സ്കൂൾ വിട്ട് വരുന്നതിനിടെ ട്രെയിന്‍ വരുന്നത് കണ്ട് ഇടിക്കാതിരിക്കാന്‍ പാളത്തില്‍ നിന്നും ചാടിയ വിദ്യാർത്ഥിനിക്ക് ദാരുണാന്ത്യം. ഒഞ്ചിയം പുത്തന്‍പുരയില്‍ സുനില്‍കുമാര്‍-പ്രജിത ദമ്പതികളുടെ മകള്‍ ആദിത്യ(13)യാണ് മരിച്ചത്. വീഴ്ചയില്‍ സംഭവിച്ച പരിക്കാണ് മരണ കാരണം. മടപ്പള്ളി വിഎച്ച്‌എസ്‌എസ് എട്ടാം ക്ലാസ് വിദ്യാര്‍ഥിനിയാണ്.

വളവുള്ള സ്ഥലമായതിനാല്‍ ട്രെയിന്‍ വരുന്നത് പെട്ടെന്ന് അറിയാനാകില്ല. ഇന്റര്‍സിറ്റി എക്‌സ്പ്രസ് വടകര ഭാഗത്തേക്ക് വരുമ്പോഴാണ് ട്രാക്ക് കടക്കാന്‍ കുട്ടി ശ്രമിച്ചത്. ട്രെയിന്‍ വരുന്നത് കണ്ടതോടെ രക്ഷപ്പെടാനായി ആറ് മീറ്ററോളം താഴ്ചയിലേക്ക് കുട്ടി ചാടുകയായിരുന്നു. ചാട്ടത്തില്‍ വീണ കുട്ടിയുടെ തലയ്ക്ക് പരുക്ക് പറ്റി. ആദ്യം സ്വകാര്യ ആശുപത്രിയിലും പിന്നീട് മെഡിക്കല്‍ കോളേജിലും എത്തിച്ചെങ്കിലും ഇന്നലെ പുലര്‍ച്ചെ മരിക്കുകയായിരുന്നു.