സംസ്ഥാനത്ത് മഴ കനക്കുന്ന സാഹചര്യത്തില്‍ ചീഫ് സെക്രട്ടറി ടോംജോസിന്റെ നേതൃത്വത്തില്‍ ഉന്നതതല യോഗം ചേരും. മധ്യകേരളത്തിലും തെക്കന്‍ കേരളത്തിലും പരക്കെ മഴയാണ്. ഉച്ചയ്ക്ക് ശേഷം ശക്തമായ ഇടിമിന്നലിന് സാധ്യതയുണ്ട്. അതിതീവ്ര ന്യൂനമര്‍ദ്ദം രൂപപ്പെട്ടേക്കും. ചിലപ്പോഴത് ചുഴലിക്കാറ്റായി മാറിയേക്കും. മത്സ്യത്തൊഴിലാളികള്‍ ജാഗ്രത പാലിക്കണം. മണിക്കൂറില്‍ 45 മുതല്‍ 55 കിലോമീറ്റര്‍ വേഗത്തില്‍ കാറ്റടിക്കാന്‍ സാധ്യതയുണ്ട്. അതിനാല്‍ കേരള, കര്‍ണാടക, ലക്ഷദ്വീപ് തീരങ്ങളിലെ മത്സ്യത്തൊഴിലാളികള്‍ കടലില്‍ പോകരുതെന്നും മുന്നറിയിപ്പ് നല്‍കിയിട്ടുണ്ട്. നാല് ദിവസം കൂടി മഴ ശക്തമായി പെയ്യും. മഴയത്ത് റോഡുകളില്‍ വെള്ളം കയറിയതിനാല്‍ ഗതാഗതം പലയിടത്തും തടസ്സപ്പെട്ടിട്ടുണ്ട്. ആളുകള്‍ക്ക് സുഗമമായി വോട്ട് ചെയ്യാനുള്ള സാഹചര്യം ഇല്ലാത്തതിനാല്‍ വോട്ടെടുപ്പ് മാറ്റിവയ്ക്കണമെന്ന് രാഷ്ട്രീയ പാര്‍ട്ടികള്‍ ആവശ്യപ്പെട്ടിട്ടുണ്ട്.

തിരുവനന്തപുരത്ത് മഴയ്ക്ക് അല്‍പം ശമനമുണ്ട്. താഴ്ന്നപ്രദേശങ്ങളില്‍ വെള്ളംകയറിയതിനാല്‍ പല കുടുംബങ്ങളും വീടൊഴിഞ്ഞു. കൃഷിയിടങ്ങളും മറ്റും വെള്ളത്തിലായി. കൊച്ചി നഗരത്തിലെ റോഡുകളില്‍ വെള്ളക്കെട്ട് രൂപപ്പെട്ടതിനാല്‍ ഗതാഗതം തടസപ്പെട്ടു. എം.ജി. റോഡ്, സൗത്ത് , നോര്‍ത്ത് റെയില്‍വേ സ്‌റ്റേഷനുകളിലേക്കുള്ള റോഡുകള്‍, കലൂര്‍ ബസ് സ്റ്റാന്‍ഡ്, സ്‌റ്റേഡിയം എന്നിവിടങ്ങളിലെല്ലാം വെള്ളംകയറി. കലൂര്‍ സബ് സ്‌റ്റേഷനില്‍ വെള്ളം കയറിയതോടെ വൈദ്യുതിവിതരണം തടസപ്പെട്ടു. അതേസമയം വോട്ടെടുപ്പ് മാറ്റിവയ്‌ക്കേണ്ട സാഹചര്യം ഇല്ലെന്ന് മുഖ്യതെരഞ്ഞെടുപ്പ് ഓഫീസര്‍ ടിക്കാറാം മീണ അറിയിച്ചു. ചിലയിടങ്ങളില്‍ വോട്ടിംഗിന് ബുദ്ധിമുട്ടുണ്ടാകുന്നുണ്ട്. ആവശ്യമെങ്കില്‍ ആറ് മണി കഴിഞ്ഞ് പോളിംഗ് നീട്ടുമെന്നും അദ്ദേഹം അറിയിച്ചു. സ്ഥിതിഗതികള്‍ നിരീക്ഷിച്ചുവരുകയാണെന്നും അദ്ദേഹം പറഞ്ഞു.

