കേരള മനസ്സാക്ഷിയെ പിടിച്ചുലച്ച സംഭവമാണ് പെരിയയില്‍ യൂത്ത് കോണ്‍ഗ്രസ് പ്രവര്‍ത്തകരായ കൃപേഷിന്റെയും ശരത്‌ലാലിന്റെയും കൊലപാതകം. അവരുടെ വീട്ടുകാരെ കാണുന്നവര്‍ക്ക് കണ്ണീരടങ്ങുന്നില്ല. കഴിഞ്ഞ ദിവസം അലറിവിളിച്ച് കരയുന്ന വീട്ടുകാര്‍ക്കിടയിലേക്കാണ് മുല്ലപ്പള്ളി രാമചന്ദ്രന്‍ എത്തിയത്. നിയന്ത്രണം വിട്ട് മുല്ലപ്പള്ളി പൊട്ടിക്കരയുന്നത് കേരളം കണ്ടു.

പിന്നാലെ മുല്ലപ്പള്ളിയുടേത് അഭിനയമാണെന്നും തിരഞ്ഞെടുപ്പ് മുന്നില്‍ക്കണ്ടുള്ള നാടകമാണെന്നുമുള്ള പരിഹാസങ്ങളും ട്രോളുകളും എത്തി. എന്നാല്‍ മനുഷ്യത്വമാണ് മുല്ലപ്പള്ളിയെ കരയിച്ചത് എന്ന് മറുശബ്ദം സോഷ്യല്‍ മീഡിയയില്‍ ഉയര്‍ന്നു.

ഒരേ കൊടിയും പിടിച്ചുനടന്ന യുവാവിന്റെ ക്രൂരമായ മരണത്തില്‍ തകര്‍ന്നിരിക്കുന്ന മാതാപിതാക്കളുടെ ദുഃഖം മുല്ലപ്പള്ളി രാമചന്ദ്രന്‍ എന്ന മനുഷ്യനെ കരയിച്ചെന്നിരിക്കുമെന്ന് മുതിര്‍ന്ന മാധ്യമപ്രവര്‍ത്തകന്‍ കെ ജെ ജേക്കബ് പറയുന്നു.

ഒരു മരണവീട്ടിലെ സ്വന്തം അനുഭവം കൂട്ടിച്ചേര്‍ത്താണ് കെ ജെ ജേക്കബ്ബിന്റെ കുറിപ്പ്. മനുഷ്യനായിരിക്കുക എന്നതാണ് വലിയ കാര്യമെന്നും ബാക്കിയൊക്കെ പിന്നീടാണെന്നും ജേക്കബ് ഓര്‍മ്മിപ്പിക്കുന്നു.

കുറിപ്പിന്റെ പൂര്‍ണരൂപം:

കുറച്ചുകാലം മുന്‍പ്. 'ദി വീക്കി'ല്‍ എന്റെ മുതിര്‍ന്ന സഹപ്രവര്‍ത്തകനായിരുന്ന കൃഷ്ണകുമാര്‍ മരിച്ചു. അദ്ദേഹത്തിന്റെ മരണം പ്രതീക്ഷിച്ചിരുന്നതായിരുന്നു; വൈദ്യശാസ്ത്രത്തിന്റെ മികവും 'മനോരമ'യുടെ പരിചരണവും കൊണ്ടുമാത്രം മരണം കുറച്ചുകാലം മാറിനിന്നു എന്നുമാത്രം. കൊച്ചിയില്‍ പനമ്പിള്ളി നഗറിലായിരുന്നു അദ്ദേഹം താമസിച്ചിരുന്നത്. എനിക്ക് വീട് കൃത്യമായി അറിയില്ലായിരുന്നു. പഴയ സഹപ്രവര്‍ത്തകരോട് ചോദിച്ചു ഏകദേശ സ്ഥലം മനസിലാക്കി. ഏതിനും മരണവീട് കണ്ടുപിടിക്കുക അത്ര ബുദ്ധിമുട്ടല്ലല്ലോ. പിന്നെ പരിചയമുള്ള ആളുകളും കാണും. ഞാനും ഭാര്യയും അവിടെയെത്തി.

വീടിനുമുമ്പില്‍ കുറച്ചധികം ആളുകള്‍ നില്‍ക്കുന്നുണ്ട്, പക്ഷെ പരിചയമുള്ളവര്‍ ആരെയും കണ്ടില്ല. രണ്ടായാലും അകത്തു കയറി. അത്യാവശ്യം വലിയ വീട്. അവിടെ സ്വീകരണമുറിയില്‍ ഒരു ബാലന്റെ., ടീന്‍എജ് പ്രായമുള്ള ആണ്‍കുട്ടിയുടെ ശരീരമായിരുന്നു പെട്ടിയില്‍ കിടത്തിയിരുന്നത്. വീട് മാറി എന്ന് അപ്പോഴേക്കും മനസിലായി.

പക്ഷെ പെട്ടെന്ന് ഇറങ്ങിപ്പോരുന്നത് ശരിയല്ലല്ലോ..രണ്ടു മൂന്നു മിനിറ്റുനേരം അവിടെനിന്നു. പിന്നെ കരഞ്ഞുകൊണ്ട് ഇറങ്ങിപ്പോന്നു. പിന്നെ നടന്നു കൃഷ്ണകുമാറിന്റെ വീട്ടിലെത്തി. ജീവിതത്തില്‍ അന്നുവരെ കണ്ടിട്ടുണ്ടാവാന്‍ സാധ്യതയില്ലാത്ത, ഒരിക്കലും പരിചയപ്പെട്ടിട്ടില്ലാത്ത ഒരു കുഞ്ഞിന്റെ ചലനമറ്റ ശരീരം വഴിപോക്കനായ എന്നെ കരയിച്ചെങ്കില്‍, ഒരേ കൊടിയും പിടിച്ചു നടന്ന യുവാവിന്റെ ക്രൂരമായ മരണത്തില്‍ തകര്‍ന്നിരിക്കുന്ന മാതാപിതാക്കളുടെ ദുഃഖം മുല്ലപ്പള്ളി രാമചന്ദ്രന്‍ എന്ന മനുഷ്യനെ കരയിച്ചെന്നിരിക്കും.