ഏഷ്യയിലെ തന്നെ ഏറ്റവും പ്രായംകൂടിയ പിടിയാനയായി ഗിന്നസ് റെക്കോര്‍ഡ് നേടിയ ഗജരാജ മുത്തശ്ശി ദാക്ഷായണി ചരിഞ്ഞു. 89 വയസുണ്ടായിരുന്നു. നാട്ടാനകളില്‍ പ്രായം കൂടിയ ആനയും തിരുവിതാംകൂര്‍ ദേവസ്വം ബോര്‍ഡിന്റെ ഏറ്റവും പ്രായമുള്ള ആനയും ദാക്ഷായണിയായിരുന്നു. ഇന്നലെ വൈകിട്ട് നാലരയോടെയാണ് പാപ്പനംകോട് മലമേല്‍ക്കുന്ന് സത്യന്‍ നഗറിലെ ആനക്കൊട്ടിലില്‍ ആന ചരിഞ്ഞത്.

ഗജരാജമുത്തശ്ശി പട്ടം നേടിയ ദാക്ഷായണി തിരുവനന്തപുരം ചെങ്കള്ളൂര്‍ മഹാദേവ ക്ഷേത്രത്തിലെ ആനയാണ്. 2016ലാണ് ഗജരാജ പട്ടവും ഗിന്നസ് റെക്കോര്‍ഡും ലഭിച്ചത്. കോന്നി ആനക്കൊട്ടിലില്‍ നിന്ന് അഞ്ച് വയസ് കഴിഞ്ഞപ്പോള്‍ തിരുവിതാംകൂര്‍ കൊട്ടാരത്തിലെത്തിയ ദാക്ഷായണിയെ അവിടെനിന്നാണ് ദേവസ്വം ബോര്‍ഡിന് ലഭിക്കുന്നത്.

ബോര്‍ഡിനു കീഴിലെ ആറ്റിങ്ങല്‍ തിരുവാറാട്ടുകാവ് ക്ഷേത്രത്തില്‍ നിന്നാണ് ചെങ്കള്ളൂര്‍ മഹാദേവക്ഷേത്രത്തില്‍ എത്തിച്ചത്. തിരുവിതാംകൂര്‍ ദേവസ്വത്തില്‍ ഏറ്റവും കൂടുതല്‍ എഴുന്നള്ളത്ത് നടത്തിയിട്ടുള്ള ആനയായിരുന്നു . അരനൂറ്റാണ്ടിലേറെ ശംഖുംമുഖത്ത് ദേവിയെ എഴുന്നള്ളിച്ചിട്ടുണ്ട്.

തമലം ത്രിവിക്രമംഗലം മഹാവിഷ്ണു ക്ഷേത്രത്തിലെ ആറാട്ടിനായി തിടമ്പെഴുന്നളിച്ച് പദ്മനാഭസ്വാമി ക്ഷേത്രത്തിലെത്തി അവിടെനിന്ന് കൂടിയാറാട്ടായി ശംഖുംമുഖത്തേക്ക് സ്ഥിരമായി എഴുന്നള്ളത്ത് നടത്തിയിരുന്നു. ഗജരാജ പട്ടം ലഭിച്ചപ്പോള്‍ ദേവസ്വം ബോര്‍ഡ് ദാക്ഷായണിയെ ആദരിച്ചിരുന്നു.

പോസ്റ്റല്‍ ഡിപ്പാര്‍ട്ട് മെന്റ് ആനയുടെ ചിത്രമുള്ള പോസ്റ്റ് കവറും ഇറക്കിയിരുന്നു.
ഇന്ന് രാവിലെ പത്തോടെ പോസ്റ്റ് മോര്‍ട്ടത്തിന് ശേഷം പാപ്പനംകോട് ദേവസ്വം വക സ്ഥലത്ത് സംസ്‌കാരം നടത്തും.