എറണാകുളം, ആലപ്പുഴ, പത്തനംതിട്ട ജില്ലകളിലെ വോട്ടെടുപ്പ് നടക്കുന്ന മണ്ഡലങ്ങളില്‍ രാവിലെ മുതല്‍ ശക്തമായ മഴയുണ്ട്. ഈ ജില്ലകളിലെല്ലാം ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. ഉച്ചയ്ക്ക് ശേഷം ഇവിടങ്ങളിലും തിരുവനന്തപുരത്തും ഉച്ചയ്ക്ക് ശേഷം മഴ കൂടാന്‍ സാധ്യതയുണ്ടെന്ന് ദുരന്തനിവാരണ അതോറിറ്റി സെക്രട്ടറി ശേഖര്‍ കുര്യാക്കോസ് അറിയിച്ചു. ന്യൂനമര്‍ദ്ദത്തെ തുടര്‍ന്നാണ് ഇന്ന് രാവിലെ ശക്തമായ മഴ ഉണ്ടായതെന്നും അതീവ ഗുരുതരമായ സ്ഥിതിവിശേഷം ഇല്ല. ജനങ്ങള്‍ പരിഭ്രാന്തരാകേണ്ട സാഹചര്യമില്ലെന്നും അദ്ദേഹം പറഞ്ഞു.

കോന്നിയില്‍ രാവിലെ ശക്തമായ മഴയായതിനാല്‍ ഉള്‍പ്രദേശങ്ങളില്‍ ഉള്ളവര്‍ക്ക് വോട്ട് ചെയ്യാന്‍ എത്താനാകുമോ എന്ന ആശങ്ക രാഷ്ട്രീയ പാര്‍ട്ടികള്‍ക്കുണ്ടായിരുന്നു. പതിനൊന്ന് മണി കഴിഞ്ഞതോടെ മഴ അല്‍പം ശമിച്ചു. മഞ്ചേശ്വരം ഒഴികെയുള്ള മണ്ഡലങ്ങളില്‍ മഴ ഉണ്ട്. തിരുവനന്തപുരത്ത് വോട്ടെടുപ്പ് നടക്കുന്ന വട്ടിയൂര്‍ക്കാവില്‍ മഴ കുറഞ്ഞിട്ടുണ്ട്. പത്തനംതിട്ട, എറണാകുളം ജില്ലകളില്‍ 20 സെന്റീമീറ്റര്‍ മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ഇന്നും നാളെയുമായായിരിക്കും ഇത് ലഭിക്കുക. ആലപ്പുഴയിലും അതിശക്തമായ മഴയുണ്ടാകും.

ട്രാക്കുകളില്‍ വെള്ളംകയറിയതിനാല്‍ ആലപ്പുഴയ്ക്കും എറണാകുളത്തിനും ഇടയില്‍ ട്രെയിന്‍ സര്‍വീസുകള്‍ തടസപ്പെട്ടു. എറണാകുളംആലപ്പുഴ പാസഞ്ചര്‍ റദ്ദാക്കി. എറണാകുളം- നിസാമുദ്ദീന്‍ മംഗള എക്‌സ്പ്രസ് (12617) രണ്ട് മണിക്കൂറോളം വൈകിയേ യാത്രതിരിക്കുകയുള്ളൂ. കൊല്ലം ജില്ലയിലെ ചില മേഖലയില്‍ വ്യാപകനാശനഷ്ടമുണ്ടായി. മണ്‍റോ തുരത്തില്‍ രണ്ടുവീടുകള്‍ തകര്‍ന്നു.