പഞ്ചായത്തു തിരഞ്ഞെടുപ്പ് അടുത്തുവരുന്നതോടെ മന്ത്രിസഭയുടെ മുഖം മിനുക്കാന്‍ കോണ്‍ഗ്രസ് നേതൃത്വം. ബാര്‍ കോഴാ വിഷയവും മന്ത്രിസഭയുടെ പ്രതിഛായയ്ക്ക് മങ്ങലേല്‍പ്പിച്ചെന്ന് ഹൈക്കമാന്‍ഡ് വിലയിരുത്തുന്നുണ്ട്. ഒരിടവേളയ്ക്കു ശേഷം മന്ത്രിസഭാ അഴിച്ചുപണിയെന്ന ആശയം കോണ്‍ഗ്രസില്‍ വീണ്ടും സജീവമാകുന്നുവെന്നാണ് സൂചനകള്‍.

മുതിര്‍ന്ന നേതാവ് എകെ ആന്റണിയാണ് നീക്കത്തിന് പിന്നില്‍. സ്പീക്കര്‍ ജി കാര്‍ത്തികേയനെ മന്ത്രിയാക്കുന്നത് ഉള്‍പ്പെടെയുള്ള നിര്‍ദ്ദേശങ്ങള്‍ പരിഗണിക്കണമെന്നാണ് ആന്റണിയുടെ ആഗ്രഹം. എന്നാല്‍ ഈ നീക്കത്തെ മുഖ്യമന്ത്രി ഉമ്മന്‍ ചാണ്ടി അനുകൂലിക്കുന്നില്ല. ബാര്‍ കോഴ സംഭവത്തോടെ യുഡിഎഫ് വിരുദ്ധവികാരം ജനങ്ങള്‍ക്കിടയില്‍ ശക്തിപ്പെടുന്നതിനാല്‍ പ്രതിസന്ധിക്ക് ഉടന്‍ പരിഹാരം കാണണമെന്ന് കോണ്‍ഗ്രസ് പ്രവര്‍ത്തകസമിതി അംഗം എ കെ ആന്റണി സംസ്ഥാനത്തെ നേതാക്കളെ അറിയിച്ചിട്ടുണ്ട്. പരിഹാരം ഔദ്യോഗികമായി നിര്‍ദേശിച്ചിട്ടില്ല.

എന്നാല്‍, മന്ത്രിസഭാ അഴിച്ചുപണി നല്ലതാണെന്ന ചിന്തയിലാണ്. ബജറ്റ് സമ്മേളനം സുഗമമായി നടത്താനും പ്രാദേശിക തെരഞ്ഞെടുപ്പില്‍ യുഡിഎഫിന് പിടിച്ചുനില്‍ക്കാനും ഇത് നല്ലതായിരിക്കുമെന്ന അഭിപ്രായം ഡല്‍ഹിയില്‍ കൂടിക്കാഴ്ച കോണ്‍ഗ്രസ് എംഎല്‍എമാരോട് ആന്റണി തന്നെ വ്യക്തമാക്കി.
പുനഃസംഘടനയിലെ സജീവമായി ചര്‍ച്ചയാകുന്നത് വകുപ്പുമാറ്റമാണ്. ബാര്‍ കോഴയില്‍ പ്രതിപക്ഷ പ്രക്ഷോഭം നേരിടുന്ന മാണിയെ ധനവകുപ്പില്‍നിന്ന് മാറ്റുക എന്നതടക്കമുള്ള നടപടികളാണ് കോണ്‍ഗ്രസിലെ ഒരു വിഭാഗം നിര്‍ദേശിക്കുന്നത്. മാണിയില്‍നിന്ന് ധനകാര്യം മാറ്റി പി ജെ ജോസഫിനെ ഏല്‍പ്പിക്കുക എന്ന നിര്‍ദേശവുമുണ്ട്. എന്നാല്‍ ഒരുതരത്തിലെ പുനഃസംഘടനയ്ക്കുമില്ലെന്ന നിലപാടിലാണ് കെഎം മാണി. തനിക്കെതിരെ കേസും പ്രക്ഷോഭവും നടക്കുന്നതിനാല്‍, ഈ ഘട്ടത്തില്‍ മന്ത്രിസഭാ പുനഃസംഘടന വേണ്ടെന്നാണ് മാണിയുടെയും അഭിപ്രായം.
വകുപ്പുമാറ്റം, മന്ത്രിമാരെ മാറ്റല്‍, നേതൃമാറ്റം എന്നിവ അജണ്ടയാക്കിയാണ് ചര്‍ച്ചകള്‍. വകുപ്പുമാറ്റം മാത്രം പോരാ, മന്ത്രിമാരെ മാറ്റി അഴിച്ചുപണി വേണമെന്നാണ് കോണ്‍ഗ്രസിലെ ഒരുവിഭാഗം എംഎല്‍എമാരുടെ അഭിപ്രായം. മുഖ്യമന്ത്രിയായി രമേശ് ചെന്നിത്തലയെ കൊണ്ടുവന്ന് പ്രതിച്ഛായ മെച്ചപ്പെടുത്തുകയെന്ന നിര്‍ദേശമാണ് ഐ വിഭാഗത്തിനുള്ളത്. ഈ മൂന്ന് നിര്‍ദേശങ്ങളും മുഖ്യമന്ത്രി ഉമ്മന്‍ ചാണ്ടി അംഗീകരിക്കുന്നില്ല. ചാണ്ടിയേയും ചെന്നിത്തലയേയും നേരിടാന്‍ കോണ്‍ഗ്രസിനുള്ളില്‍ത്തന്നെ മൂന്നാം ഗ്രൂപ്പ് ഒരുങ്ങുന്നുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha