ശബരിമല യുവതീപ്രവേശനത്തില് സര്ക്കാരിനെ വിമര്ശിച്ചും മുഖ്യമന്ത്രി പിണറായി വിജയനെ പിന്തുണച്ചും എസ്.എന്.ഡി.പി യോഗം ജനറല് സെക്രട്ടറി വെള്ളാപ്പള്ളി നടേശന് രംഗത്ത്
ശബരിമല യുവതീപ്രവേശനത്തില് സര്ക്കാരിനെ വിമര്ശിച്ചും മുഖ്യമന്ത്രി പിണറായി വിജയനെ പിന്തുണച്ചും എസ്.എന്.ഡി.പി യോഗം ജനറല് സെക്രട്ടറി വെള്ളാപ്പള്ളി നടേശന് രംഗത്ത്. കോടതി വിധി നടപ്പാക്കിയതില് സര്ക്കാരിന് വീഴ്ച പറ്റി. അതിന്റെ ഉത്തരവാദിത്വം മുഖ്യമന്ത്രി പിണറായി വിജയന്റെ മാത്രം തലയില് കെട്ടിവയ്ക്കുന്നത് ശരിയല്ല. കോടതി വിധി അന്തിമമാകുന്നത് വരെ വിധി നടപ്പാക്കാന് സര്ക്കാര് തയ്യാറാകരുതെന്നും അദ്ദേഹം കണിച്ചുകുളങ്ങരയില് ആവശ്യപ്പെട്ടു. പരാജയത്തിന് ഇടതുമുന്നണിക്ക് കൂട്ടുത്തരവാദിത്തമുണ്ട്. എല്.ഡി.എഫിന് തിരിച്ചുവരാന് കഴിയണമെങ്കില് പിന്നാക്ക ആഭിമുഖ്യം കൂട്ടണമെന്നും വെള്ളാപ്പള്ളി നടേശന് ആവശ്യപ്പെട്ടു. ന്യൂനപക്ഷങ്ങള് സംഘടിത വോട്ട് ബാങ്കായി നിന്ന് ആനുകൂല്യങ്ങള് കൈപ്പറ്റുകയാണ്. എന്.എസ്.എസിന് മാടമ്പിത്തരമാണ്. കാറ്റ് നോക്കി തൂറ്റുകയാണ് അവര് ചെയ്യുന്നതെന്നും അദ്ദേഹം ആരോപിച്ചു.
വിപ്ലവ പാര്ട്ടികള് ജാതി നോക്കി സ്ഥാനാര്ത്ഥികളെ നിര്ത്തുന്നത് ദുരവസ്ഥയാണ്. ആലപ്പുഴയില് സി.പി.എം ആരിഫിനെ ലോക്സഭാ തെരഞ്ഞെടുപ്പില് മത്സരിപ്പിച്ചത് മുസ്്ലിം വോട്ട് ബാങ്ക് നോക്കിയാണെന്നും വെള്ളാപ്പള്ളി ആരോപിച്ചു. 2024ലും നരേന്ദ്രമോദി തന്നെ രാജ്യം ഭരിക്കുമെന്നും രാഹുല് ഗാന്ധി വയനാട്ടില് വന്നിട്ട് പ്രത്യേകിച്ച് കാര്യമില്ലെന്നും ഗതാഗത തടസ്സം സൃഷ്ടിക്കുക മാത്രമാണ് അദ്ദേഹത്തിന് ചെയ്യാന് കഴിയുന്നതെന്നും വെള്ളാപ്പള്ളി പരിഹസിച്ചു. ശബരിമല സംബന്ധിച്ച സുപ്രീം കോടതി വിധി നടപ്പാക്കിയതില് സര്ക്കാരിന് വീഴ്ച പറ്റിയിട്ടുണ്ട്. അത് എല്ഡിഎഫ് തിരിച്ചറിഞ്ഞതില് സന്തോഷമുണ്ടെന്നും വെള്ളാപ്പള്ളി നടേശന് വ്യക്തമാക്കി. ചൊവ്വാഴ്ച നടന്ന തെരഞ്ഞടുപ്പ് അവലോകന യോഗത്തില് ശബരിമല തെരഞ്ഞെടുപ്പ് തോല്വിക്ക് കാരണമായെന്ന് എല്.ഡി.എഫ് വിലയിരുത്തിയതിന് പിന്നാലെയാണ് വെള്ളാപ്പള്ളിയുടെ പ്രതികരണം.
