ലോക പ്രമേഹ ദിനത്തോടനുബന്ധിച്ച് ആരോഗ്യ വകുപ്പിന്റെ സഹകരണത്തോടെ കേരള സര്‍ക്കാര്‍ സ്ഥാപനമായ ഇന്ത്യന്‍ ഇന്‍സ്റ്റിറ്റിയൂട്ട് ഓഫ് ഡയബറ്റിസ് നിയമസഭാ സാമജികര്‍ക്കായി മെഡിക്കല്‍ ക്യാമ്പും ബോധവത്ക്കരണ പരിപാടിയും സംഘടിപ്പിച്ചു. വര്‍ധിച്ചു വരുന്ന ജീവിതശൈലീ രോഗങ്ങളുടെ പശ്ചാത്തലത്തിലാണ് ഇത്തരമൊരു ക്യാമ്പ് സംഘടിപ്പിച്ചതെന്ന് ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍ പറഞ്ഞു.

നിയമസഭാ സ്പീക്കര്‍ പി. ശ്രീരാമകൃഷ്ണന്‍, മന്ത്രി കെ.കെ. ശൈലജ ടീച്ചര്‍ ഉള്‍പ്പെടെ ഏകദേശം മുഴുവന്‍ സാമാജികരും ക്യാമ്പില്‍ പങ്കെടുത്തു. ബി.എം.ഐ., ബ്ലഡ് ഷുഗര്‍, ബ്രഡ് പ്രഷര്‍, എല്ലുകളുടെ ബലക്ഷയം നിര്‍ണയിക്കുന്ന ടെസ്റ്റ്, ന്യൂറോപ്പതി നിര്‍ണയിക്കുന്ന ടെസ്റ്റ്, തൈറോയിഡ് പരിശോധന, രക്തത്തിന്റെ ഷുഗറിന്റെ മൂന്ന് മാസത്തെ ആവറേജ് അറിയുന്ന ടെസ്റ്റ്, ദന്തല്‍ പരിശോധന, നേത്രപരിശോധന, ഭക്ഷണക്രമത്തെപ്പറ്റി പ്രത്യേക കൗണ്‍സിലിംഗ് എന്നിവ ഈ ക്യാമ്പില്‍ ലഭ്യമാക്കിയിരുന്നു. ഈ പരിശോധനാ ഫലത്തിന്റെ അടിസ്ഥാനത്തില്‍ ഇവരുടെ ഹെല്‍ത്ത് ഡേറ്റ തയ്യാറാക്കുകയും ചെയ്തു.

തിരുവനന്തപുരം മെഡിക്കല്‍ കോളേജ് എന്‍ഡോക്രൈനോളജി വിഭാഗം മേധാവിയും ഇന്ത്യന്‍ ഇന്‍സ്റ്റിറ്റിയൂട്ട് ഓഫ് ഡയബറ്റിസ് ഡയറക്ടറുമായ ഡോ. പി.കെ. ജബ്ബാറിന്റെ നേതൃത്വത്തിലുള്ള വിദഗ്ധ സംഘമാണ് ക്യാമ്പിന് നേതൃത്വം നല്‍കിയത്.