ആ ചിറകിന് പകരമായി മോദിയെ കാണാന്‍ അമോല്‍ എത്തി. സ്വപ്നത്തിന് ചിറക് നല്‍കിയ മോദിയെക്കാണാന്‍ വീടിന്റെ ടെറസില്‍ വിമാനം നിര്‍മ്മിച്ച അമോല്‍ യാദവ് എത്തി. രാജ്യത്തെ ആദ്യ തദ്ദേശീയ എയര്‍ക്രാഫ്റ്റ് നിര്‍മ്മാണ ഫാക്ടറിയ്ക്കുള്ള മുപ്പത്തയ്യായിരം കോടിയുടെ കരാര്‍ കിട്ടിയ മഹാരാഷ്ട്ര സ്വദേശി അമോല്‍ യാദവും പ്രധാനമന്ത്രി നരേന്ദ്ര മോദിയും കൂടിക്കാഴ്ച നടത്തി. പദ്ധതിക്ക് എല്ലാവിധ പിന്തുണയും അമോലിന് മോദി ഉറപ്പ് നല്‍കി.

കൂടാതെ രാജ്യത്തിന്റെ പുരോഗതിക്ക് സംഭാവന നല്‍കാനാഗ്രഹിക്കുന്ന ദശലക്ഷക്കണക്കിന് യുവാക്കള്‍ക്ക് പ്രചോദനമാണ് അമോല്‍ യാദവെന്നും അദ്ദേഹം പറഞ്ഞു. പ്രധാനമന്ത്രി തന്റെ പദ്ധതിയെ പിന്തുണയ്ക്കുന്നു എന്നറിഞ്ഞതില്‍ അതിയായ സന്തോഷമുണ്ടെന്ന് കൂടിക്കാഴ്ചയ്ക്ക് ശേഷം യാദവ് പ്രതികരിച്ചു. മോദി തന്നെ വീട്ടിലേക്ക് ക്ഷണിച്ചതില്‍ സന്തുഷ്ടനാണെന്നും അദ്ദേഹം വ്യക്തമാക്കി. സ്വപ്നം ഇപ്പോള്‍ പൂര്‍ത്തീകരിക്കപ്പെട്ടിട്ടുണ്ടോ എന്ന് അദ്ദേഹം ചോദിച്ചു. എന്റെ പ്രോജക്റ്റിനെക്കുറിച്ച് അദ്ദേഹം കേട്ടിട്ടുണ്ടെന്നത് എന്നെ സംബന്ധിച്ചിടത്തോളം അപ്രതീക്ഷിതമായിരുന്നു. പദ്ധതികളെക്കുറിച്ച് പ്രധാനമന്ത്രി കൂടുതല്‍ കാര്യങ്ങള്‍ ചോദിച്ചറിഞ്ഞു. കൂടാതെ എല്ലാവിധ പിന്തുണയും അദ്ദേഹം വാഗ്ദാനം ചെയ്തുവെന്ന് യാദവ് വ്യക്തമാക്കി. മുംബയിലെ സബര്‍ബനിലെ തന്റെ വീടിന്റെ ടെറസില്‍ ആറ് സീറ്റുകളുള്ള പരീക്ഷണാത്മക വിമാനം 18 വര്‍ഷം കൊണ്ട് യാദവ് നിര്‍മ്മിച്ചു.

1998ലാണ് സ്വന്തമായൊരു വിമാനം നിര്‍മ്മിക്കണമെന്ന് അദ്ദേഹം ആഗ്രഹിച്ച് തുടങ്ങിയത്. എന്നാല്‍ ഡയറക്ടര്‍ ജനറല്‍ ഒഫ് സിവില്‍ ഏവിയേഷനില്‍ നിന്ന് ക്ലിയറന്‍സ് നേടുന്നതില്‍ യാദവ് ബുദ്ധിമുട്ടുകള്‍ നേരിട്ടിരുന്നു. ഇതേക്കുറിച്ച് അറിഞ്ഞ മഹാരാഷ്ട്ര മുഖ്യമന്ത്രി ദേവേന്ദര്‍ ഫഡ്നാവിസാണ് ഇക്കാര്യം പ്രധാനമന്ത്രിയുടെ ശ്രദ്ധയില്‍പ്പെടുത്തിയത്. തുടര്‍ന്ന് മോദിയുടെ ഇടപെടലിനെത്തുടര്‍ന്ന് അമോല്‍ യാദവിന് ഡിജിസിഎയില്‍ നിന്ന് ക്ലിയറന്‍സ് കിട്ടി.