബത്തിലെ പെണ്കുട്ടികളുടെ കല്യാണത്തിനും നൂല്കെട്ട് പോലുള്ള ചടങ്ങുകള്ക്കും സ്വര്ണം അനിവാര്യമാണ്. അഞ്ച് ശതമാനം ജി.എസ്.ടി സ്ലാബുള്ള ഉല്പ്പന്നങ്ങള്ക്ക് 0.25 ശതമാനം സെസ് ആണ് ഏര്പ്പെടുത്തിയിരിക്കുന്നത്. സ്വര്ണത്തിന് വില കൂടിയതോടെ നിക്ഷേപകര് അതിലേക്ക് തിരിഞ്ഞിരിക്കുകയാണ്. അതിനാല് വില ഇനിയും കൂടാനാണ് സാധ്യത. അങ്ങനെയെങ്കില് ജൂലൈ മുതല് സെസ് പ്രാബല്യത്തില് വരുമ്പോള് വില അതിലും കൂടും.
https://www.facebook.com/Malayalivartha
