വീട്ടില്‍ വെള്ളം അടിക്കാന്‍ മോഹനന്‍ മോട്ടര്‍ ഓണാക്കിയതും കിണറില്‍ നിന്ന് തീ ആളിപ്പര്‍ന്നു. എന്താണ് സംഭവിക്കുന്നതെന്ന് അറിയാതെ മോഹനനും വീട്ടുകാരും ഭയന്നു. നിമിഷങ്ങള്‍ക്കകം മോട്ടറും പമ്പും പൈപ്പും കത്തിനശിച്ചു. അതോടെ ഫയര്‍ഫോഴ്‌സിനെ വിവരം അറിയിച്ചു. അവരെത്തി കിണര്‍ പരിശോധിക്കാന്‍ തുടങ്ങിയപ്പോഴേക്കും നാട്ടുകാര്‍ മുഴുവനും പ്രദേശത്ത് തമ്പടിച്ചിരുന്നു. പരിശോധനയില്‍ വെള്ളത്തില്‍ പെട്രോളിന്റെ അംശം ഉള്ളതാതി കണ്ടെത്തി. കോഴിക്കോട് കൊട്ടാങ്ങല്‍ തൈപ്പറമ്പില്‍ മോഹനന്റെയും സമീപവാസികളുടെയും വീടുകളിലെ കിണറുകളില്‍ സമീപത്തെ പമ്പില്‍ നിന്ന് പെട്രോള്‍ ചോരുന്നുണ്ടെന്ന് സംശയിക്കുന്നു.

കെട്ടാങ്ങല്‍ റോഡിലെ പെട്രോള്‍ പമ്പിന് സമീപമാണ് മോഹനന്‍ അടക്കം നിരവധിപേര്‍ താമസിക്കുന്നത്. ഇന്നലെ രാവിലെയാണ് സമീപത്തെ വീടുകളിലെ കിണര്‍ വെള്ളത്തിന് അരുചി അനുഭവപ്പെട്ടത്. കിണര്‍ വെള്ളത്തില്‍ ഓയിലും പാടയും കണ്ടതോടെ നാട്ടുകാര്‍ക്ക് സംശയം തോന്നി. വെള്ളത്തിന് പെട്രോളിന്റെ മണം കൂടി ഉണ്ടായതോടെ നാട്ടുകാര്‍ പൊലീസിലും ആരോഗ്യവകുപ്പിലും പരാതി നല്‍കി. ആരോഗ്യവകുപ്പ് അധികൃതര്‍ നടത്തിയ പരിശോധനയില്‍ രുചിവ്യത്യാസവും ഗന്ധവും ഉണ്ടായതിനെതുടര്‍ന്ന് സാമ്പിള്‍ ശേഖരിച്ചു. വെള്ളം കുടിക്കരുതെന്ന് വീട്ടുകാര്‍ക്ക് നിര്‍ദ്ദേശവും നല്‍കി. ചോര്‍ച്ചയുണ്ടെന്ന് പമ്പ് അധികൃതര്‍ നേരത്തെ മനസ്സിലാക്കിയിരുന്നതായി നാട്ടുകാര്‍ ആരോപിച്ചു. ഇന്നലെ ജീവനക്കാര്‍ നേരത്തെ പമ്പ് പൂട്ടി പോയതാണ് സംശയത്തിനിടയാക്കിയത്.

കിണര്‍ വെള്ളത്തില്‍ പാടയും പെട്രോള്‍ മണവും ഉണ്ടെന്ന് അഗ്‌നിശമനസേന ഉദ്യോഗസ്ഥരും അറിയിച്ചു. അതേസമയം സമീപത്തെ പെട്രോള്‍ പമ്പിലെ ടാങ്ക് ചോര്‍ച്ചയാണോ ഇതിന് കാരണമന്ന് വിശദ പരിശോധന നടത്തിയാല്‍ മാത്രമേ പറയാനാവൂ എന്ന് ഫയര്‍ഫോഴ്‌സ് ഉദ്യോഗസ്ഥരും പൊലീസും അറിയിച്ചു. പെട്രോള്‍ പമ്പുകള്‍ക്ക് സമീപമുള്ള കിണറുകളിലെ വെള്ളത്തില്‍ മുമ്പും ഓയില്‍ കലര്‍ന്നിട്ടുണ്ടെങ്കിലും തീ പിടിക്കുന്നത് ആദ്യത്തെ സംഭവമാണ്. ജിയോളജി വകുപ്പ് അധികൃതരെ വിവരം അറിയിച്ചിട്ടുണ്ട്. ജില്ലയുടെ മലയോരമേഖലയിലടക്കം മലയിടിച്ചിലും മണ്ണിടിച്ചിലും ഉണ്ടായിട്ടുണ്്. അതിനാല്‍ ആ വഴിക്കുള്ള പരിശോധനകളും നടത്തും.

കിണറുകള്‍ ഉപയോഗശൂന്യമായതോടെ നാട്ടുകാര്‍ക്ക് കുടിവെള്ളക്ഷാമം അനുഭവപ്പെടുന്നു. പഞ്ചായത്ത് അധികൃതര്‍ ഇടപെട്ട് പ്രശ്‌നം പരിഹരിക്കണമെന്ന് നാട്ടുകാര്‍ ആവശ്യപ്പെട്ടു. സംഭവം ശ്രദ്ധയില്‍ പെട്ടിട്ടുണ്ടെന്നും കുടിവെള്ള വിതരണത്തിനുള്ള സംവിധാനം ഏര്‍പ്പെടുത്തുമെന്നും അധികൃതര്‍ അറിയിച്ചു. സംസ്ഥാനത്തിന്റെ പലയിടങ്ങളിലും മുമ്പ് കിണറുകള്‍ ഇടിഞ്ഞ് താഴുന്ന പ്രതിഭാസം ഉണ്ടായിട്ടുണ്ടെങ്കിലും തീ പിടിക്കുന്നത് ആദ്യമായാണ്. സമീപത്തുള്ള കിണറുകളിലെ മോട്ടര്‍ പ്രവര്‍ത്തിപ്പിക്കരുതെന്ന് ഫയര്‍ഫോഴ്‌സ് മുന്നറിയിപ്പ് നല്‍കിയിട്ടുണ്ട്.