ബിജെപി മുസ്ലീം ലീഗിനെ സപ്പോര്‍ട്ട് ചെയ്യുന്നത് നാട്ട് നടപ്പല്ല. ഇനിയങ്ങനെ നടന്നാല്‍ പോലും അത് ചിലര്‍ അംഗീകരിക്കില്ല. അത്തരമൊരു അവസ്ഥയാണ് കഴിഞ്ഞ ദിവസം നിയമസഭയില്‍ ഉണ്ടായത്. നിയമസഭയില്‍ ബി.ജെ.പിയുടെ സമയം മുസ്ലീം ലീഗിന് നല്‍കിയതാണ് വിവാദമായത്. ബി.ജെ.പിയുടെ ഏക എം.എല്‍.എ ഒ. രാജഗോപാലിന്റെയും എന്‍.ഡി.എ എം.എല്‍.എ പി.സി ജോര്‍ജിന്റെയും സമയം മുസ്ലീം ലീഗ് എം.എല്‍.എ എന്‍. ഷംസുദീന് നല്‍കിക്കൊണ്ട് സ്പീക്കര്‍ക്ക് കത്ത് നല്‍കി. എന്‍.ഡി.എ അംഗങ്ങള്‍ക്ക് അനുവദിച്ച മൂന്ന് മിനിറ്റ് സമയമാണ് മുസ്ലീം ലീഗിന് നല്‍കിയത്.

മുസ്ലീം ലീഗ്ബി.ജെ.പി പരോക്ഷ സഹകരണത്തിനെതിരെ വിമര്‍ശനവുമായി ഭരണകക്ഷി രംഗത്ത് വന്നു. ബി.ജെ.പിയുടെ വോട്ട് വാങ്ങി ജയിച്ചവര്‍ സഭയില്‍ അവരുടെ സമയവും ചോദിച്ച് വാങ്ങുന്നുവെന്നും ടി.വി രാജേഷ് എം.എല്‍.എ വിമര്‍ശിച്ചു. പ്രകടമായി അകലം പാലിക്കുമ്‌ബോഴും അന്തര്‍ധാര സജീവമാണെന്നും രാജേഷ് കൂട്ടിച്ചേര്‍ത്തു. പി.ടി തോമസും ഒ. രാജഗോപാലും പലപ്പോഴും ഒരുമിച്ചാണ് വോക്കൗട്ട് നടത്തുന്നത്. അതിന്റെ തുടര്‍ച്ചയാണോ സമയം അനുവദിച്ചതെന്ന് എം സ്വരാജ് ചോദിച്ചു.

അതേസമയം വളരെ ബാലിശമായ കാര്യങ്ങളാണ് ഇടതുപക്ഷം പറയുന്നതെന്നും സൗഹൃദത്തിന്റെ പേരിലാണ് എന്‍.ഡി.എ അംഗങ്ങളുടെ സമയം വാങ്ങിയതെന്നുമാണ് എന്‍. ഷംസുദീന്റെ വാദം. എന്‍.ഡി.എ അംഗങ്ങളുടെ സമയം വാങ്ങിയതില്‍ മുസ്ലീം ലീഗിനുള്ളിലും അമര്‍ഷമുണ്ടെന്നാണ് സൂചനകള്‍. തെരഞ്ഞെടുപ്പിന് മുമ്പ് ചര്‍ച്ചയായ കോലീബി സഖ്യവും ഇതോടൊപ്പം ചര്‍ച്ചയാകുകയാണ്. 

ശബരിമല യുവതീ പ്രവേശന വിഷയത്തിലും ഒ. രാജഗോപാലിന്റെ അഭിപ്രായം ഏറെ വിവാദമാക്കിയിരുന്നു. യുവതീ പ്രവേശനം ആകാമെന്ന രാജഗോപാലിന്റെ ലേഖനം ബിജെപിയെ പ്രതിരോധത്തിലുമാക്കിയിരുന്നു. 

ശബരിമലയിലെ യുവതി പ്രവേശനമല്ല ബിജെപിയുടെ പ്രക്ഷോഭത്തിന്റെ വിഷയമെന്ന് രാജഗോപാല്‍ വ്യക്തമാക്കിയിരുന്നു. റിവ്യു ഹര്‍ജി സുപ്രീം കോടതി പരിഗണിക്കാനിരിക്കെ സമരം ചെയ്തിട്ട് കാര്യമെന്തെന്നും അദ്ദേഹം ചോദിച്ചു. ശബരിമലയിലെ പോലീസ് നടപടിയും അടിസ്ഥാന സൗകര്യ പ്രശ്‌നങ്ങളുമാണ് സമര വിഷയങ്ങളെന്നും അദ്ദേഹം വിശദീകരിച്ചു. 

ശബരിമലയില്‍ സമരം ചെയ്യാന്‍ പാടില്ലെന്നത് ബിജെപിയുടെ ആദ്യം മുതലുള്ള നിലപാടായിരുന്നു. കാരണം തീര്‍ത്ഥാടനത്തിന് എത്തുന്ന സ്ഥലമാണ് ശബരിമല. അവര്‍ക്ക് അത് അസൗകര്യങ്ങളുണ്ടാക്കുമെന്നും അദ്ദേഹം വ്യക്തമാക്കി.

സെക്രട്ടേറിയേറ്റിന് മുന്നില്‍ നടത്തിയത് ബിജെപിയുടേത് രാഷ്ട്രീയ സമരമാണെന്നും ഒ. രാജഗോപാല്‍ പറഞ്ഞു. സര്‍ക്കാരിനെതിരായ സമരം വ്യാപിപ്പിക്കുന്നതിനാണ് സെക്രട്ടറിയേറ്റിന് മുന്നിലേക്ക് മാറ്റിയത്. സെക്രട്ടറിയേറ്റ് സമരം ഒത്തുതീര്‍പ്പല്ലായിരുന്നെന്നും ഒ. രാജഗോപാല്‍ പറഞ്ഞിരുന്നു.

അതേസമയം നിയമസഭ ഉപതെരഞ്ഞെടുപ്പ് വരാനിരിക്കുന്ന സമയത്ത് ബിജെപി ലീഗ് സഖ്യം ഇരു പാര്‍ട്ടികളേയും കോണ്‍ഗ്രസിനേയും ഒരു പോലെ പ്രതിരോധത്തിലാക്കുകയാണ്. കോലീബി സഖ്യം കഴിഞ്ഞ തെരഞ്ഞെടുപ്പിലും സിപിഎം നന്നായി ഉപയോഗിച്ചിരുന്നു. എന്നാല്‍ ആരും അതില്‍ വീണില്ലെന്നത് വേറൊരു കാര്യം.