വിശ്വാസികളായ ഹിന്ദു സ്ത്രീകള്‍ സാധാരണ ശബരിമലയില്‍ പോവാറില്ലെന്ന് വൈദ്യുതി മന്ത്രി എം.എം മണി. എന്നാല്‍, വിശ്വാസികളല്ലാത്തവര്‍ ദര്‍ശനത്തിന് വന്നാല്‍ വിധിയുടെ അടിസ്ഥാനത്തില്‍ സര്‍ക്കാര്‍ നിലപാട് എടുക്കുമെന്ന് മന്ത്രി പറഞ്ഞു. ബിജെപിക്കും കോണ്‍ഗ്രസിനും ശബരിമല വിഷയത്തില്‍ ഇരട്ടത്താപ്പെന്നെും മന്ത്രി കുറ്റപ്പെടുത്തി. വിധി പുനഃപരിശോധിക്കാമെന്ന സുപ്രീംകോടതി വിധി സ്വാഗതം ചെയ്യുന്നു. യുവതീ പ്രവേശം സുപ്രീംകോടതി സ്‌റ്റേ ചെയ്തിട്ടില്ലെന്ന് ചൂണ്ടിക്കാട്ടിയ മന്ത്രി അതും സ്വാഗതം ചെയ്യുന്നുവെന്ന് പറഞ്ഞു.

കഴിഞ്ഞ മണ്ഡലകാലത്ത് നൂറുകണക്കിനു യുവതികള്‍ ശബരിമലയില്‍ ദര്‍ശനം നടത്തിയെന്ന് തുറന്ന് അടിച്ചയാളാണ് മന്ത്രി എം.എം മണി ഇനിയും നടത്തുമെന്നും സര്‍ക്കാരും പൊലീസും സംരക്ഷണം നല്‍കുമെന്നും വ്യക്തമാക്കിയിരുന്നു. അമ്പതിനായിരത്തോളം യുവതികളെ നിര്‍ബന്ധിച്ച് ശബരിമലയില്‍ കൊണ്ടുപോകാന്‍ സിപിഎമ്മിന് കഴിയും. ഒരുത്തനും തടയാന്‍ കഴിയില്ല. എന്നാലത് സിപിഎമ്മിന്റെ ജോലിയല്ല. ആവശ്യമുള്ളവര്‍ പോകട്ടെ, ദര്‍ശനം നടത്തട്ടെ. ശബരിമല അയ്യപ്പന്‍ നേരിട്ടു നിയമിച്ച ആളല്ല തന്ത്രി. ദേവസ്വം ബോര്‍ഡാണ് തന്ത്രിയെ നിയമിച്ചത്. യുവതികളെത്തിയാല്‍ അയ്യപ്പന്റെ ബ്രഹ്മചര്യം ഇല്ലാതാകുമെന്ന വിശ്വാസം തട്ടിപ്പാണ്. ലൗകിക ജീവിതം അനുഷ്ഠിക്കുന്നയാളാണ് തന്ത്രി, അദ്ദേഹത്തിന് ഭാര്യയും മക്കളുമുണ്ട്. അതുകൊണ്ട് അയ്യപ്പന് ഒന്നും സംഭവിച്ചില്ല. ശബരിമലയില്‍ അയ്യപ്പന്‍ മാത്രമല്ല മാളികപ്പുറത്തമ്മയുമുണ്ട്. തുടങ്ങിയ കാര്യങ്ങള്‍ തുറന്നടിച്ച മന്ത്രി എം.എം മണിയാണ് ഇപ്പോള്‍ വിശ്വാസികളായ യുവതികള്‍ മലചവിട്ടില്ലെന്ന പ്രതികരണവുമായി രംഗത്തെത്തിയിരിക്കുന്നത്.

കഴിഞ്ഞ മണ്ഡലകാലത്ത് നാമജപ ഘോഷയാത്ര നടത്തി പ്രതിഷേധിച്ചവരെ മന്ത്രി എം.എം മണി രൂക്ഷമായി വിമര്‍ശിച്ചിരുന്നു. ബി.ജെ.പി സംസ്ഥാന അധ്യക്ഷനായിരുന്ന പി.എസ് ശ്രീധരന്‍ പിള്ളയെപ്പോലുള്ള വായിനോക്കികളാണ് വിഷയത്തില്‍ പ്രതിഷേധവുമായി തെരുവിലിറങ്ങിയതെന്നായിരുന്നു പ്രധാന പരാമര്‍ശം. ശബരിമലയിലെന്നല്ല ഒരിടത്തും സ്ത്രീകള്‍ക്ക് വിവേചനം പാടില്ല. ശബരിമല ദര്‍ശനത്തിനെത്തുന്ന യുവതികള്‍ക്ക് സംരക്ഷണം നല്‍കണം. അത് സുപ്രീം കോടതി ഭരണഘടനാ ബഞ്ചിന്റെ വിധിയാണ്. വിധി നടപ്പിലാക്കിയില്ലെങ്കില്‍ കോടതിയലക്ഷ്യത്തിന് സര്‍ക്കാര്‍ ഉത്തരം പറയേണ്ടി വരുമെന്നും മന്ത്രി അന്ന് ചൂണ്ടിക്കാണിച്ചിരുന്നു.

സുപ്രീംകോടതി വിധിക്കെതിരെ സംസ്ഥാനത്ത് നടക്കുന്ന പ്രതിഷേധങ്ങളെ തളളിയ എസ്എന്‍ഡിപി യോഗം പ്രസിഡന്റ് വെള്ളാപ്പള്ളി നടേശന്‍, പക്ഷെ, യുവതികള്‍ മലകയറരുതെന്നും പറഞ്ഞു. അദ്ദേഹത്തിന് വെളിവുണ്ടായെന്നാണ് മന്ത്രി എം.എം മണി പരിഹസിച്ചിരുന്നു. ഭക്തര്‍ക്ക് പിന്തുണ പ്രഖ്യാപിച്ച രമേശ് ചെന്നിത്തലയ്ക്ക് വട്ടാണെന്നും കളിയാക്കിയിരുന്നു. ശബരിമല വിധി ദുര്‍വ്യാഖ്യാനിച്ച് പതിസന്ധി ഉണ്ടാക്കി അപവാദപ്രചരണം നടത്തി കേരളത്തിലെ ക്രമസമാധാനനില തകര്‍ക്കാനുള്ള ശ്രമങ്ങളാണ് നടന്നത്. അതില്‍ കോണ്‍ഗ്രസും ബിജെപിയും കൊകോര്‍ക്കുകയായിരുന്നെന്നും അതിനെ സര്‍ക്കാര്‍ ശക്തമായി നേരിട്ടു. ഇത്തവണയും അതുണ്ടാകുമെന്നും മന്ത്രി എം എം മണി വ്യക്തമാക്കി.