ചാര്‍ജ് വര്‍ധന ആവശ്യപ്പെട്ട് സംസ്ഥാനത്തെ സ്വകാര്യ ബസുകള്‍ അടുത്തമാസം 20ന് സൂചനാ പണിമുടക്ക് നടത്തും. തൃശൂരില്‍ ചേര്‍ന്ന കേരള സ്റ്റേറ്റ് പ്രൈവറ്റ് ബസ് ഓപ്പറേറ്റേഴ്‌സ് ഫെഡറേഷന്‍ സംസ്ഥാന കൗണ്‍സില്‍ യോഗത്തിലാണ് തീരുമാനം.മിനിമം ചാര്‍ജ് പത്തു രൂപയാക്കുക, വിദ്യാര്‍ഥികളുടെ കണ്‍സഷന്‍ ചാര്‍ജ് 50 ശതമാനം വര്‍ധിപ്പിക്കുക, കെഎസ്ആര്‍ടിസിയും സ്വകാര്യ ബസുകളും ഒരുപോലെ സംരക്ഷിക്കാന്‍ ഗതാഗതനയം രൂപീകരിക്കുക തുടങ്ങിയ ആവശ്യങ്ങളുന്നയിച്ചാണ് സമരമെന്നു ഫെഡറേഷന്‍ സംസ്ഥാന പ്രസിഡന്റ് എം.ബി. സത്യന്‍ പത്രസമ്മേളനത്തില്‍ പറഞ്ഞു.
കെഎസ്ആര്‍ടിസിയിലെ കണ്‍സഷന്‍ കാര്‍ഡ് സംവിധാനം സ്വകാര്യ ബസുകളില്‍ ഏര്‍പ്പെടുത്തുകയോ സ്വകാര്യ ബസുകളിലെ യാത്രാസൗജന്യം കെഎസ്ആര്‍ടിസിയില്‍ നടപ്പാക്കുകയോ ചെയ്യണം. ഈ ആവശ്യങ്ങള്‍ ഉന്നയിച്ച് അടുത്തമാസം ആറിന് എല്ലാ ജില്ലാ ആസ്ഥാനങ്ങളിലും ബസുടമകളുടെ കൂട്ടധര്‍ണ നടത്തും. 13നു തിരുവനന്തപുരത്തു സെക്രട്ടേറിയറ്റിലേക്കു മാര്‍ച്ചും ധര്‍ണയും നടത്തും.