വൻ സുരക്ഷാ വീഴ്ച്ച; ഗവര്‍ണര്‍ പി സദാശിവത്തെ കാണാനെത്തിയ കേരളാ സര്‍വ്വകലാശാല വൈസ്‍ചാന്‍സിലര്‍ക്കെതിരെ യൂത്ത് കോണ്‍ഗ്രസിന്‍റെ പ്രതിഷേധം; വൈസ്‍ചാന്‍സിലര്‍ വി പി മഹാദേവന്‍ പിള്ളയുടെ വാഹനം യൂത്ത് കോണ്‍ഗ്രസ് തടഞ്ഞു
ഗവര്‍ണര്‍ പി സദാശിവത്തെ കാണാനെത്തിയ കേരളാ സര്‍വ്വകലാശാല വൈസ്‍ചാന്‍സിലര്‍ക്കെതിരെ യൂത്ത് കോണ്‍ഗ്രസിന്‍റെ പ്രതിഷേധം. വൈസ്‍ചാന്‍സിലര്‍ വി പി മഹാദേവന്‍ പിള്ളയുടെ വാഹനം യൂത്ത് കോണ്‍ഗ്രസ് തടഞ്ഞു. കേരള സര്‍വ്വകലാശാല പരീക്ഷാക്രമക്കേടുമായി ബന്ധപ്പെട്ട് ഗവര്‍ണര്‍ വിളിപ്പിച്ചതിന് പിന്നാലെയാണ് വി പി മഹാദേവന്‍ പിള്ള രാജ്‍ഭവനിലെത്തിയത്.
ഗവര്‍ണറെ കണ്ട് മടങ്ങുന്നതിനിടെയായിരുന്നു പ്രതിഷേധം. വൈസ്‍ചാന്‍സിലറുടെ കാര്‍ അഞ്ചുമിനിറ്റോളം യൂത്ത് കോണ്‍ഗ്രസ് പ്രവര്‍ത്തകര്‍ തടഞ്ഞു. വൈസ്‍ചാന്‍സിലര്‍ രാജിവെക്കണമെന്ന് ആവശ്യപ്പെട്ടായിരുന്നു യൂത്ത് കോണ്‍ഗ്രസിന്‍റെ പ്രതിഷേധം. ഈ സമയത്ത് ആവശ്യത്തിന് പൊലീസുകാര്‍ സുരക്ഷയ്ക്കുണ്ടായിരുന്നില്ല. തുടര്‍ന്ന് പ്രവര്‍ത്തകരുടെ വലയം ഭേദിച്ച് വിസിയെ കാറില്‍ പുറത്തെത്തിക്കുകയായിരുന്നു.വിസിയെ തടഞ്ഞ പ്രവര്‍ത്തകര്‍ പിരിഞ്ഞുപോകുന്നതിനിടെ പൊലീസുമായി വാക്കറ്റേമുണ്ടായി. ഇതോടെ വെള്ളയമ്പലത്ത് ചെറിയ രീതിയില്‍ സംഘര്‍ഷമുണ്ടായി.
ഗവര്‍ണറുടെ ഇടപെടല്‍ ആവശ്യപ്പെട്ട് പ്രതിപക്ഷ നേതാവ് രമേശ് ചെന്നിത്തല രാജഭവനിലെത്തി ഗവര്‍ണറെ കണ്ടതിനു പിന്നാലെെയാണ് ഇരുവരെയും ഗവര്‍ണര്‍ വിളിപ്പിച്ചത്. യൂണിവേഴ്സിറ്റി കോളേജ് സംഘര്‍ഷവുമായി ബന്ധപ്പെട്ട് കേരള ഗവര്‍ണര്‍ പി സദാശിവത്തിന്‍റെ നിലപാടിനെതിരെ ബിജെപി രൂക്ഷവിമര്‍ശനം നടത്തിയിരുന്നു. യൂണിവേഴ്സിറ്റി കോളേജ് സംഘര്‍ഷവും അതിനെ തുടര്‍ന്നുണ്ടായ പരീക്ഷാ ക്രമക്കേടുകളും ആധികാരികമായി തെളിഞ്ഞിട്ടും ഗവര്‍ണര്‍ പാറക്കല്ല് പോലെ ഇരിക്കുന്നത് കുറ്റകരമായ അനാസ്ഥയാണെന്നായിരുന്നു ബിജെപി വക്താവ് ബി ഗോപാലകൃഷ്ണന്‍റെ ആരോപണം.
നേരത്തേ പരീക്ഷാ ക്രമക്കേടുമായി ബന്ധപ്പെട്ട് വൈസ്‍ചാന്‍സിലറോട് ഗവര്‍ണര്‍ അടിയന്തര റിപ്പോര്‍ട്ട് ആവശ്യപ്പെട്ടിരുന്നു. യൂണിവേഴ്സിറ്റി കോളേജിൽ നടന്ന വധശ്രമക്കേസിലെ പ്രധാന പ്രതിയുടെ വീട്ടിൽ നിന്നും യൂണിയന്‍ ഓഫീസ് പ്രവര്‍ത്തിച്ചിരുന്ന മുറിയിൽ നിന്നും സര്‍വ്വകലാശാല പരീക്ഷയുടെ ഉത്തരക്കടലാസുകെട്ടുകളും സീലുകളും കണ്ടെടുത്തിരുന്നു.
അതേസമയം യൂണിവേഴ്സിറ്റി കോളേജ് സംഘര്‍ഷത്തിലും പിഎസ്‌സി പരീക്ഷയിലെ ക്രമക്കേടിലും പ്രതിഷേധിച്ച്‌ കെഎസ്‌യു നടത്തിയ സെക്രട്ടറിയേറ്റ് മാര്‍ച്ചില്‍ സംഘര്‍ഷം ഉണ്ടായി. പോലീസ് ബാരിക്കേഡ് മറികടന്ന് മുന്നേറാന്‍ ശ്രമിച്ച പ്രവര്‍ത്തകര്‍ക്ക് നേരെ ജലപീരങ്കി പ്രയോഗിച്ചു. തുടര്‍ന്ന് പോലീസും പ്രതിഷേധക്കാരും തമ്മില്‍ ഉന്തും തള്ളുമുണ്ടായി. പോലീസ് നടപടിയില്‍ പ്രതിഷേധിച്ച്‌ റോഡില്‍ കുത്തിയിരുന്ന പ്രവര്‍ത്തകരെ അറസ്റ്റ് ചെയ്തു നീക്കി. പോലീസ് വാഹനത്തിനുള്ളില്‍ പ്രവര്‍ത്തകരെ പോലീസ് മര്‍ദ്ദിച്ചുവെന്ന് ആരോപിച്ച്‌ സൗത്ത് സ്റ്റേഷന് മുന്നില്‍ പ്രതിഷേധക്കാര്‍ കുത്തിയിരുന്നു. ഇവരെ പോലീസ് ലാത്തിവീശി ഓടിച്ചു.
https://www.facebook.com/Malayalivartha
