വീണ്ടും അശാന്തമായി പുല്വാമ ; മോഷണം തടയാന് വാഹനങ്ങളില് സാധാരണ ഉപയോഗിക്കുന്ന വിദൂര നിയന്ത്രിത അലാം അല്ലെങ്കില് താക്കോലുകള് ജമ്മു കശ്മീരില് ബോംബ് സ്ഫോടനത്തിനായി ഭീകരര് ഉപയോഗിക്കുന്നതായി കണ്ടെത്തല്
മോഷണം തടയാന് വാഹനങ്ങളില് സാധാരണ ഉപയോഗിക്കുന്ന വിദൂര നിയന്ത്രിത അലാം അല്ലെങ്കില് താക്കോലുകള് ജമ്മു കശ്മീരില് ബോംബ് സ്ഫോടനത്തിനായി ഭീകരര് ഉപയോഗിക്കുന്നതായി കണ്ടെത്തല്. പുല്വാമയിലെ ചാവേര് സ്ഫോടനത്തിലും ഈ സാധ്യത സംശയിക്കുന്നു.
ഉഗ്രസ്ഫോടകവസ്തുക്കള് ഉപയോഗിച്ചു പ്രാദേശികമായി നിര്മിക്കുന്ന ബോംബുകള് (ഐഇഡി) പൊട്ടിക്കാന് വിദൂര നിയന്ത്രിത സംവിധാനം ഭീകരര് ഉപയോഗിച്ചു തുടങ്ങിയത് കഴിഞ്ഞവര്ഷം മുതലാണെന്നും ജമ്മു കശ്മീരിലെ ഇന്റിലിജന്സ്, സുരക്ഷാ ഏജന്സികള് തയാറാക്കിയ റിപ്പോര്ട്ടില് പറയുന്നു.ഇതിനായി മൊബൈല് ഫോണ്, വോക്കിടോക്കി സെറ്റ്, ഇരുചക്ര, നാലു ചക്ര വാഹനങ്ങളില് മോഷണം തടയാന് ഉപയോഗിക്കുന്ന വിദൂര നിയന്ത്രിത താക്കോലുകള് തുടങ്ങിയവയാണ് ഭീകരര് ഉപയോഗിക്കുന്നത്. വിദൂരനിയന്ത്രണ സംവിധാനമോ (റിമോട്ട് കണ്ട്രോള്) സമയനിയന്ത്രണ സംവിധാനമോ (ടൈമര്) ഉപയോഗിച്ചു പൊട്ടിക്കാവുന്ന നാടന് ബോംബാണ് ഐ.ഇ.ഡി. അമോണിയം നൈട്രേറ്റ് പോലുള്ള രാസവസ്തുക്കളുപയോഗിച്ച് തദ്ദേശീയമായാണ് ഇവയുണ്ടാക്കുന്നത്. മുറിവേല്പ്പിക്കാന് കഴിയുന്ന മൂര്ച്ചയേറിയ വസ്തുക്കള് നിറച്ച് ഇവയുടെ പ്രഹരശേഷി കൂട്ടാനാകും.
ഇവ വിപണിയില് സുലഭമാണ്. മാവോയിസ്റ്റുകള് ഈ രീതി നേരത്തേ മുതല് പ്രയോഗിക്കുന്നുണ്ട്. വാഹനങ്ങളില് ഐ.ഇ.ഡി.കള് സ്ഥാപിച്ചശേഷം ഇവയുപയോഗിച്ച് പൊട്ടിക്കുകയാണ് ചെയ്യുന്നത്.വരുംകാലങ്ങളില് ജമ്മുകശ്മീരിലെ ഭീകരര് ഈ രീതി കൂടുതലായി സ്വീകരിക്കാനിടയുണ്ടെന്നും സുരക്ഷാസേനകള് കൂടുതല് ജാഗ്രത പാലിക്കണമെന്നും റിപ്പോര്ട്ട് പറയുന്നു.ആര്.ഡി.എക്സ്. അടങ്ങിയ സ്ഫോടകവസ്തു കാറില് നിറച്ചാണ് പുല്വാമയില് ചാവേര് സ്ഫോടനം നടത്തിയതെന്നാണ് അന്വേഷണസംഘം സംശയിക്കുന്നത്. ആര്.ഡി.എക്സ്. കൂടാതെ, ടി.എന്.ടി. പി.ഇ.ടി.എന്. തുടങ്ങിയ സ്ഫോടകവസ്തുക്കളും കശ്മീരിലെ ഭീകരര് ഐ.ഇ.ഡി.കളില് ഉപയോഗിക്കുന്നതായി തെളിഞ്ഞതായി റിപ്പോര്ട്ടില് പറയുന്നു.
പുല്വാമയില് ഭീകരുമായുളള ഏറ്റുമുട്ടലില് മേജറടക്കം നാല് സൈനികര്ക്ക് വീരമൃത്യു. പുലര്ച്ചെ തുടങ്ങിയ ഏറ്റുമുട്ടല് തുടരുന്നു. ഭീകരരുടെ ഒളിത്താവളം സൈന്യം വളഞ്ഞു. ജെയ്ഷെ മുഹമ്മദുമായി ബന്ധമുളള ഭീകരരെയാണ് സൈന്യം വളഞ്ഞിരിക്കുന്നത്. പുല്വാമ ഭീകരാക്രമണവുമായി ഇവര്ക്ക് ബന്ധമുണ്ടെന്ന് സൂചന.അതേസമയം പുല്വാമ ആക്രമണത്തില് ഇന്ത്യയുടെ ആരോപണങ്ങള് നിഷേധിച്ച് പാക്കിസ്ഥാന്. അന്വേഷണങ്ങള്ക്ക് മുമ്പേ ആരോപണം ഉന്നയിക്കുകയാണെന്ന് പാക്കിസ്ഥാന് കുറ്റപ്പെടുത്തി. ഭീകരസംഘടനായ ജെയ്ഷെ മുഹമ്മദിനെ 2002ല് നിരോധിച്ചതാണ്. ഇന്ത്യയുമായി സൗഹൃദത്തിനാണ് പാക്കിസ്ഥാന് താല്പര്യപ്പെടുന്നതെന്നും എന്നാല് പാക് ശ്രമങ്ങളെ ഇന്ത്യ തളളിക്കളയുകയായിരുന്നുവെന്നും പാക് വിദേശകാര്യ വക്താവ് മുഹമ്മദ് ഫസല് അറിയിച്ചു.
https://www.facebook.com/Malayalivartha
