രാജ്യത്തെ വിവിഐപികളില്‍ പ്രധാനപ്പെട്ടയാളാണ് കോണ്‍ഗ്രസ് മുന്‍ അധ്യക്ഷന്‍ കൂടിയായ രാഹുല്‍ ഗാന്ധി. മുന്‍ പ്രധാനമന്ത്രി രാജീവ് ഗാന്ധിയോടുള്ള ആദര സൂചകമായാണ് ഗാന്ധി കുടുംബത്തിന് എസ്.പി.ജി.യുടെ കനത്ത സുരക്ഷ നല്‍കുന്നത്. രാഹുല്‍ ഗാന്ധി കോണ്‍ഗ്രസ് അധ്യക്ഷനായതോടെ ആ സുരക്ഷ വര്‍ധിപ്പിക്കുകയും ചെയ്തു. എന്നാല്‍ വിദേശ രാജ്യങ്ങളില്‍ സന്ദര്‍ശനം നടത്തുമ്പോള്‍ രാഹുല്‍ ഗാന്ധി സുരക്ഷാ സേനയെ ഒഴിവാക്കി സ്വതന്ത്രമായി സഞ്ചരിക്കുന്നു എന്ന വിവരമാണ് പുറത്ത് വന്നിരിക്കുന്നത്.

രാഹുല്‍ ഗാന്ധി നടത്തിയ വിദേശയാത്രകളിലും മറ്റും സുരക്ഷാവീഴ്ച ഉണ്ടായിട്ടുണ്ടെന്നാണ് കേന്ദ്രസര്‍ക്കാരും നല്‍കുന്ന സൂചന. 1991 മുതല്‍ രാഹുല്‍ നടത്തിയ 156 വിദേശസന്ദര്‍ശനങ്ങളില്‍ 143 തവണയും അദ്ദേഹം എസ്.പി.ജി. സുരക്ഷ ഒഴിവാക്കി. രാജ്യത്തു പലയിടത്തും സഞ്ചരിക്കുമ്പോള്‍ രാഹുല്‍ ബുള്ളറ്റ് പ്രൂഫ് വാഹനം ഉപയോഗിച്ചിട്ടില്ലെന്നാണ് മറ്റൊരു കണ്ടെത്തല്‍. ഇതോടെ രാഹുലിന്റെ വിദേശയാത്രകളെ പറ്റി ചര്‍ച്ചകളും ആരംഭിച്ചിട്ടുണ്ട്. സുരക്ഷ സേനയെ ഒഴിവാക്കി രാഹുല്‍ ആരെ കാണുന്നുവെന്നാണ് ചര്‍ച്ചയാകുന്നത്.

പ്രധാനമന്ത്രിക്കും കുടുംബാംഗങ്ങള്‍ക്കും സുരക്ഷാഭീഷണിയുള്ള മുന്‍ പ്രധാനമന്ത്രിമാര്‍ക്കും കുടുംബാംഗങ്ങള്‍ക്കും സുരക്ഷ നല്കുന്നത് എസ്.പി.ജി.യാണ്. 2015 മുതല്‍ ഈ വര്‍ഷം മേയ് വരെ ബുള്ളറ്റ് പ്രൂഫ് സുരക്ഷയില്ലാത്ത വാഹനത്തില്‍ 1,892 തവണയാണ് രാഹുല്‍ ഡല്‍ഹിയില്‍ യാത്ര ചെയ്തത്. ഡല്‍ഹിക്കു പുറത്തുള്ള യാത്രകളില്‍ ഈ വര്‍ഷം ജൂണ്‍ വരെയുള്ള കണക്കില്‍ 247 തവണയും സുരക്ഷാ പ്രോട്ടോക്കോള്‍ ലംഘിച്ചു. യു.പി.എ. സര്‍ക്കാര്‍ ഭരിച്ച 2005 മുതല്‍ 2014 വരെയുള്ള കാലയളവില്‍ രാജ്യത്തിന്റെ വിവിധ ഭാഗങ്ങളില്‍ 18 തവണ ബുള്ളറ്റ് കവചമില്ലാത്ത വാഹനത്തില്‍ രാഹുല്‍ സഞ്ചരിച്ചു.

