മോദിയെ താഴെയിറക്കാന് കൈകോര്ത്ത വിശാല പ്രതിപക്ഷ സഖ്യം സീറ്റ് വീതം വെയ്പ്പില് സി.പി.എമ്മിനെ അവഗണിച്ചു, അതോടെ തെരഞ്ഞെടുപ്പില് വിശാലസഖ്യത്തിനൊപ്പം തങ്ങളില്ലെന്ന് യെച്യൂരി
മോദിയെ താഴെയിറക്കാന് കൈകോര്ത്ത വിശാല പ്രതിപക്ഷ സഖ്യം സീറ്റ് വീതം വെയ്പ്പില് സി.പി.എമ്മിനെ അവഗണിച്ചു. അതോടെ തെരഞ്ഞെടുപ്പില് വിശാലസഖ്യത്തിനൊപ്പം തങ്ങളില്ലെന്ന് സി.പി.എം ജനറല് സെക്രട്ടറി സീതാറം യെച്യൂരി വ്യക്തമാക്കി. വിജയസാധ്യതയുള്ള സീറ്റുകള് പാര്ട്ടിക്ക് നിഷേധിച്ചതില് യെച്യൂരിക്ക് കടുത്ത അതൃപ്തിയുണ്ട്. അദ്ദേഹം ഇക്കാര്യം മറ്റ് പാര്ട്ടികളെ അറിയിച്ചു. മഹാരാഷ്ട്രയിലും ബീഹാറിലുമാണ് സീറ്റുകള് നല്കാത്തത്. രണ്ടിടത്തും ഒറ്റയ്ക്ക് മത്സരിക്കുമെന്ന് സി.പി.എം വൃത്തങ്ങള് അറിയിച്ചു. ഇതോടെ ബി.ജെ.പിക്കെതിരായ വിശാലസഖ്യത്തില് വിള്ളല് വീണെന്ന് ഉറപ്പായി. ഇത് മോദിക്കും അമിത്ഷായ്ക്കും വലിയ ആയുധമാണ്.
മഹാരാഷ്ട്രയില് മൂന്ന് തവണയായി ബി.ജെ.പി വിജയിച്ചു കൊണ്ടിരിക്കുന്ന ദിന്ഡോറി സീറ്റ് തങ്ങള്ക്ക് വേണമെന്ന് സി.പി.എം ആവശ്യപ്പെട്ടെങ്കിലും എന്.സി.പി നല്കിയില്ല. ആദ്യം നടന്ന ചര്ച്ചയില് ഈ സീറ്റ് എന്സിപിക്ക് നല്കാമെന്ന് കോണ്ഗ്രസ് ഉറപ്പ് നല്കിയിരുന്നു. എന്നാല് കാര്ഷികമേഖലയിലെ മണ്ഡലമായ ദിന്ഡോറി വേണമെന്ന് സി.പി.എം ആവര്ത്തിച്ചു. കാരണം കിസാന്സഭയുടെ നേതൃത്വത്തില് നടന്ന കര്ഷകറാലിക്ക് പിന്നില് സി.പി.എമ്മിന്റെ വലിയ അധ്വാനമുണ്ടായിരുന്നു. അതിനാല് അവിടെ വിജയിച്ച് കയറാമെന്ന് സി.പി.എം വിശ്വസിക്കുന്നു. ബി.ജെ.പി സംഘപരിവാര് ശക്തികള്ക്കെതിരെ ഈ പ്രദേശത്ത് പ്രതിഷേധം ശക്തമാണ്. അത് മുതലാക്കാമെന്നാണ് സി.പി.എം സീറ്റ് ചോദിച്ചത്. നല്കാത്തതിനെ തുടര്ന്ന് ഒറ്റയ്ക്ക് മത്സരിക്കാന് തീരുമാനിച്ചു.
ബീഹാറില് ഉജിയാര്പുര് സീറ്റും സിപിഎമ്മിന് നല്കില്ലെന്ന് ലാലുപ്രസാദ് ആര്ജെഡി കട്ടയ്ക്ക് പറഞ്ഞതോടെ അവിടെയും ഒറ്റയ്ക്ക് മത്സരിക്കാന് സിപിഎം തീരുമാനിച്ചു. വടക്കേന്ത്യയില് ഒറ്റയ്ക്ക് മത്സരിച്ച് ജയിക്കാനുള്ള കരുത്തൊന്നും സി.പി.എമ്മില്ല എന്നതാണ് യാഥാര്ത്ഥ്യം. പശ്ചിമബംഗാളില് കോണ്ഡഗ്രസുമായി സഖ്യം പോലുമല്ല, ധാരണമാത്രമാണ്. ഇരുവരുടെയും സിറ്റിംഗ് സീറ്റുകളില് മത്സരിക്കില്ല. കോണ്ഗ്രസിന്റെ നാല് സീറ്റുകളിലും സി.പി.എമ്മിന്റെ രണ്ട് സീറ്റുകളിലുമാണ് ധാരണ. തൃണമൂല് അധ്യക്ഷ മമതാബാനര്ജി 33 ശതമാനം സീറ്റ് വനിതകള്ക്ക് നീക്കിവെച്ചത് എല്ലാ പാര്ട്ടികള്ക്കും വലിയ തിരിച്ചടിയായി.
തമിഴ്നാട്ടില് സി.പി.എം ഒരു സീറ്റിലാണ് മത്സരിക്കുന്നത്. ഡി.എം.കെയുമായി ഇത് സംബന്ധിച്ച് ധാരണയായി. തൃപുരയില് രണ്ട് സീറ്റിലും മത്സരിക്കും. ഭരണം പോയതിനാല് ഇപ്പോഴത്തെ അവസ്ഥയില് മത്സരിച്ചാലുണ്ടാകുന്ന ഫലം എന്താണെന്ന് പ്രവചിക്കാനാവില്ല.
https://www.facebook.com/Malayalivartha
