പാലാ ഉപതെരഞ്ഞെടുപ്പിൽ എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശന്റെ പിന്തുണ തനിക്ക് ഇരട്ടി ഊർജമായെന്ന് പാലായിലെ ഇടത് സ്ഥാനാർഥി മാണി സി. കാപ്പൻ. വെള്ളാപ്പള്ളിയുടെ കൂടി പിന്തുണ ഉറപ്പായതോടെ ഇടതു മുന്നണിയുടെ ആത്മവിശ്വാസം വർധിച്ചു എന്നും പാലായിലെ സാമുദായിക ഘടകങ്ങൾ ഇടതുപക്ഷത്തിന് അനുകൂലമാണെന്നും വിജയം ഉറപ്പാണെന്നും മാണി സി. കാപ്പൻ പറഞ്ഞു. പാലാ ഉപതെരഞ്ഞെടുപ്പിൽ ഇടതുപക്ഷത്തിനാണ് പിന്തുണയെന്നും സമുദായ അംഗങ്ങൾക്കിടയിൽ കാപ്പന് അനുകൂലമായ തരംഗമാണെന്നുമായിരുന്നു വെള്ളാപ്പള്ളി നേരത്തെ പ്രതികരിച്ചത്. യുഡിഎഫ് സ്ഥാനാർഥി ജോസ് ടോമിന് ജനകീയ മുഖമില്ലെന്ന് വെള്ളാപ്പള്ളി വിമർശനം ഉന്നയിക്കുകയും ചെയ്തു.

അതേസമയം ഉപതെരഞ്ഞെടുപ്പിൽ ഇടത് സ്ഥാനാർഥിക്ക് വെള്ളാപ്പള്ളി നടേശൻ പിന്തുണ പ്രഖ്യാപിച്ചത് തിരിച്ചടിയുണ്ടാക്കില്ലെന്ന് യുഡിഎഫ് സ്ഥാനാർഥി ജോസ് ടോം പ്രതികരിച്ചു.

എസ്എൻഡിപി യോഗം രാഷ്ട്രീയ നിലപാട് പ്രഖ്യാപിക്കാത്തതിനാൽ വെള്ളാപ്പള്ളിയുടെ പ്രസ്താവന തിരിച്ചടിയുണ്ടാക്കുമെന്ന് കരുതുന്നില്ല എന്നും അദ്ദേഹം പ്രതികരിച്ചു. പാലായിലെ വോട്ടർമാർ രാഷ്ട്രീയ ബോധ്യത്തോടെ വോട്ടു ചെയ്യുമെന്നും യുഡിഎഫ് വിജയം നേടുമെന്നും ജോസ് ടോം പ്രതികരിച്ചു.