2017 ഓഗസ്തില്‍ ഗുജറാത്തിലെ ബനസ്‌കന്ദയില്‍ രാഹുല്‍ സഞ്ചരിച്ച കാറിനു നേരേ കല്ലേറുണ്ടായിരുന്നു. എസ്.പി.ജി. ഉദ്യോഗസ്ഥനു പരിക്കേറ്റു. ഈ വിഷയം ലോക്‌സഭയില്‍ കോണ്‍ഗ്രസ് ഉന്നയിച്ചപ്പോള്‍ 2015 ഏപ്രിലിനും 2017 ജൂണിനുമിടയില്‍ നടത്തിയ 121 യാത്രകളില്‍ നൂറിലും രാഹുല്‍ ബുള്ളറ്റ് പ്രൂഫ് വാഹനം ഉപയോഗിച്ചില്ലെന്നാണ് അന്നത്തെ ആഭ്യന്തരമന്ത്രി രാജ്‌നാഥ് സിങ് നല്‍കിയ മറുപടി.

അതേസമയം, സുരക്ഷാ പ്രോട്ടോകോള്‍ രാഹുല്‍ പാലിക്കുന്നില്ലെന്നാണ് ഒരു വിഭാഗം എസ്.പി.ജി. ഉദ്യോഗസ്ഥരുടെ വിമര്‍ശനം. എസ്.പി.ജി. സുരക്ഷയുള്ളവര്‍ക്ക് എല്ലാ സമയവും സുരക്ഷ നല്‍കണമെന്നാണ് ചട്ടമെന്നും വിദേശയാത്രയും അതില്‍ ഉള്‍പ്പെടുമെന്നുമാണ് വാദം. വിദേശയാത്രകളില്‍ ഒപ്പം പോവുന്നതിനെക്കുറിച്ച് എസ്.പി.ജി. നിയമത്തില്‍ പ്രത്യേകം പറയുന്നില്ലെന്നും വാദമുണ്ട്. അതിനാല്‍ തന്നെ രാഹുല്‍ഗാന്ധി സമ്മതിച്ചില്ലെങ്കിലും കനത്ത സുരക്ഷ ഒരുക്കാനാണ് തീരുമാനം.

ലോക്‌സഭാ തെരഞ്ഞെടുപ്പിലെ ദയനീയ പരാജയത്തെതുടര്‍ന്ന് കോണ്‍ഗ്രസ് അധ്യക്ഷ സ്ഥാനം രാജിവെച്ച രാഹുല്‍ഗാന്ധിയെ സംബന്ധിച്ച് നേരത്തേയും വിദേശയാത്രകള്‍ ചര്‍ച്ചയായിരുന്നു. രാഷ്ട്രീയമായി രാഹുല്‍ ഗാന്ധി പരാജയമാകുന്ന കാഴ്ചയാണ് കാണുന്നത്. രാഹുല്‍ ഗാന്ധി നേതൃത്വതലത്തിലെ ചര്‍ച്ചകളിലും കൂടിയാലോചനകളിലും പങ്കെടുക്കാതെ നിര്‍ജീവമായിരിക്കുകയാണിപ്പോള്‍. നെഹ്‌റു കുടുംബത്തിന്റെ പരമ്പരാഗത സീറ്റായ അമേഠിയില്‍പോലും പരാജയപ്പെട്ട രാഹുല്‍, വയനാട് എം.പി എന്ന നിലയിലുള്ള പ്രവര്‍ത്തനങ്ങള്‍ മാത്രമാണിപ്പോള്‍ നടത്തുന്നത്.

രാഹുലിന് പകരമായെത്തിയ സോണിയ ഗാന്ധിക്ക് ആക്ടിംഗ് പ്രസിഡന്റെന്ന നിലയിലും കോണ്‍ഗ്രസിനെ ഉണര്‍ത്താന്‍ ഇതുവരെ കഴിഞ്ഞിട്ടില്ല. പ്രിയങ്കഗാന്ധിക്കാവട്ടെ കോണ്‍ഗ്രസ് ജനറല്‍ സെക്രട്ടറിയായിട്ടും യു.പിയില്‍പോലും കോണ്‍ഗ്രസിന് പുതുജീവന്‍ നല്‍കാന്‍ കഴിയാത്ത അവസ്ഥയാണുള്ളത്. ഭര്‍ത്താവ് റോബര്‍ട്ട് വാധ്രക്കെതിരായ കേസുകളും ഇന്ദിര ഗാന്ധിയുടെ പന്‍ഗാമിയായി വാഴ്ത്തുപ്പെടുന്ന പ്രിയങ്കയുടെ പോരാട്ടത്തിന് വലിയ വിലങ്ങുതടിയാണ്. ഇതിനിടയിലാണ് രാഹുലിന്റെ വിദേശയാത്രാ വിവാദങ്ങളും.