വിവാഹം കഴിഞ്ഞത് ശുഭമുഹൂർത്തത്തിലാണെങ്കിലും, ഗൃഹപ്രവേശത്തിനുള്ള സമയം തെറ്റാതിരിക്കാനുള്ള തത്രപ്പാടിൽ വധുവിന്റെ കൈപിടിച്ച് സ്വന്തം വീട്ടിലേക്ക് ഓടുന്ന വരന്റെ ദൃശ്യങ്ങളാണ് ഇപ്പോൾ സോഷ്യൽ മീഡിയയിൽ തരംഗം. 'വീട്ടിൽ കയറേണ്ട സമയം 1.30... 1:29 ആയപ്പോൾ വീടിന്റെ മുന്നിലെത്തി ഒന്നും ആലോചിച്ചില്ല... ഒരു ഓട്ടം' എന്ന തലക്കെട്ടോടെയാണ് ഈ ദൃശ്യങ്ങൾ പ്രചരിക്കുന്നത്.

വിവാഹച്ചടങ്ങുകൾ ശുഭ മുഹൂർത്തവും പൊരുത്തവും ജാതകവുമൊക്കെ നോക്കി നിശ്ചയിക്കുമ്പോൾ പെടാപ്പാട് പെടുന്നത് ബന്ധുക്കളും, വധൂവരന്മാരും തന്നെയാണ്. എന്തായാലും സമയത്തു തന്നെ വീട്ടിൽ കയറാൻ നവവധുവും, വരനും കാണിച്ച കുറുക്കു വഴി ഇതിനോടകം തന്നെ സോഷ്യൽ മീഡിയയിൽ ചിരി പടർത്തിയിരിക്കുകയാണ്.