ശബരിമല യുവതീപ്രവേശനത്തെ വെള്ളാപ്പള്ളി തുടക്കം മുതലേ എതിര്ക്കുന്നുണ്ടെങ്കിലും സര്ക്കാരിനെ പിന്തുണയ്ക്കുന്ന നിലപാടാണ് സ്വീകരിച്ച് പോരുന്നത്. അത് തന്നെ ഇപ്പോഴും ആവര്ത്തിക്കുകയാണ്. തെരഞ്ഞെടുക്കപ്പെട്ട സര്ക്കാരിനും മുഖ്യമന്ത്രിക്കും ഇങ്ങിനെയല്ലാതെ ഒന്നും ചെയ്യാന് കഴിയില്ലെന്നും വെള്ളാപ്പള്ളി പലതവണ പറഞ്ഞു. വിധി നടപ്പാക്കാന് ധൃതി കാട്ടിയ മുഖ്യമന്ത്രിയെ അദ്ദേഹം കുറ്റപ്പെടുത്തുന്നേയില്ല. എല്.ഡി.എഫിലെ ഘടകക്ഷികള്ക്കെല്ലാം ഉത്തരവാദിത്തം ഉണ്ടെന്നാണ് അദ്ദേഹം പറയുന്നത്. എന്നാല് തെരഞ്ഞെടുപ്പ് പരാജയകാരണം ശബരിമല തന്നെയാണെന്ന് ലോക് താന്ത്രിക് ജനതാദള് എല്.ഡി.എഫ് യോഗത്തില് രൂക്ഷവിമര്ശനം നടത്തിയിരുന്നു. ആര്. ബാലകൃഷ്ണപിള്ളയും ജനാധിപത്യ കേരളാ കോണ്ഗ്രസ് നേതാവ് ഫ്രാന്സിസ് ജോര്ജ്ജും ഇതേ വിമര്ശനം ഉന്നയിച്ചു. തുടര്ന്ന് വിമര്ശനം ഉള്ക്കൊള്ളുന്നതായി മുഖ്യമന്ത്രി സമ്മതിച്ചെന്നാണ് റിപ്പോര്ട്ട്.
അടിസ്ഥാന വര്ഗത്തിന്റെ ജീവിത നിലവാരം ഉയര്ത്താനോ ഒപ്പം കൂട്ടാനോ കഴിയാത്തത് കൊണ്ടാണ് ഇടത്പക്ഷം പരാജയപ്പെട്ടതെന്ന് തെരഞ്ഞെടുപ്പ് ഫലം വന്നതിന് പിന്നാലെ വെള്ളാപ്പള്ളി പറഞ്ഞിരുന്നു. അതില് നിന്ന് വ്യത്യസ്തമായ പ്രതികരണമാണ് ഇന്നുണ്ടായത്. ചില പാര്ട്ടികള് പിളരുന്തോറും എം.എല്.എമാരും എം.പിമാരും കൂടുകയാണ്. അഞ്ച് ദേവസ്വം ബോര്ഡുകളിലും പിന്നോക്കക്കാര്ക്ക് അയിത്തമാണിപ്പോഴും. ക്ഷേത്ര പ്രവേശനം ഇപ്പോഴും യഥാര്ത്ഥ രീതിയില് ലഭിച്ചിട്ടുണ്ടോ എന്ന് പരിശോധിക്കണമെന്നുമാണ് അന്ന് പറഞ്ഞത്. എന്നാല് അതിന് വിപരീതമായാണ് പിന്നോക്കക്കാരായ യുവതികളെ ഉള്പ്പെടെ ശബരിമലയില് പ്രവേശിപ്പിക്കരുതെന്ന് വെള്ളാപ്പള്ളി ഇന്ന് ആവശ്യപ്പെട്ടത്.
https://www.facebook.com/Malayalivartha