വച്ചത് യോഗിക്ക് കൊണ്ടത്... തനിക്കെതിരെ വ്യാജ വാര്ത്ത നല്കിയ മാധ്യമ പ്രവര്ത്തകരെയെല്ലാം ജയിലിലിട്ടിരുന്നെങ്കിലെന്ന രാഹുല് ഗാന്ധിയുടെ പ്രസ്താവന ഏറ്റുപിടിച്ച് മാധ്യമ പ്രവര്ത്തകര്; തോറ്റതിന്റെ അരിശം മാറാതെ ഒളിയമ്പെയ്ത് രാഹുല്
കോണ്ഗ്രസ് അദ്ധ്യക്ഷന് രാഹുല് ഗാന്ധി ഇപ്പോഴും പരാജയത്തില് നിന്നും മുക്തി നേടിയിട്ടില്ല. ഒളിഞ്ഞും തെളിഞ്ഞും പരാജയത്തിന്റെ കാരണക്കാരായവരെ തെരഞ്ഞ് പിടിക്ക് ആക്രമിക്കുകയാണ് രാഹുല് ഗാന്ധി. മാധ്യമപ്രവര്ത്തകന് പ്രശാന്ത് കനൂജിയയുടെ അറസ്റ്റുമായി ബന്ധപ്പെട്ട് ഉത്തര് പ്രദേശ് മുഖ്യമന്ത്രി യോഗി ആദിത്യനാഥിനെതിരെ രൂക്ഷ വിമര്ശനവുമായി രാഹുല് ഗാന്ധി രംഗത്തെത്തിയിരുന്നു. എന്നാല് ആ പറഞ്ഞതില് പോലും വിപരീത അര്ത്ഥം കണ്ടെത്തുകയാണ് മാധ്യമ പ്രവര്ത്തകര്.
തനിക്കെതിരെ വ്യാജവാര്ത്ത നല്കിയ മാധ്യമ പ്രവര്ത്തകരെയെല്ലാം ജയിലിലിട്ടിരുന്നെങ്കില് പല പത്രങ്ങളിലും ജോലി ചെയ്യാന് ആളില്ലാതായേനെയെന്നാണ് പരിഹാസ രൂപേണ രാഹുല് ഗാന്ധി പറഞ്ഞത്.
എന്നെക്കുറിച്ച് വ്യാജ റിപ്പോര്ട്ടും വാര്ത്തയും ഫയല് ചെയ്യുന്ന, ബിജെപി ആര്.എസ്.എസ് സ്പോണ്സേര്ഡ് പ്രൊപ്പഗണ്ട നടപ്പിലാക്കുന്ന എല്ലാ മാധ്യമപ്രവര്ത്തകരെയും ജയിലിലിടുകയാണെങ്കില് മിക്ക പത്രങ്ങള്ക്കും ന്യൂസ് ചാനലുകള്ക്കും സ്റ്റാഫുകളുടെ വലിയ കുറവ് വരും. എന്നായിരുന്നു രാഹുലിന്റെ ട്വീറ്റ്. ഒപ്പം, യു.പി മുഖ്യമന്ത്രി ബുദ്ധിയില്ലാതെയാണ് പെരുമാറിയിരിക്കുന്നതെന്നും രാഹുല് കുറ്റപ്പെടുത്തി. അതേസമയം രാഹുലിന്റെ പ്രസ്താവനയ്ക്കെതിരെ പല പത്രക്കാരും രംഗത്തെത്തിയിരുന്നു. തോല്വിയുടെ ഉത്തരവാദിത്വം തങ്ങളുടെ തലയില് കയറ്റി വയ്ക്കേണ്ടെന്നാണ് അവര് പറയുന്നത്.
ഉത്തര് പ്രദേശ് മുഖ്യമന്ത്രി യോഗി ആദിത്യനാഥിനെ അപകീര്ത്തിപ്പെടുത്തുന്ന വീഡിയോ ഷെയര് ചെയ്തെന്ന് ആരോപിച്ച് കഴിഞ്ഞ ശനിയാഴ്ച പ്രശാന്ത് കനൂജിയയെ അറസ്റ്റു ചെയ്തത്.
എന്നാല്, മാധ്യമ പ്രവര്ത്തകന്റെ അറസ്റ്റ് നിയമ വിരുദ്ധമാണെന്ന് ആരോപിച്ചാണ് പ്രശാന്ത് കനോജിയയുടെ ഭാര്യ ജിഗിഷ ഹേബിയസ് കോര്പ്പസ് ഹര്ജിയുമായി സുപ്രീംകോടതിയെ സമീപിച്ചതോടെ, മുഖ്യമന്ത്രിയ്ക്ക് തിരിച്ചടി നേരിടേണ്ടി വന്നു. അറസ്റ്റ് ഭരണഘടനാ വിരുദ്ധമാണെന്നും മാധ്യമ പ്രവര്ത്തകനെ ഉടന് വിട്ടയ്ക്കണമെന്നും സുപ്രീംകോടതി നിര്ദ്ദേശിച്ചു.
ഈ കേസില് അറസ്റ്റും പത്ത് ദിവസത്തിലധികം നീണ്ട റിമാന്ഡും എന്തിനെന്ന് ജസ്റ്റിസ് രസ്തോഗി തിരിച്ചു ചോദിച്ചു. 'കനോജിയയെന്താ കൊലക്കേസ് പ്രതിയാണോ? എന്തടിസ്ഥാനത്തിലാണിത്?'', എന്നായിരുന്നു കോടതിയുടെ ചോദ്യം. തുടര്ന്ന് വ്യക്തിസ്വാതന്ത്ര്യത്തില് ഇത്തരം ഇടപെടലുണ്ടായാല് അതില് സുപ്രീംകോടതിയ്ക്ക് ഇടപെടാമെന്നും അതില് കീഴ്!വഴക്കത്തിന്റെ പ്രശ്നമില്ലെന്നും നിരീക്ഷിച്ച സുപ്രീംകോടതി, മാധ്യമപ്രവര്ത്തകനെ ഉടനടി ജാമ്യത്തില് വിടാന് ഉത്തരവിടുകയായിരുന്നു.
എന്നാല്, ദൈവത്തിനും മതത്തിനുമെതിരെ പ്രകോപനപരമായ ട്വീറ്റുകള് പ്രശാന്ത് കനോജിയ എഴുതിയിട്ടുണ്ടെന്നും അതിനാല് ഐപിസി 505ാം വകുപ്പ് കൂടി ചേര്ത്താണ് അറസ്റ്റ് രേഖപ്പെടുത്തിയതെന്നും യുപി സര്ക്കാരിന് വേണ്ടി ഹാജരായ അഡീഷണല് സോളിസിറ്റര് ജനറല് കോടതിയെ അറിയിച്ചു.
അതേസമയം, മാധ്യമപ്രവര്ത്തകരുടെ അറസ്റ്റിനെതിരെ വലിയ പ്രതിഷേധമാണുയര്ന്നത്. മാധ്യമപ്രവര്ത്തകരുടെ ദേശീയ കൂട്ടായ്മകളും എഡിറ്റേഴ്സ് ഗില്ഡും ഉടനടി ഇവരെ വിട്ടയക്കണമെന്നാവശ്യപ്പെട്ട് രംഗത്തെത്തിയിരുന്നു.
https://www.facebook.com/Malayalivartha
