ശബരിമല യുവതീപ്രവേശ വിധി സുപ്രീംകോടതി സ്റ്റേ ചെയ്യാത്ത പശ്ചാത്തലത്തില് മുഖ്യമന്ത്രി പിണറായി വിജയനും സര്ക്കാരും വെട്ടിലായി
ശബരിമല യുവതീപ്രവേശ വിധി സുപ്രീംകോടതി സ്റ്റേ ചെയ്യാത്ത പശ്ചാത്തലത്തില് മുഖ്യമന്ത്രി പിണറായി വിജയനും സര്ക്കാരും വെട്ടിലായി. മണ്ഡലകാലം ആരംഭിക്കാന് ഏതാനും ദിവസം മാത്രം ബാക്കി നില്ക്കെ, കോടതി വിധി നിലനില്ക്കുന്നതിനാല് മലകയറാന് ആക്ടിവിസ്റ്റുകളും സന്നിധാനത്ത് നിന്ന് റിപ്പോര്ട്ട് ചെയ്യാന് വനിതാ മാധ്യമപ്രവര്ത്തകരും എത്തുമെന്ന് റിപ്പോര്ട്ടുണ്ട്. അവര്ക്ക് പൊലീസ് സംരക്ഷണ ഒരുക്കുകയും ഭക്തര് തടയാന് ശ്രമിക്കുകയും ചെയ്താല് കഴിഞ്ഞതവണത്തേക്കാള് പ്രശ്നങ്ങള് സങ്കീര്ണമാകും. തദ്ദേശസ്വയംഭരണ തെരഞ്ഞെടുപ്പ് അടുത്ത് വരുന്നതിനാല് മുതലെടുപ്പ് രാഷ്ട്രീയത്തിനായി കാത്തിരിക്കുന്നവരുണ്ട്. അവരെ എങ്ങനെ നേരിടും എന്നത് സര്ക്കാരിനെയും എല്.ഡി.എഫിനെയും പ്രതിരോധത്തിലാക്കും.
പുനപ്പരിശോധനാ ഹര്ജി വിശാലബെഞ്ചിലേക്ക് വിട്ടതിനാല് നിലവിലുള്ള വിധി നടപ്പാക്കരുതെന്നും യുവതികളെ പ്രവേശിപ്പിക്കരുതെന്നും യു.ഡി.എഫും മുന് ബി.ജെ.പി സംസ്ഥാന പ്രസിഡന്റ് കുമ്മനംരാജശേഖരനും ഇതിനകം ആവശ്യപ്പെട്ടുകഴിഞ്ഞു. അതിനര്ത്ഥം മണ്ഡലകാലം കലുഷിതമാക്കാന് രാഷ്ട്രീയമായി അവര് തീരുമാനിച്ചെന്ന് വേണം അതില് നിന്ന് മനസ്സിലാക്കാന്. പ്രത്യേകിച്ച് ഉപതെരഞ്ഞെടുപ്പുകളില് യു.ഡി.എഫിന് ഏറ്റ തിരിച്ചടിയില് നിന്ന് കരകയറാന് തദ്ദേശസ്വയംഭരണ തെരഞ്ഞെടുപ്പുകളില് മുന്തൂക്കം കിട്ടേയേ മതിയാകൂ. അതിനായി ശബരിമല അവര് ആയുധമാക്കുമെന്ന് ഉറപ്പാണ്. എന്നാല് കോണ്ഗ്രസിലെ തന്നെ പല നേതാക്കളും ശബരിമല വിഷയവും സാമുദായിക സംഘടനകളെ പ്രീണിപ്പിക്കുന്ന കാര്യവും അവസാനിപ്പിക്കണമെന്ന്, വട്ടിയൂര്ക്കാവിലെ പരാജയത്തിന് ശേഷം ആവശ്യപ്പെട്ടിട്ടുണ്ട്.
യാതൊരു കാരണവശാലും യുവതികളെ പ്രവേശിപ്പിക്കാന് അനുവദിക്കില്ലെന്നും അതിനായി അക്രമരഹിതമായ സമരങ്ങള് നടത്തുമെന്ന് കോണ്ഗ്രസ് നേതാവും തിരുവിതാംകൂര് ദേവസ്വംബോര്ഡ് മുന് പ്രസിഡന്റുമായ പ്രയാര്ഗോപാലകൃഷ്ണന് ഇതിനകം പ്രഖ്യാപിച്ചിട്ടുണ്ട്. കോണ്ഗ്രസിന് വേണ്ടി പുനപ്പരിശോധനാ ഹര്ജിനല്കിയതും അദ്ദേഹമാണ്. സമുദായ സംഘടനകള് പറയുന്നത് അംഗങ്ങള് പോലും കേള്ക്കാത്ത സാഹചര്യത്തില് അവര്ക്ക് പുറകേ പോകേണ്ടെന്നും ശബരിമല വിഷയം ആളിക്കത്തിക്കേണ്ടെന്നും അയോധ്യവിധി സ്വീകരിച്ചത് പോലെ സമാധാനപരമായി കാര്യങ്ങള് പോകട്ടെ എന്ന് ആഗ്രഹിക്കുന്നവരുമുണ്ട്. ഇവര് തമ്മിലുള്ള ആശയസംഘര്ഷം യു.ഡി.എഫിലും പ്രശ്നങ്ങള് സൃഷ്ടിക്കും.
യുവതീപ്രവേശനം നടപ്പാക്കിയതാണ് ലോക്സഭാ തെരഞ്ഞെടുപ്പില് വലിയ പരാജയം ഏറ്റുവാങ്ങാന് കാരണമെന്ന് സി.പി.എമ്മിലും എല്.ഡി.എഫിലും പൊതുവേ അഭിപ്രായമുണ്ട്. എന്നാല് മുഖ്യമന്ത്രി അത് അംഗീകരിച്ചിട്ടില്ല. അതിനാല് മണ്ഡലകാലത്ത് യുവതികളെത്തിയാല് എന്ത് ചെയ്യണം എന്നത് സംബന്ധിച്ച തീരുമാനം സര്ക്കാരിനെയും മുന്നണിയേയും കുഴപ്പത്തിലാക്കിയിരിക്കുകയാണ്. വട്ടിയൂര്ക്കാവ് ജയത്തോടെ ജാതി, മത സമുദായങ്ങള്ക്ക് കേരള രാഷ്ട്രീയത്തില് വലിയ സ്വാധീനമില്ലെന്നും പാലാ ഉപതെരഞ്ഞെടുപ്പോടെ ശബരിമല വിഷയം ആവിയായെന്നും സി.പി.എം ആവര്ത്തിക്കുന്നതിനാല് യുവതികള്ക്ക് പിന്തുണ നല്കാനാണ് സാധ്യത.
https://www.facebook.com/Malayalivartha