ഇന്നലെ രാത്രി മുതല് പെയ്യുന്ന കനത്ത മഴ കൊച്ചിയെ വിഴുങ്ങുന്നു. എറണാകുളം എം.പി ഹൈബി ഈഡന്റേത് ഉള്പ്പെടെ നിരവധി പേരുടെ വീടുകള് വെള്ളത്തിനടിയിലായി
ഇന്നലെ രാത്രി മുതല് പെയ്യുന്ന കനത്ത മഴ കൊച്ചിയെ വിഴുങ്ങുന്നു. എറണാകുളം എം.പി ഹൈബി ഈഡന്റേത് ഉള്പ്പെടെ നിരവധി പേരുടെ വീടുകള് വെള്ളത്തിനടിയിലായി. ഹൈബിയുടെ കാറും വെള്ളത്തില് മുങ്ങി. പലയിടത്തും ആളുകള് വോട്ടിന് പോലും പോകാതെ വീട്ടിനുള്ളില് കഴിയുകയാണ്. മഴതുടങ്ങി അരമണിക്കൂറിനുള്ളില് വീട്ടിലെ പല സാധനങ്ങളും വെള്ളത്തിനടിയിലായെന്ന് നാട്ടുകാര് പറയുന്നു. സാധാരണ കൊച്ചിയില് മഴക്കാലത്ത് വെള്ളം കയറാറുണ്ടെങ്കിലും ഇതുപോലെ പൊടുന്നനെയുള്ള വെള്ളപ്പൊക്കം ആദ്യമാണെന്നും കൊച്ചി നിവാസികള് പറയുന്നു. റോഡില് വെള്ളം കയറിയതോടെ ഗതാഗതം പൂര്ണമായും താറുമാറായിരുന്നു. പലരും മെട്രോയെയാണ് ആശ്രയിച്ചത്. എന്നാല് മെട്രോ സ്റ്റേഷനുകളിലെല്ലാം വെള്ളം കയറിയിരുന്നു.
മഴയ്ക്ക് മുമ്പേ ഓടകള് ഉള്പ്പെടെ വെള്ളം ഒഴുകിപ്പോകാനുള്ള സൗകര്യങ്ങള് വൃത്തിയാക്കാത്തതാണ് കനത്തമഴയില് കൊച്ചിയില് വെള്ളം ഉയരാന് കാരണമെന്നും ആരോപണമുണ്ട്. കഴിഞ്ഞ പ്രളയകാലത്ത് പോലും വെള്ളം കയറാത്ത പല സ്ഥലങ്ങളും ഇന്നലത്തെ മഴയില് മുങ്ങി്. പ്രളയത്തില് ദുരിതാശ്വാസ ക്യാമ്പായി പ്രവര്ത്തിച്ചയിടങ്ങളും ഇന്ന് വെള്ളത്തിലാണ്. കോടിക്കണക്കിന് രൂപയാണ് കാനകള് നന്നാക്കാനും വൃത്തിയാക്കാനും നഗരസഭയും മറ്റും ചെലവഴിക്കുന്നത്. കലൂര് സബ്സ്റ്റേഷനില് ഒന്നരമീറ്റര് ഉയരത്തില് വെള്ളം കയറിയതിനെ തുടര്ന്ന് പലയിടത്തും വൈദ്യുതി മുടങ്ങി. ചതുപ്പുകള് ഉള്പ്പെടെ അനധികൃതമായി നികത്തിയതും വെള്ളം ഉയരാന് കാരണമായി.
മഴകാരണം എറണാകുളം മണ്ഡലത്തില് പലയിടത്തും വോട്ടിംഗ് തടസ്സപ്പെട്ടിരുന്നു. രാവിലെ 11 മണിവരെ 4.6 ശതമാനം പോളിങ് മാത്രമാണ് നടന്നത്. പല ബൂത്തുകളിലും വെള്ളം കയറിയിരുന്നു. പോളിംഗ് ഓഫീസര്മാര് വെള്ളത്തിലിരുന്നാണ് തെരഞ്ഞെടുപ്പ് നടത്തിയത്. മഴ ശക്തമായി തുടരുന്ന സാഹചര്യത്തില് വോട്ടിംഗ് മാറ്റിവെക്കണമെന്ന ആവശ്യവും രാഷ്ട്രീയ പാര്ട്ടികള് ഉയര്ത്തിയിരുന്നു. വോട്ടര്മാര്ക്ക് പോളിങ് ബൂത്തുകളില് കയറാന് കയറാന് പോലും പറ്റാത്ത സാഹചര്യത്തില് വോട്ടിങ് മാറ്റിവെക്കണമെന്ന് യുഡിഎഫ് ആവശ്യപ്പെട്ടിട്ടും ഫലമുണ്ടായില്ല.
ജില്ലയില് പ്രൊഫഷണല് കോളേജുകള് ഉള്പ്പെടെ എല്ലാ വിദ്യാഭ്യാസ സ്ഥാപനങ്ങള്ക്കും ജില്ലാ കളക്ടര് നാളെ അവധി പ്രഖ്യാപിച്ചു. എം.ജി സര്വകാലാശാല നാളെ നടത്താനിരുന്ന പരീക്ഷകള് മാറ്റിവെച്ചു. പുതുക്കിയ തീയതി പിന്നീട് അറിയിക്കും.
കൊച്ചി നഗരത്തില് കഴിഞ്ഞ പത്ത് വര്ഷത്തിനിടെ നിരവധി താഴ്ന്ന പ്രദേശങ്ങളും ചതുപ്പ് നിലങ്ങളും മണ്ണും മാലിന്യവും മറ്റും ഉപയോഗിച്ച് നികത്തിയെടുത്തതിനാല് മഴവെള്ളം സുഗമമായി ഒഴുകി പോകുന്നില്ല. പലയിടത്തും വെള്ളം കെട്ടിക്കിടക്കുകയാണ്. താഴ്ന്ന സ്ഥലങ്ങളിലേക്ക് മറ്റിടങ്ങളിലെ വെള്ളം ഒഴുകിയെത്തുകയാണ്. പെട്ടെന്ന് വെള്ളം ഉയര്ന്നതിനാല് വീടുകളിലെ സാധനങ്ങളും മറ്റും മാറ്റാന് ആളുകള് നന്നേ ബുദ്ധിമുട്ടി. വെള്ളക്കെട്ടിന് ശ്വാശതപരിഹാരം ഉണ്ടാകണമെന്ന് സ്ഥാനാര്ത്ഥികളോടും നേതാക്കളോടും നാട്ടുകാര് ആവശ്യപ്പെട്ടു. തെരഞ്ഞെടുപ്പ് അടുക്കുമ്പോള് മാത്രം നാട്ടുകാരെ തേടിയെത്തുന്ന സമീപനം മാറ്റണമെന്നും അവര് ആവശ്യപ്പെട്ടു.
https://www.facebook.com/Malayalivartha