ലോക്‌സഭ തിരഞ്ഞെടുപ്പിന്റെ ചരിത്രത്തില്‍ കേരളത്തില്‍ വന്‍ പോളിംഗാണ് ഈ ഇത്തവണ ഉണ്ടായിട്ടുള്ളത്. ഈ സാഹചര്യത്തില്‍ പത്തനംതിട്ടയിലെയും തിരുവനന്തപുരത്തും പോളിംഗ് വര്‍ദ്ധിക്കുന്നത് ശ്രദ്ധേയമാണ്. കഴിഞ്ഞ തവണ പത്തനംതിട്ടയില്‍ വെറും 65 ശതമാനം പോളിംഗാണ് രേഖപ്പെടുത്തിയത്. എന്നാല്‍ ഇക്കുറി 75 ശതമാനം കഴിയാനാണ് സാദ്ധ്യത.

നേരം ഇരുട്ടിയിട്ടും പോളിംഗ് ബൂത്തുകളില്‍ ജനങ്ങള്‍ തടിച്ച് കൂടുന്നത് പോളിംഗ് വര്‍ദ്ധിക്കാന്‍ കാരണമാകുന്നു. തിരുവനന്തപുത്ത് 72 ശതമാനത്തിന് മുകളിലാണ് പോളിംഗ് നടന്നത്. കഴിഞ്ഞ തവണ അവിടെ 68 ശതമാനം മാത്രം പോളിംഗ് നടന്ന സ്ഥാനത്താണിത്. ഇവിടെ പോളിംഗ് വര്‍ദ്ധിച്ചത് മൂന്ന് മുന്നണികളും ഏറെ ആകാംക്ഷയോടെയാണ് ഉറ്റുനോക്കുന്നത്. നിരവധി വിഷയങ്ങള്‍ മണ്ഡലത്തില്‍ ചര്‍ച്ചയായിട്ടുണ്ടെന്ന് വിലയിരുത്തുന്നു.

ശക്തമായ മത്സരം നടക്കുന്ന പത്തനംതിട്ടയില്‍ ശബരിമല വിഷയം ചര്‍ച്ചയായിട്ടുണ്ട്. അത് ഇടതുപക്ഷത്തന് അനുകൂലമായിരിക്കുമോ പ്രതികൂലമായിരിക്കുമോ എന്നും പരിശോധിക്കേണ്ടതുണ്ട്. എന്നാല്‍ ഇത്തവണ ഈ രണ്ട് മണ്ഡലങ്ങളില്‍ ബി.ജെ.പി അവരുടെ ശക്തി തെളിയിച്ച് ജയിക്കാനുള്ള പോരാട്ടത്തിലാണ്. കുമ്മനത്തെ മിസോറാമില്‍ നിന്നും തിരിച്ച് വിളിച്ചതും കെ. സുരേന്ദ്രനെ അവസാന നിമിഷം കളത്തിലിറക്കിയതും മണ്ഡലത്തിലെ ജനങ്ങളെ സ്വാധീനിച്ചിട്ടുണ്ടെന്നും വിലയിരുത്തപ്പെടുന്നു.

എന്നാല്‍ ഇടതുപക്ഷം ശക്തമായ പ്രചാരണമാണ് മണ്ഡലത്തിലുടനീളം നടത്തിയത്. ബി.ജെ.പി നേതൃത്വത്തെ ഞെട്ടിച്ച് വയനാട്ടില്‍ മത്സരത്തിനെത്തിയ രാഹുല്‍ ഗാന്ധിയുടെ സ്വാധീനവും പോളിംഗ് വര്‍ദ്ധിക്കാന്‍ കാരണമായിട്ടുണ്ടമെന്നും വിലയിരുത്തുന്നു. എന്തായാലും ജനം ആര്‍ക്കൊപ്പം നില്‍ക്കും എന്നറിയാന്‍ ഇനിയും ഒരു മാസം കൂടി കാത്തിരിക്കണം എന്നേയുള്ളു.