ജയ സാധ്യതയുള്ള യു ഡി എഫിനെ സ്ഥാനാര്‍ത്ഥികള്‍ സംസാരിച്ച് തോല്‍പ്പിക്കരുതെന്ന് കെ. പി സി സിയുടെ ഉപദേശം. ശശി തരൂരിന്റെ മുന്തിയ ഇനം പണി കാരണമാണ് ഇത്തരമൊരു തീരുമാനത്തില്‍ കെ പി സി സി എത്തുന്നത്. 

തെരഞ്ഞടുപ്പ് കാലത്ത് നേതാക്കള്‍ വാക്കിനും നോക്കിനും കടിഞ്ഞാന്‍ ഇടണം എന്നതിന് ഉദാഹരണമായി മാറിയിരിക്കുന്നു തലസ്ഥാനത്തെ യുഡിഎഫ് സ്ഥാനാര്‍ത്ഥി ശശി തരൂര്‍ എം.പി. മത്സ്യത്തിന്റെ മണത്തെ കുറിച്ച് തരൂര്‍ പറഞ്ഞ വാക്കുകള്‍ അദ്ദേഹത്തിന് തന്നെ തിരിച്ചടിയായി മാറിയ സാഹചര്യത്തിലാണ് കെ പി സി സിയുടെ ഉപദേശം. 

ശശി തരൂരിന് മീന്‍മണം ഓക്കാനമുണ്ടാക്കുമത്രെ! അദ്ദേഹം തന്നെയാണത് പറഞ്ഞത് . ഈ വാക്കുകളും ട്വീറ്റ് ചെയ്തതദ്ദേഹം തന്നെയാണ്. 'Found a lot of enthusiasm at the fish market, even for a squeamishly vegetarian MP! 

squeamish എന്നു പറഞ്ഞാല്‍ ഓക്കാനമുണ്ടാക്കുന്നത് എന്നാണര്‍ത്ഥമെന്ന് വിമര്‍ശകള്‍ പറയുന്നു. എന്നാല്‍ സത്യസന്ധമായി അല്ലെങ്കില്‍ ശുണ്ഠിയുണ്ടാക്കുന്നതായി എന്നതാണ് ശരിയായ അര്‍ത്ഥം. ശശി തരൂരിന്റെ ഇംഗ്ലീഷ് വാക്കുകളുടെയെല്ലാം ശരിയായ അര്‍ത്ഥം തലസ്ഥാനത്തെ വോട്ടര്‍മാര്‍ക്ക് അറിയണമെന്നില്ല. അവര്‍ അതിന് മറ്റ് അര്‍ത്ഥങ്ങള്‍ കണ്ടെത്തും. അത് ചിലപ്പോള്‍ ഇലക്ഷന്‍ കാലത്ത് തിരിച്ചടിയായി തീരും. 

മാധ്യമ വിമര്‍ശകര്‍ തരൂരിനെ കുനിച്ച് നിര്‍ത്തി ഇടിക്കുകയാണ് ഇപ്പോള്‍. 

കേരളത്തിലെ ബഹുഭൂരിപക്ഷം ജനങ്ങളും മീന്‍കഴിക്കുന്നവരാണത്രേ. മീന്‍മണം ഓക്കാനമുണ്ടാക്കുന്ന വരേണ്യരല്ല അവരൊന്നും എന്നതാണ് വിശദീകരണം . തരൂരിന്റെ നിയോജകമണ്ഡലത്തിലെ വലിയൊരു പങ്ക് ജനങ്ങള്‍ മീന്‍ പിടിച്ചു ജീവിക്കുന്നവരാണ്. അവര്‍ക്ക് മീന്‍മണത്തില്‍ ജീവിക്കുകയല്ലാതെ വഴിയില്ല. ഈ മേല്‍ജാതിബോധമുള്ള പ്രസ്താവനയിലൂടെ തരൂര്‍ അവരെ അപമാനിക്കുകയാണ്. 

മീന്‍നാറ്റം ഓക്കാനമുണ്ടാക്കും എന്ന പ്രസ്താവന വ്യക്തിപരമായ അഭിരുചിയേയോ ശീലത്തെയോ അല്ല സൂചിപ്പിക്കുന്നത്. മഹാഭാരതകാലത്തേ ഈ വാക്കുകള്‍ക്ക് ജാതിബന്ധമുണ്ട്. മുക്കുവത്തികളെ മത്സ്യഗന്ധി എന്നു വിളിച്ചാണ് കീഴെ നിറുത്തിയിരുന്നത്. വ്യാസന്റെ ജനനകഥ എല്ലാവര്‍ക്കും അറിയാമല്ലോ. പരാശര മുനി സത്യവതിയെ പ്രാപിച്ച് വേദവ്യാസന് ജനനം നല്കുമ്പോഴും ഓക്കാനമുണ്ടായിരുന്നു. മീന്‍ മണം പ്രശ്‌നമായിരുന്നു. പക്ഷേ, പ്രാപിക്കുന്നതിനും കുഞ്ഞിനെ ജനിപ്പിക്കുന്നതിനും അത് തടസ്സമായില്ല. തിരുവനന്തപുരത്തെക്കുറിച്ച് വര്‍ണിക്കുന്ന ഏറ്റവും പഴയ പുസ്തകമായ അനന്തപുരവര്‍ണനത്തിലും ചന്തയിലിരിക്കുന്ന മുക്കുവത്തിയെക്കുറിച്ച് ശശി തരൂര്‍ കാണുന്ന അതേ മട്ടില്‍ തന്നെയാണ് കാണുന്നത്. തിരുവനന്തപുരത്തെ നഗരവാസികള്‍ ഈ മീന്‍നാറ്റക്കാരെ എങ്ങനെ കാണുന്നു എന്നതിനെക്കുറിച്ചാണ് സജിത എഴുതിയ മത്സ്യഗന്ധി എന്ന നാടകം. ഇത് പുതിയൊരു കാര്യമല്ല എന്നു പറയാനാണിതൊക്കെ ഓര്‍ത്തെടുത്തത്. ഇങ്ങനെ പോകുന്നു വിമര്‍ശനം. 

