തിബറ്റന്‍ ബുദ്ധ സന്ന്യാസിമാര്‍ അവരുടെ ആരാധനയുടേയും ധ്യാനത്തിന്റേയും ഭാഗമായ സാന്‍ഡ് മണ്ഡല കോഴിക്കോട് അവതരിപ്പിച്ചു. കോഴിക്കോട് നടന്ന മൂളക്കം കലാ സംഗമത്തിലാണ് ജനങ്ങള്‍ക്കുമുന്നില്‍ ഇത് പരിചയപ്പെടുത്തിയത്

സാന്‍ഡ് മണ്ഡല അഥവാ മണല്‍ക്കളം ബുദ്ധ സന്യാസിമാരുടെ പ്രാര്‍ത്ഥനയും ധ്യാനവുമാണ്. ധ്യാനിച്ചുകൊണ്ട് മണലുപയോഗിച്ച് ഓരോ രൂപങ്ങള്‍ തീര്‍ക്കുകയാണ് ചെയ്യുന്നത്. വ്യത്യസ്തങ്ങളായ നിറങ്ങള്‍ ചേര്‍ത്ത് പ്രത്യേക തരം കുഴലുപയോഗിച്ചാണ് മണ്ഡല ഒരുക്കുന്നത്.

വരക്കുന്ന ഓരോ രൂപവും ഓരോ നിറവും ദൈവങ്ങളുടെ പ്രതീകമാണ്. ലോക നന്മ ലക്ഷ്യമിട്ടാണ് സന്ന്യാസിമാര്‍ ഇത് ഒരുക്കുന്നത്. മണ്ഡല ഒരുക്കുന്നവര്‍ക്കും കാണുന്നവര്‍ക്കും പ്രത്യേക ചൈതന്യവും കരുത്തും ഉണ്ടാവുമെന്നാണ് വിശ്വാസം.

ഒരു ദിവസം കൊണ്ട് പൂര്‍ത്തിയാവുന്നവയും ദിവസങ്ങളോളം സമയമെടുത്ത് പൂര്‍ത്തിയാക്കുന്ന കളങ്ങളുമുണ്ട്. കളം പൂര്‍ത്തിയായി കഴിഞ്ഞാല്‍ പ്രാര്‍ത്ഥനയോടെ ഈ കളം മായ്ച്ചുകളയും. കോഴിക്കോട് നടന്ന മൂളക്കം കലാ സംഗമത്തില്‍ വെണ്ണ കൊണ്ടുള്ള ശില്‍പങ്ങളും സന്ന്യാസിമാര്‍ ഉണ്ടാക്കി.ഇതിനു പുറമെ തിബറ്റന്‍ ബാഗുകളുടേയും കര കൗശല വസ്തുക്കളുടേയും പ്രദര്‍ശനവും ഒരുക്കിയിരുന്നു.