ബിരിയാണി തിന്നു; 10000 രൂപ കിട്ടി; വ്യത്യസ്തമായി ബിരിയാണി തീറ്റ മത്സരം
ചൂടുള്ള ബിരിയാണി രുചി ആസ്വദിച്ചു കഴിക്കുന്നവരാണ് നാം. എന്നാൽ അതൊരു മൽസരമായാല്ലോ. ഭക്ഷണം കഴിക്കുന്ന മല്സരം പലതുണ്ടെങ്കിലും കുറഞ്ഞ സമയത്തിനുളളില് ബിരിയാണി അകത്താക്കുന്നവരെ കണ്ടെത്താന് ഒരു തീറ്റ മത്സരം നടന്നു. ഒന്നാം സമ്മാനം 10000 രൂപയും. പാലക്കാട്ടു നടന്ന മത്സരത്തിൽ പങ്കെടുക്കാൻ എത്തിയവരുടെ തിരക്കു കാരണം നാലു ഘട്ടങ്ങളായിട്ടാണ് മല്സരം പൂര്ത്തിയായത്. 350 പേർ പങ്കെടുത്ത മത്സരത്തിൽ ഒരു കിലോ ബിരിയാണി ഒന്നര മിനിറ്റില് അകത്താക്കിയ കൊണ്ട് പാറ സ്വദേശി ആദർശാണ് ഒന്നാം സമ്മാനം അടിച്ചെടുത്തത്. ഒരു മിനിറ്റ് 36 സെക്കന്റ് കൊണ്ടാണ് ആദർശ് ബിരിയാണി കഴിച്ചത്. യാക്കര സ്വദേശി വിനോദ് ഒരു മിനിറ്റ് 56 സെക്കന്റ് കൊണ്ട് ബിരിയാണി കഴിച്ചു കൊണ്ട് രണ്ടാം സ്ഥാനം നേടി. 5000 രൂപയായിരുന്നു രണ്ടാം സമ്മാനം. ജന്മനാ കാഴ്ച കുറവുളള വിനോദിന്റെ വിജയം ഏവരെയും അത്ഭുതപ്പെടുത്തി.
ഉദ്ഘാടകന് വിസില് മുഴക്കിയതോടെ ചൂടേറിയ ബിരിയാണി തീറ്റമല്സരം തുടങ്ങി. ഇടം വലം നോക്കാതെ കടുത്ത തീറ്റയായിരുന്നു പിന്നീട് കണ്ടത്. ഒന്നാം സമ്മാനം അടിച്ചെടുക്കണം എന്ന ഉദ്ദേശത്തോടെ ബിരിയാണിയുടെ രസവും രുചിയും ആസ്വദിക്കാൻ സമയമില്ലാതെ വിഴുങ്ങി വെളളം കുടിക്കുകയായിരുന്നു എല്ലാവരും. ഒരു കിലോ ബിരിയാണി ഏറ്റവും കുറഞ്ഞ സമയത്തിനുള്ളില് തിന്നു തീര്ക്കുന്നവര്ക്ക് പതിനായിരം രൂപയായിരുന്നു സമ്മാനം. ഗ്രീന്വാലി ഓഫ് പാലക്കാടും ബഫറ്റ് ലോഞ്ചും സംയുക്തമായി സംഘടിപ്പിച്ച മല്സരത്തില് ഒന്പതു വയസുകാരി മുതല് വിവിധ പ്രായത്തിലുള്ളവർ പങ്കെടുത്തു. ഏവർക്കും ആവേശമായി മാറി ഈ മത്സരം.
https://www.facebook.com/Malayalivartha