പത്തനംതിട്ടയിലും തിരുവനന്തപുരത്തും മോദി എത്തും. ആവേശമാക്കാന്‍ പ്രവര്‍ത്തകര്‍. ബിജെപി വിജയപ്രതീക്ഷ പുലര്‍ത്തുന്ന പത്തനംതിട്ടയിലും തിരുവനന്തപുരത്തും പ്രധാനമന്ത്രി നരേന്ദ്രമോദി പ്രചാരണത്തിനെത്തുന്നു. മോദിയുടെ മഹാസമ്മേളനങ്ങള്‍ തിരുവനന്തപുരത്തും പത്തനംതിട്ടയിലും ആവശ്യമാണെന്ന് ദേശീയനേതൃത്വത്തോട് പ്രചാരണത്തിന്റെ ചുക്കാന്‍ പിടിക്കുന്ന ആര്‍.എസ്.എസ് ആവശ്യപ്പെട്ടിട്ടുണ്ട്. ബിജെപിയുടെ തിരഞ്ഞെടുപ്പ് പ്രചാരണത്തിന് ആര്‍എസ്എസ് പ്രവര്‍ത്തകരെ പൂര്‍ണസമയവും നിയോഗിച്ച മണ്ഡലങ്ങളാണ് പത്തനംതിട്ടയും തിരുവനന്തപുരവും.

താഴെത്തട്ടില്‍ നടക്കുന്ന പ്രവര്‍ത്തനങ്ങളെ വോട്ടാക്കി മാറ്റണമെങ്കില്‍ മോദിയും പ്രമുഖ ദേശീയനേതക്കളും പങ്കെടുക്കുന്ന സമ്മേളനവും അതിന്റെ ആവേശവും വേണമെന്നാണ് ആര്‍.എസ്.എസ് വിലയിരുത്തല്‍. ശബരിമല വിഷയത്തിനു പിന്നാലെതന്നെ നരേന്ദ്രമോദിയെ പങ്കെടുപ്പിച്ച് പത്തനംതിട്ടയില്‍ മഹാസമ്മേളനം നടത്തുന്നതിന് ബി.ജെ.പി ഒരുങ്ങുകയും പരിപാടിയ്ക്ക് പ്രധാനമന്ത്രിയുടെ ഓഫീസ് അനുമതി നല്‍കുകയും ചെയ്തിരുന്നു. എന്നാല്‍ പിന്നീട് അത് മാറ്റിവയ്ക്കുകയായിരുന്നു. ഏപ്രില്‍ 10ന് ശേഷമാണ് കേരളത്തില്‍ നരേന്ദ്രമോദിയെത്തുക. ബി.ജെ.പി ഏറെ പ്രതീക്ഷപുലര്‍ത്തുന്ന മണ്ഡലമാണ് പത്തനംതിട്ട. ബിജെപിയുടെ തിരഞ്ഞെടുപ്പ് പ്രചാരണത്തിന് ആര്‍എസ്എസ് പ്രവര്‍ത്തകരെ പൂര്‍ണസമയവും നിയോഗിച്ച മണ്ഡലങ്ങളുമാണ് പത്തനംതിട്ടയും തിരുവനന്തപുരവും. പ്രധാനമന്ത്രിയെത്തുന്നതോടെ ഈ മണ്ഡലങ്ങളില്‍ കൂടുതല്‍ സാധ്യതതെളിയുമെന്നും നേതൃത്വം കണക്കുകൂട്ടുന്നു.

പ്രതിപക്ഷ കക്ഷികളുടെ ആരോപണങ്ങള്‍ തള്ളി തെരഞ്ഞെടുപ്പ് കമ്മീഷന്‍. പ്രധാനമന്ത്രിയുടെ മിഷന്‍ ശക്തി പ്രഖ്യാപനത്തില്‍ പെരുമാറ്റച്ചട്ട ലംഘനമില്ലെന്ന് കമ്മീഷന്റെ കണ്ടെത്തല്‍. പ്രഖ്യാപനത്തിനായി ഔദ്യോഗിക മാദ്ധ്യമങ്ങള്‍ ദുരുപയോഗം ചെയ്തുവെന്ന പരാതിയും കമ്മീഷന്‍ തള്ളി.

ഉപഗ്രഹ വേധ മിസൈല്‍ പരീക്ഷണത്തിലൂടെ ഇന്ത്യ വന്‍ ബഹിരാകാശ ശക്തിയായെന്ന പ്രധാനമന്ത്രിയുടെ പ്രഖ്യാപനത്തിനെതിരെ പ്രതിപക്ഷ കക്ഷികള്‍ ആരോപണവുമായി രംഗത്ത് വന്നിരുന്നു. തുടര്‍ന്ന് വിഷയം പരിശോധിക്കാനായി കമ്മീഷന്‍ അഞ്ചംഗ സമിതിയെ നിയോഗിച്ചിരുന്നു.

സമിതിയുടെ കണ്ടെത്തലിന്റെ അടിസ്ഥാനത്തിലാണ് പ്രധാനമന്ത്രി ചട്ടലംഘനം നടത്തിയിട്ടില്ലെന്ന് കമ്മീഷന്‍ വ്യക്തമാക്കിയത്. ദൂരദര്‍ശന്‍ വഴിയല്ല രാജ്യത്തെ അഭിസംബോധന ചെയ്!തതെന്നും വാര്‍ത്താ ഏജന്‍സിയുടെ ദൃശ്യങ്ങളാണ് ഉപയോഗിച്ചതെന്നും സമിതി വ്യക്തമാക്കി.