മീന്‍മണം കൊണ്ട് തനിക്ക് ഓക്കാനം ഉണ്ടാകുമെന്ന് ശശി തരൂര്‍ പറഞ്ഞിട്ട് പോയാലെന്താ എന്നു കരുതുന്നവരുണ്ടാകും. പക്ഷേ, ഈ സവര്‍ണബോധമാണ് മുക്കുവത്തികളെ കീഴെയുള്ളവരായി കാണാന്‍ നഗരവാസികളെ പ്രേരിപ്പിക്കുന്നത്. അവര്‍ നാറുന്ന മോശക്കാരാണെന്ന് വിചാരിപ്പിക്കുന്നത്. മീന്‍ നാറ്റത്തിലുള്ള താഴ്ന്നവരെന്ന അവസ്ഥയാണ് അവരെ ആക്രമിക്കാം എന്ന ബോധം നഗരവാസികള്‍ക്കുണ്ടാക്കുന്നത്. അതുകൊണ്ടാണ് കുറച്ചു വര്‍ഷം മുമ്പ് പ്രശാന്ത് നഗറില്‍ മീന്‍ വിറ്റിരുന്ന സ്ത്രീകളെ അവിടത്തെ ചില ഗുണ്ടകള്‍ ചേര്‍ന്ന് പിടിച്ചു വലിച്ചുകൊണ്ടുപോയി ബലാത്സംഗം ചെയ്തത്. 

ശശി തരൂരിന്റെ മേല്‍ജാതിബോധത്തോടെയുള്ള, മുക്കുവരെ അപമാനിക്കുന്ന പ്രസ്താവന മുക്കുവര്‍ക്കെതിരായ സമൂഹബോധത്തിന് നീതീകരണമാവും എന്നതിനാലാണ് ശശി തരൂരിന്റെ പ്രസ്താവന അപകടകരമാവുന്നത്.

ശശി തരൂര്‍ ഈ പ്രസ്താവന പിന്‍വലിക്കണം എന്നാണ് സാമൂഹ്യ മാധ്യമങ്ങളുടെ അഭ്യര്‍ത്ഥന.

മുമ്പും തരൂര്‍ ഇത്തരത്തില്‍ കോണ്‍ഗ്രസിനെ വെട്ടിലാക്കിയിട്ടുണ്ട്.
തരൂരിനെ എല്ലാ കാലത്തും ജയിപ്പിച്ചിട്ടുള്ളത് തലസ്ഥാനത്തെ മത്സ്യ തൊഴിലാളി വിഭാഗമാണ്. കഴിഞ്ഞ തവണ ഒ. രാജഗോപാലി നോട് തോല്‍ക്കും എന്നായപ്പോള്‍ ജയിപ്പിച്ചതും അവര്‍ തന്നെ. എക്കാലത്തും തരൂര്‍ മത്സ്യതൊഴിലാളികളോട് നീതി പുലര്‍ത്തിയിരുന്ന ജന പ്രതിനിധിയാണ്. പുതിയ പ്രസ്താവനയുടെ പുതിയ വ്യാഖ്യാനം തിരിച്ചറിയാനുള്ള വിവേകം അവര്‍ക്കുണ്ട്. എന്നാല്‍ തെരഞ്ഞടുപ്പ് കാലത്ത് വര്‍ത്തമാനങ്ങളിലെല്ലാം ഒരു നോട്ടം അത്യാവശ്യം തന്നെയാണ്. പ്രത്യക്ഷത്തില്‍ തരൂരിന്റെ ട്വീറ്റിന് യാതൊരു പ്രശ്‌നവുമില്ല. എന്നാല്‍ അതിനെ പ്രശ്‌നമാക്കുകയാണ് ശത്രുക്കള്‍. മുമ്പും തരൂര്‍ നാക്ക് പിഴയില്‍ പലവട്ടം വീണിട്ടുണ്ട്. 

കെയ പി സി സി യുടെ വാക്കുകള്‍ തരൂര്‍ കേള്‍ക്കുമോ ഇല്ലെയോ എന്നാണ് ഇനി അറിയേണ്ടത്.